ខ្មែរម្នាក់ត្រូវគេបាញ់សម្លាប់ក្នុងទឹកដីលាវ
ដោយ រដ្ឋា វីសាល
នៅតាមតំបន់ព្រំដែនខ្មែរ-លាវ ក្នុងខេត្តស្ទឹងត្រែង តែងតែមានសេចក្ដីរាយការណ៍ថាប្រជាពលរដ្ឋខ្មែរត្រូវគេបាញ់ សម្លាប់ដោយសារឆ្លងកាត់ព្រំដែនទៅប្រមាញ់សត្វព្រៃ កាប់ឈើ ឬទៅទិញឈើ។
អាជ្ញាធរខេត្តស្ទឹងត្រែង នៅថ្ងៃសុក្រ ទី៤ ខែមីនា ឆ្នាំ២០១១ នេះ កំពុងតែបន្តស៊ើបអង្កេតទៅលើសេចក្ដីរាយការណ៍ដែលថាមានពលរដ្ឋ ខ្មែរម្នាក់ទៀត ត្រូវគេបាញ់សម្លាប់នៅក្នុងទឹកដីលាវក្បែរតំបន់ព្រំដែន កម្ពុជា-លាវ ក៏ប៉ុន្តែមិនទាន់ដឹងពីលទ្ធផលនៅឡើយទេ។
ការស៊ើបអង្កេតនេះ ធ្វើឡើងតាំងពីថ្ងៃទី៣ ខែមីនា ឆ្នាំ២០១១ មកម្ល៉េះ បន្ទាប់ពីតម្រួតព្រំដែនលាវ នៅចំណុចព្រំដែនលេខ០៦១ ជាប់នឹងឃុំព្រែកមាស ស្រុកសៀមប៉ាង បានណាត់ជួបជាមួយអាជ្ញាធរព្រំដែនខេត្តស្ទឹងត្រែង ដើម្បីពិភាក្សាពីបញ្ហាទាក់ទិនការបាញ់សម្លាប់ប្រជាពលរដ្ឋខ្មែរ នៅតំបន់ព្រំដែននោះ ក៏ប៉ុន្តែដោយសារតែភាគីអាជ្ញាធរខេត្តស្ទឹងត្រែងធ្វើដំណើរទៅដល់ យឺតពេល ទើបការណាត់ជួបនោះត្រូវលើកពេលមកធ្វើនៅថ្ងៃសុក្រ ទី៤ នេះវិញ និងប្ដូរទីណាត់ជួបនៅចំណុចព្រំដែនលេខ០៦៥ វិញ។
មេបញ្ជាការវរប៉ូលិសការពារព្រំដែន៧០១ នៃស្នងការដ្ឋានប៉ូលិសខេត្តស្ទឹងត្រែង លោក ហ៊ុន បាន មានប្រសាសន៍បញ្ជាក់ថា ដោយសារតំបន់ណាត់ជួបជាតំបន់ព្រៃពិបាកធ្វើដំណើរ ដូច្នេះនៅថ្ងៃសុក្រ ទី៤ មីនា នេះ ក្រុមសមត្ថកិច្ចការពារព្រំដែនចម្រុះនៃអាជ្ញាធរខេត្តស្ទឹងត្រែង កំពុងធ្វើដំណើរទៅកាន់ទីតាំងណាត់ជួបគ្នាថ្មីនោះ ដើម្បីជួបជាមួយអាជ្ញាធរការពារព្រំដែនលាវ។ ចំណែកលទ្ធផលនៃការជួបពិភាក្សាជាមួយភាគីលាវ លោកមិនទាន់ទទួលសេចក្ដីរាយការណ៍ពីក្រុមការងារនោះនៅឡើយ ៖ "យើង ទទួលព័ត៌មានខាងលាវមកវិញទេ។ នៅក្នុងតំបន់ហ្នឹងវាព្រៃ ខ្ញុំឲ្យកម្លាំងខ្ញុំចុះទៅតែមកវិញភ្លាម គេរាយការណ៍ភ្លាម ប៉ុន្តែឥឡូវវាអត់ទាន់បានជួបគ្នាតាមទូរស័ព្ទ ព្រោះអីដាច់សេវាហ្មង"។
កាលពីថ្ងៃទី២ ខែមីនា ឆ្នាំ២០១១ មានសេចក្ដីរាយការណ៍ថា ពលរដ្ឋខ្មែរប្រមាណ ៣០នាក់ បានធ្វើដំណើរដោយរទេះគោ ប្រមាណបីគ្រឿង ហើយត្រូវជួបហេតុការណ៍បាញ់ប្រហារធ្វើឲ្យអ្នកភូមិម្នាក់ និងគោបីក្បាលត្រូវគេរាយការណ៍ថាបានស្លាប់ និងងាប់។ ចំណែកអ្នករួមដំណើរផ្សេងទៀត បានរត់ខ្ចាត់ខ្ចាយពីការស្ទាក់បាញ់នៅតំបន់ព្រំដែនខាងលើ ដោយសារតែអ្នកភូមិទាំងនោះឆ្លងចូលផុតខ្សែបន្ទាត់ព្រំដែនខ្មែរទៅ ទឹកដីលាវ។
មន្ត្រីក្រុមប្រឹក្សាស្រុកសៀមប៉ាង លោក ជិន ធិន មានប្រសាសន៍បញ្ជាក់ថា សេចក្ដីរាយការណ៍របស់អាជ្ញាធរស្រុកសៀមប៉ាងឲ្យដឹងថា អ្នកភូមិដែលជួបហេតុការណ៍បាញ់ប្រហារនៅតំបន់ព្រំដែនលាវ គឺជាប្រជាពលរដ្ឋមកពីខេត្តកំពត ពួកគេត្រូវបានមេក្លោងជួលឲ្យទៅដឹកជញ្ជូនឈើប្រណីតនៅតំបន់ព្រៃ នាតំបន់ព្រំដែនខ្មែរ-លាវ ក្នុងភូមិសាស្ត្រខាងលើ ហើយត្រូវតម្រួតព្រំដែនលាវស្ទាក់បាញ់ឲ្យរត់បែកខ្ញែកគ្នាអស់ទៅ ទើបដំណឹងនេះត្រូវបានគេរាយការណ៍មកឲ្យអាជ្ញាធរស្រុក និងតម្រួតព្រំដែនបានដឹង ៖ "អាខាងលាវគេចោទថា ចូលទៅលួចឈើគេ វាអីចេះ អត់ឲ្យចូលទៅចូលត្រួតពិនិត្យផង ចាំមើលគណៈកម្មការគេមក គេរាយការណ៍មកបានដឹង។ អាជ្ញាធរដែនដីអាចចុះទៅដើម្បីអប់រំប្រជាពលរដ្ឋកុំឲ្យចេញចូល តាមអំពើចិត្ត ទៅណាខ្វះការអនុញ្ញាតពីឃុំ ពីស្រុក ចេញទៅលាវបាន"។
អ្នកភូមិរស់នៅឃុំព្រែកមាស ស្រុកសៀមប៉ាង លោក ហួត សីហា មានប្រសាសន៍ឲ្យដឹងថា នៅតំបន់ព្រំដែនលាវ ជាប់នឹងស្រុកសៀមប៉ាង ប្រជាពលរដ្ឋក្នុងស្រុក និងប្រជាពលរដ្ឋមកពីខេត្តមួយចំនួនទៀត នៃប្រទេសកម្ពុជា បាននាំគ្នាចូលមកកាន់តំបន់ព្រំដែនដើម្បីប្រកបរបរប្រមាញ់សត្វ ព្រៃ ខ្លះទៀតធ្វើជំនួញឈើប្រណិតឆ្លងដែនជាមួយប្រជាពលរដ្ឋលាវនៅតំបន់ នោះ។ ក៏ប៉ុន្តែអ្នកភូមិមួយចំនួនចាញ់បោកប្រជាពលរដ្ឋលាវ ដែលបានធ្វើលិខិតស្នាមក្លែងក្លាយថាតម្រួតលាវបានអនុញ្ញាតឲ្យចូល ទៅដីលាវដោយបង់ប្រាក់ ក៏ប៉ុន្តែអ្នកភូមិខ្មែរទាំងនោះត្រូវគេយកប្រាក់អស់ ហើយតម្រួតលាវក៏ចាប់ខ្លួន ឬស្ទាក់បាញ់ជាញឹកញយ ដោយចោទថាអ្នកភូមិទាំងនោះលួចឆ្លងដែនទៅក្នុងដីលាវខុសច្បាប់ ឬទៅលូចកាប់ឈើក្នុងដីលាវ ៖ "អាពេលមុនទៅហ្នឹង ចូលទៅលាវហ្នឹងតាមផ្លូវសំងាត់ទេ ដល់ទៅៗ ទៅជួបដូចថាអាអ្នកវាឆបោក ជាមួយលាវហ្នឹងដែរ គេទារបង់អស់ម៉ាពាន់ប្រាំពីររយទៅ គេធ្វើអាលិខិតក្លែងក្លាយហ្នឹងឲ្យ។ ពួកហ្នឹងគេចូលទៅហ្នឹងគេអត់ចូលថា ទៅដោយប្រភេទចោរទេ ចូលទៅថាដោយទំនាក់ទំនងឲ្យស្របច្បាប់ការពារខ្លាចលាវគេចាប់គេ អីដាក់គុកអ៊ីចឹង។ដល់ទៅៗ ប៉ះចំអាកន្លែងគេឆបោក ពួកលាវឆបោក គេវ៉ៃត្រាវ៉ៃអីមកឲ្យ"។
វិទ្យុអាស៊ីសេរីមិនអាចទាក់ទងអភិបាលខេត្តស្ទឹងត្រែង លោក ឡូយ សូផាត ដើម្បីអធិប្បាយបញ្ហាពលរដ្ឋខ្មែរដែលតែងតែត្រូវគេបាញ់សម្លាប់ និងចាប់ខ្លួនដោយសារឆ្លងដែនទៅដីលាវនោះបានទេ នៅថ្ងៃសុក្រ ទី៤ ខែមីនា ឆ្នាំ២០១១ នេះ។ យ៉ាងនេះក្ដី កាលពីខែធ្នូកន្លងទៅនេះ លោកធ្លាប់បានបញ្ជាក់ប្រាប់វិទ្យុអាស៊ីសេរីថា អាជ្ញាធរខេត្តតែងតែណែនាំឲ្យអាជ្ញាធរមូលដ្ឋានអប់រំប្រជាពលរដ្ឋ នៅតាមភូមិឃុំស្រុកជាប់និងព្រំដែនលាវ ឲ្យបញ្ឈប់ការលូចឆ្លងដែនទៅប្រកបរបរខុសច្បាប់ក្នុងដីលាវតទៅ ទៀត និងដាក់វិធានការណ៍ឲ្យតម្រួតព្រំដែនការពារហ្មត់ចត់ មិនឲ្យអ្នកភូមិលូចឆ្លងដែនខុសច្បាប់បានតទៅទៀត ៖ "រវល់តែ ធ្វើអាមុនហ្នឹង មិនទាន់រូចផង មានអ្នកផ្សេងទៅទៀត។ រឿងហ្នឹងយើងធ្លាប់មានអ៊ីចឹងជាបន្តបន្ទាប់ហើយ។កុំឲ្យវាប្រញាប់ ពេក ពីព្រោះវាគ្មានការចោទប្រកាន់គ្នាខាងផ្នែកនយោបាយអីទេ។ រឿងហ្នឹងវាអត់មែនជារឿងអីយើងប្រឈមទេ គ្រាន់តែយើងត្រូវធ្វើការជាមួយគេ ដើម្បីឲ្យមនុស្សហ្នឹងថ្ងៃក្រោយទៅកុំឲ្យវាមានការធ្វេសប្រហែសដើរ ហួសជ្រុលជ្រួសអ៊ីចឹងទៅណា"។
អ្នកសម្របសម្រួលសមាគមការពារសិទ្ធិមនុស្សអាដហុកខេត្តស្ទឹងត្រែង លោក ឆាយ រេត បានធ្វើការកត់សម្គាល់ថា ពលរដ្ឋលាវ និងខ្មែរនៅជាប់តំបន់ព្រំដែនតែងលូចឆ្លងដែនទៅវិញទៅមក ដើម្បីកាប់ឈើ ប្រមាញ់សត្វព្រៃ ឬធ្វើជំនួញគ្រឿងញៀនឆ្លងដែន ហើយក៏ត្រូវតម្រួតព្រំដែនប្រទេសទាំងពីរចាប់ខ្លួនដូចគ្នា។ លោកបន្តថា អាជ្ញាធរព្រំដែនខ្មែរតែងតែចាប់ពលរដ្ឋលាវឆ្លងដែនមកកាប់ឈើ ឬប្រមាញ់សត្វក្នុងដីខ្មែរ តែមិនបានបាញ់សម្លាប់ ឬប្រើអំពើហិង្សាអ្វីទេ តែងតែធ្វើការអប់រំ ហើយដោះលែងឲ្យមានសេរីភាពវិញ ៖ "ការសម្លាប់មនុស្ស ទោះបីគាត់ឆ្លងដែនខុសច្បាប់ក៏ជារឿងមួយហើយតែបើយើងចាប់បាន យើងត្រូវតែដាក់ទោសទណ្ឌទៅតាមច្បាប់ទៅ យើងកុំបាញ់សម្លាប់មនុស្សអី មើលតែសត្វធាតុអ៊ីចឹង។ ហើយម៉្យាងទៀតខេត្ត និងខេត្តហ្នឹង គួរសហការគ្នារបៀបយ៉ាងម៉េច ដើម្បីបញ្ជូនមកវិញ កុំឲ្យមានការធ្វើទារុណកម្ម ឬក៏ចាប់អីខុសច្បាប់អនុញ្ញាត ហើយបើសម្លាប់វិញវាខុសទាំងស្រុងតែម្ដង"។
សេចក្ដីរាយការណ៍ពីមន្ត្រីអាជ្ញាធរខេត្តស្ទឹងត្រែងឲ្យដឹងថា ចាប់ពីខែវិច្ឆិកា ឆ្នាំ២០១០ រហូតមកទល់នឹងខែកុម្ភៈ ឆ្នាំ២០១១ មានពលរដ្ឋខ្មែរ ២១នាក់ ត្រូវតម្រួតព្រំដែនប្រទេសលាវចាប់ឃុំខ្លួននៅទឹកដីលាវ អស់រយៈពេលជាង ២ខែ ពីបទឆ្លងដែនចូលដីលាវខុសច្បាប់ ក៏ប៉ុន្តែអ្នកទាំងអស់នោះបានដោះលែងអស់វិញហើយ បន្ទាប់ពីសមត្ថកិច្ចនៃអាជ្ញាធរខេត្តស្ទឹងត្រែងបានស្នើសុំពួកគេ មកវិញ ដើម្បីធ្វើការអប់រំ និងធ្វើកិច្ចសន្យាឈប់ចូលទៅទឹកដីលាវខុសច្បាប់បន្តទៀត។ ក្នុងនោះដែរក៏មានពលរដ្ឋខ្មែរម្នាក់ មកពីខែត្រស្វាយរៀងត្រូវគេបាញ់សម្លាប់ ហើយអ្នកភូមិមកពីខេត្តក្រចេះពីនាក់ ត្រូវបាញ់ឲ្យរងរបួស និងរាប់សិបនាក់ទៀតបានរត់រួចខ្លួន ដោយសារតែឆ្លងដែនចូលដីលាវ៕ ពីវិទ្យុ អាស៊ីសេរី
No comments:
Post a Comment
yes