មន្ត្រីសមាគមគ្រូបង្រៀន និងអាណាព្យាបាលសិស្សស្នើឲ្យរដ្ឋមន្ត្រីក្រសួងអប់រំ យុវជន និងកីឡា បើកការស៊ើបអង្កេតចំពោះអំពើពុករលួយក្នុងសម័យប្រឡងឌីប្លូម ឬសិស្សអនុវិទ្យាល័យឆ្នាំ២០១២ ឲ្យបានទាន់ពេល។
ទិដ្ឋភាពពេលសិស្សចេញពីមណ្ឌលប្រឡង វិទ្យាល័យទេពប្រណម្យ ក្នុងស្រុកពញាឮ ខេត្តកណ្ដាល កាលពីថ្ងៃ២៧ កក្កដា ២០០៩។
អាណាព្យាបាលសិស្សបានចោទអ្នកគ្រប់គ្រងតាមមណ្ឌលប្រឡង ឬអនុរក្សថាបានដើរប្រមូលលុយពីសិស្ស ក្នុងម្នាក់ពី ៣០ដុល្លារទៅ៥០ដុល្លារ ជាថ្នូរប្រឡងជាប់សញ្ញាប័ត្រ។
ប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន បានឲ្យដឹងនៅថ្ងៃទី២៦ ខែកក្កដា ថា ប្រធានមណ្ឌលប្រឡងឌីប្លូម ឆ្នាំនេះ តម្រូវឲ្យបេក្ខជនប្រឡងត្រូវបង់លុយឲ្យពួកគេម្នាក់ៗចន្លោះពី ៣០ដុល្លារទៅ៥០ដុល្លារ ទើបអាចប្រឡងជាប់។
លោកថា បើថ្នាក់ដឹកនាំក្រសួងអប់រំមិនមានវិធានការទប់ស្កាត់អំពើពុករលួយកំពុងកើតមានក្នុងសម័យប្រឡងឌីប្លូម ឆ្នាំ២០១២ ឲ្យបានទាន់ពេលទេ នឹងនាំឲ្យគុណភាពអប់រំធ្លាក់ចុះនាថ្ងៃអនាគត៖ «អ្នកដែលរត់ហាងឆេងតម្លៃ ៣០ ឬ៣៥ និងមានកន្លែងខ្លះរហូតដល់ ៥០ដុល្លារ ជាប់។ យើងឃើញថា ក្រសួងអប់រំត្រូវតែមានវិធានការ ឬត្រូវសហការជាមួយអាជ្ញាធរមូលដ្ឋាន ដើម្បីនាំខ្លួនអ្នកមេខ្យល់ទាំងអស់នោះយកមកផ្ដន្ទាទោស។ ជៀសវាងកុំឲ្យដើរធ្វើសកម្មភាពបែបហ្នឹង នាំឲ្យមានការប៉ះពាល់ទៅដល់កិត្តិយសប្រទេសកម្ពុជាយើង»។
លោកបានសង្កត់ធ្ងន់ថា អំពើពុករលួយនៅក្នុងសម័យប្រឡង បានកើតមានស្ទើរទូទាំងប្រទេស ដែលទាមទារឲ្យស្ថាប័នពាក់ព័ន្ធ មានវិធានការទប់ស្កាត់ឲ្យមានប្រសិទ្ធភាព។
អាណាព្យាបាលមិនបង្ហាញអត្តសញ្ញាណ មកពីខេត្តកណ្ដាល ស្ថិតក្នុងចំណោមអាណាព្យាបាលសិស្សផ្សេងទៀត បានអះអាងថា កូនរបស់គាត់បានសុំប្រាក់ចំនួន ៣០ដុល្លារ យកទៅផ្តល់ជូនគ្រូបង្រៀននៅមណ្ឌលប្រឡងវិទ្យាល័យ ប៊ុន រ៉ានី ហ៊ុន សែន បែកចាន ស្រុកអង្គស្នួល ខេត្តកណ្ដាល។
អាណាព្យាបាលសិស្សនេះបានស្នើឲ្យលោក អ៊ឹម សិទ្ធី រដ្ឋមន្ត្រីក្រសួងអប់រំ និងថ្នាក់ដឹកនាំស្ថាប័នពាក់ព័ន្ធ ត្រូវបញ្ជូនមន្ត្រីជំនាញ ដើម្បីស៊ើបអង្កេតករណីអំពើពុករលួយក្នុងសម័យប្រឡងឌីប្លូម ឆ្នាំនេះ ឲ្យមានប្រសិទ្ធភាព ដើម្បីលើកកម្ពស់គុណភាពអប់រំដែលរងការរិះគន់៖ «គ្រប់អនុវិទ្យាល័យទាំងអស់ត្រូវទៅប្រឡងនៅមណ្ឌលវិទ្យាល័យបែកចាន ទាំងអស់។ នាយកដែលគ្រប់គ្រងសិស្សថ្នាក់ទី៩ គឺទារលុយពីសិស្សក្នុងម្នាក់ ៣០ដុល្លារពេញ។ ទាំងកូនខ្ញុំកូនគេ គឺត្រូវតែឲ្យគេ ហើយខ្ញុំសុំចុះត្រឹម ២៥ដុល្លារ ក៏មិនបានដែរ»។
សម័យប្រឡងសិស្សថ្នាក់អនុវិទ្យាល័យ ឬប្រឡងឌីប្លូម ឆ្នាំនេះ បានចាប់ពីថ្ងៃចន្ទ ទី១៦ ដល់ថ្ងៃអង្គារ ទី១៧ ខែកក្កដា ឆ្នាំ២០១២។ ប៉ុន្តែការប្រឡងនេះ អាណាព្យាបាលសិស្ស និងសមាគមគ្រូបង្រៀនបានចោទថា មានអំពើពុករលួយធ្ងន់ធ្ងរ។
មន្ត្រីសមាគមគ្រូបង្រៀន បានឲ្យដឹងថា ដរាបណាអំពើពុករលួយបន្តជ្រៀតចូលក្នុងវិស័យអប់រំ ពិសេសក្នុងសម័យប្រឡងចូលមកដល់ ហើយថ្នាក់ដឹកនាំក្រសួងអប់រំ ឬប្រមុខដឹកនាំរដ្ឋាភិបាលគ្មានវិធានការទប់ស្កាត់ទេ វិស័យអប់រំកម្ពុជាមិនអាចមានគុណភាពដូចបណ្ដាប្រទេសលើសកលលោកបានទេ។
វិទ្យុអាស៊ីសេរី មិនអាចទាក់ទងលោក អ៊ឹម សិទ្ធី រដ្ឋមន្ត្រីក្រសួងអប់រំ ដើម្បីបំភ្លឺជុំវិញអំពើពុករលួយក្នុងសម័យប្រឡងឌីប្លូម បានទេ នៅថ្ងៃទី២៦ ខែកក្កដា នៅគ្រាមន្ត្រីក្រោមឱវាទរបស់លោកបានបដិសេធមិនធ្វើអត្ថាធិប្បាយ។
យ៉ាងនេះក្តី លោក រ៉ុង ឈុន បានស្នើទៅអាណាព្យាបាលសិស្ស មិនត្រូវផ្តល់ថវិកាសំណូកណាមួយជូននាយកគ្រប់គ្រងមណ្ឌលប្រឡង ឬអនុរក្សជាថ្នូរឲ្យបុត្រធីតារបស់ខ្លួនបានប្រឡងជាប់សញ្ញាប័ត្រ ប៉ុន្តែមិនមានចំណេះដឹងពិតប្រាកដនោះទេ៕
No comments:
Post a Comment
yes