មេធាវីដែលស្និតជាមួយគណបក្ស សម រង្ស៊ី គឺលោក ជូង ជូងី នៅថ្ងៃទី២៧ ខែកក្កដា ឆ្នាំ២០១២ បានទៅឆ្លើយបំភ្លឺនៅសាលាដំបូងខេត្តកណ្ដាល ជុំវិញសំណុំរឿងដែលលោកបានប្ដឹងចៅក្រមស៊ើបសួរម្នាក់ នៃតុលាការនេះ ឈ្មោះ លឹម សុគន្ថា ក្រោមបទក្លែងបន្លំឯកសារសាធារណៈកន្លងមក។
លោកមេធាវី ជូង ជូងី ផ្ដល់បទសម្ភាសឲ្យវិទ្យុអាស៊ីសេរី នៅការិយាល័យរបស់លោក នៅភ្នំពេញ ថ្ងៃទី២៦ ខែធ្នូ ឆ្នាំ២០១១។
មេធាវី ជូង ជូងី ជាដើមបណ្ដឹងនោះ បានប្ដឹងចៅក្រមស៊ើបសួរលោក លឹម សុគន្ថា តាំងពីថ្ងៃទី២៣ ខែកញ្ញា ឆ្នាំ២០១១ កន្លងទៅនេះ ប៉ុន្តែលោកបានមកឆ្លើយបំភ្លឺតាមការកោះហៅរបស់ព្រះរាជអាជ្ញារងលោក ទេព មុន្និន្ទ នៅថ្ងៃទី២៧ ខែកក្កដា ឆ្នាំ២០១២។
ចំណុចសំខាន់ដែលលោក ជូង ជូងី បានប្ដឹងនោះ គឺទី១ បានក្លែងបន្លំដីកាឃុំខ្លួនបណ្ដោះអាសន្នលើកូនក្តីរបស់លោកឈ្មោះ មាស ប៉េង និងទី២ បានក្លែងបន្លំកាលបរិច្ឆេទលើដីកានោះ។
ការប្ដឹងរបស់លោក ជូង ជូងី នៅពេលនេះ គឺជាការតទល់ជាមួយនឹងការចោទប្រកាន់ ដោយចៅក្រមស៊ើបសួរលោក លឹម សុគន្ថា កន្លងមក ដែលបានចោទថា លោក ជូង ជូងី ថាបានផ្តល់មធ្យោបាយ និងជួយរំដោះជនសង្ស័យជាសកម្មជនគណបក្ស សម រង្ស៊ី ឈ្មោះ មាស ប៉េង ចេញពីមន្ទីរឃុំឃាំង នៅខេត្តកណ្ដាល។ លោក ជូង ជូងី កំពុងជាប់ចោទក្រោមបទព្រហ្មទណ្ឌនៃសំណុំរឿងនេះ។
លោក ជូង ជូងី បានមានប្រសាសន៍ប្រាប់អ្នកកាសែត នៅសាលាដំបូងខេត្តកណ្ដាល ថា លោកស្នើសុំឲ្យតុលាការនេះបើកសវនាការជំនុំជម្រះសំណុំរឿងនេះឲ្យបានឆាប់ និងតាមនីតិវិធីច្បាប់៖ «កំហុសបែបនេះ ប្រសិនបើប្រជារាស្ត្រសាមញ្ញវិញណា ចៅក្រមព្រះរាជអាជ្ញាចាប់ដាក់គុកតាំងពីយូរហើយ។ ប៉ុន្តែដោយសារតែកំហុសនេះ គឺចៅក្រម លឹម សុគន្ថា ជាអ្នកប្រព្រឹត្តិ ដូច្នេះយើងតាមមើលទាំងអស់គ្នា តើព្រះរាជអាជ្ញាគាត់មានឆន្ទៈចាត់ការទៅតាមផ្លូវច្បាប់ទេ។ បើរឿងបែបនេះកើតឡើងចំពោះរាស្ត្រសាមញ្ញណា ចាប់ដាក់គុកតាំងពីយូរហើយ។ អីចឹង ប្រសិនបើតំណាងអយ្យការមិនចាត់ការតាមផ្លូវច្បាប់ទេ ខ្ញុំនឹងតវ៉ាតទៅទៀត»។
វិទ្យុអាស៊ីសេរី មិនអាចទាក់ទងសុំសេចក្តីបំភ្លឺពីលោកព្រះរាជអាជ្ញារង លោក ទេព មុន្និន្ទ បានទេ នៅថ្ងៃទី២៧ ខែកក្កដា ឆ្នាំ២០១២ ប៉ុន្តែប្រភពបានឲ្យដឹងថា លោកគ្រោងកោះហៅចៅក្រមស៊ើបសួរលោក លឹម សុគន្ថា មកឆ្លើយបំភ្លឺដែរ នាពេលខាងមុខ។
វិទ្យុអាស៊ីសេរី ក៏មិនអាចទាក់ទងចៅក្រមស៊ើបសួរលោក លឹម សុគន្ថា បានដែរដើម្បីសុំសេចក្តីប្រតិកម្មចំពោះការប្ដឹង និងចោទប្រកាន់របស់លោក ជូង ជូងី។
លោក ជូង ជូងី កាលពីខែធ្នូ ឆ្នាំ២០១១ កន្លងទៅនេះ បានស្វែងរកកិច្ចអន្តរាគមន៍ពីប្រធានគណៈមេធាវីកម្ពុជាលោក ជីវ សុងហាក់ នៅគ្រាដែលព្រះរាជអាជ្ញានៃសាលាដំបូងខេត្តកណ្ដាល លោក អ៊ុក គឹមសិទ្ធិ បានចេញដីកាកោះហៅឲ្យលោកចូលឆ្លើយបំភ្លឺ ជុំវិញសំណុំរឿងចោទប្រកាន់ថាលោកបានផ្តល់មធ្យោបាយ និងជួយសម្រួលដោះលែងជនសង្ស័យជាជំទប់ទី២ ឃុំបន្ទាយដែក ស្រុកកៀនស្វាយ ខេត្តកណ្ដាល លោក មាស ប៉េង ខាងគណបក្ស សម រង្ស៊ី។ លោក ជូង ជូងី កន្លងមកតែងតែបដិសេធការចោទប្រកាន់នេះ៕
No comments:
Post a Comment
yes