មហាបាតុកម្មរបស់គណបក្សសង្គ្រោះជាតិ នាពេលកន្លងមក
មន្ត្រីជាន់ខ្ពស់គណបក្សសង្គ្រោះជាតិ លោក យឹម សុវណ្ណ ឲ្យដឹងថា មហាបាតុកម្មអហិង្សានៅទីលានប្រជាធិបតេយ្យ ថ្ងៃទី២៣ ខែតុលាខាងមុខ នឹងមានអ្នកចូលរួមចាប់ពី ២-៥ម៉ឺននាក់ តាមការគ្រោងទុក។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ ប្រាប់ VOD នៅព្រឹកថ្ងៃអាទិត្យទី២០ ខែតុលានេះថា គណបក្ស រំពឹងថា នៅថ្ងៃទី២៣ ខែតុលា និងមានអ្នកចូលរួម មហាបាតុកម្មអហិង្សាចាប់ពី២-៥ម៉ឺននាក់ មកពីបណ្តារាជធានី-ខេត្ត។ លោកថា ការជួបជុំគ្នាក្នុងមហាបាតុកម្មនោះមាន សម្តែងមតិ ប្រគំតន្ត្រី និងការដើរហែក្បួន យកញត្តិដែលមានស្នាមមេដៃអ្នកគាំទ្រច្រើនលាននាក់ ដាក់ទៅអង្គការសហប្រជាជាតិ តាមរយៈឧត្តមស្នងការសហប្រជាជាតិប្រចាំកម្ពុជា និងប្រទេសហត្ថលេខីមួយចំនួនទៀត។
កាលពីថ្ងៃទី១៦ ខែតុលា ឆ្នាំ២០១៣ គណបក្សសង្គ្រោះជាតិ បានជូនដំណឹងទៅសាលារាជធានីភ្នំពេញ ពីគម្រោងធ្វើមហាបាតុកម្មលើកទី៣ របស់ខ្លួននៅទីលានប្រជាធិបតេយ្យ ចំនួន៣ថ្ងៃ គឺចាប់ពីថ្ងៃទី២៣ ដល់ថ្ងៃ២៥ ខែតុលា។
ក្រោយពីជួបពិភាក្សា ជាមួយតំណាងគណបក្សសង្គ្រោះជាតិ កាលពីថ្ងៃសុក្រទី១៨ ខែតុលា សាលារាជធានីចាត់ទុកថា គម្រោងធ្វើបាតុកម្មនោះ ហួសពីដែនសមត្ថកិច្ចរបស់ខ្លួន ប៉ុន្តែស្ថាប័ននេះ បានសុំគោលការណ៍ ទៅក្រសួងមហាផ្ទៃដើម្បីសម្រេច។
នៅព្រឹកថ្ងៃទី២០ ខែតុលានេះ VOD មិនទាន់សុំការបំភ្លឺពីអ្នកនាំពាក្យសាលារាជធានីភ្នំពេញលោក ឡុង ឌីម៉ង់ បាននៅឡើយទេ ដោយទូរស័ព្ទចូលតែមិនមានអ្នកទទួល។
គួររំលឹកថា គណបក្សសង្គ្រោះជាតិបានធ្វើមហាបាតុកម្មអហិង្សាចំនួន២លើកមកហើយ ដើម្បីទាមទាររកដំណោះស្រាយពីភាពមិនប្រក្រតីជូនម្ចាស់ឆ្នោត។ ប៉ុន្តែដោយសារតែដំណោះស្រាយនយោបាយនៅតែជាប់គាំង បក្សប្រឆាំងសម្រេចធ្វើបាតុកម្មអហិង្សាលើកទី៣ នៅថ្ងៃទី២៣-២៥ ខែតុលា ដើម្បីយកញត្តិដែលមានស្នាមមេដៃអ្នកគាំទ្រច្រើនលាននាក់ ដាក់ទៅអង្គការសហប្រជាជាតិ តាមរយៈឧត្តមស្នងការសហប្រជាជាតិប្រចាំកម្ពុជា និងប្រទេសហត្ថលេខីនៃកិច្ចព្រមព្រៀងទីក្រុងប៉ារីសមួយចំនួនទៀត ជួយរកយុត្តិធម៌ជូនម្ចាស់ឆ្នោត៕
No comments:
Post a Comment
yes