ពលករម្នាក់រត់គេចពីការឃុំឃាំងដោយលោត
ពីអគារជាន់ទី៣
CLEC Photo៣-មីនា-២០១១: ស្ត្រីពលករឈ្មោះ ហេង ហាក់ ដែលបាន
លោតចេញពីអគារក្រុមហ៊ុន ព្រោះចង់ជួបក្រុមគ្រួសារ
សម្រាកព្យាបាលនៅមន្ទីរពេទ្យលោកសង្ឃ រាជធានីភ្នំពេញ។
ស្ត្រីជាពលករចំណាកស្រុកអាយុ ៣១ឆ្នាំមួយរូប ដែលត្រូវបានក្រុមហ៊ុនឈ្មោះ ធី អែន ភី (T&P Co., Ltd.) ឃុំឃាំងរយៈពេលជាច្រើនខែមកហើយនោះ បានសម្រេចចិត្តលោតចេញពីអគារផ្ទះល្វែងកម្ពស់ ៣ជាន់ បណ្ដាលឲ្យបាក់ជើងទាំង២ ហើយកំពុងតែរងការសង្គ្រោះជាបន្ទាន់ សម្រាកព្យាបាលនៅក្នុងមន្ទីរពេទ្យលោកសង្ឃ នៅក្នុងទីក្រុងភ្នំពេញ។
ពលកររូបនេះត្រូវបានក្រុមហ៊ុនជ្រើសរើសត្រៀមចេញទៅប្រទេសម៉ាឡេស៊ី ដើម្បីស្វែងរកការងារធ្វើ។
ការលោតនោះបានធ្វើឡើងកាលពីយប់ថ្ងៃទី១ ខែមីនា ដោយសារតែលោកស្រីនឹកកូនពេក ប៉ុន្តែក្រុមហ៊ុនមិនអនុញ្ញាតឲ្យមានសេរីភាពចេញពីកន្លែងស្នាក់នៅទេ បើទោះបីជាពលកររូបនេះ បានសុំការអនុញ្ញាតជាច្រើនដងកន្លងមកចំនួនជាង ៥ខែមកហើយ។
ពលករឈ្មោះ ហេង ហាក់ អាយុ ៣១ឆ្នាំមកពីស្រុកបាកាន ខេត្តពោធិ៍សាត់ កំពុងតែសម្រាកព្យាបាលនៅក្នុងមន្ទីរពេទ្យលោកសង្ឃ បានថ្លែងប្រាប់វិទ្យុអាស៊ីសេរី តាមទូរស័ព្ទមកថា លោកស្រីលែងចង់ទៅប្រទេសម៉ាឡេស៊ី ទៀតហើយ ៖ «ខ្ញុំក្រ ខ្ញុំកូនកំព្រា ក្រហើយមេម៉ាយ ហើយអត់មានផ្ទះនៅអត់មានដីនៅ។ កូន២ ដើរសុំផ្ទះគេនៅ»។
ឯកសារបញ្ជីរបស់សមាគមភ្នាក់ងារជ្រើសរើសពលករកម្ពុជា បានឲ្យដឹងថា ក្រុមហ៊ុន ធី អែន ភី មានអាជ្ញាប័ណ្ណពីលេខ៣០៦ ប.វ /ប្រ.ក។
វិទ្យុអាស៊ីសេរី បានទាក់ទងតំណាងក្រុមហ៊ុននេះ ដើម្បីសុំការបំភ្លឺ ប៉ុន្តែតំណាងក្រុមហ៊ុនបានបិទទូរស័ព្ទជាបន្ទាន់ ហើយលែងឆ្លើយទូរស័ព្ទតែម្ដង នៅពេលបានព្យាយាមទាក់ទងជាថ្មី។
មន្ត្រីអ្នកនាំពាក្យនៃអគ្គស្នងការដ្ឋាននគរបាលជាតិកម្ពុជា លោកឧត្ដមសេនីយ៍ឯក គៀត ច័ន្ទថារិទ្ធ បានមានប្រសាសន៍ថា រឿងនេះធ្ងន់ធ្ងរ ចាំបាច់មានការស៊ើបអង្កេត ៖ «បើសិនជាករណីហ្នឹង មានការឃាត់ឃាំងគាត់ទុករហូតដល់គាត់សុំទៅសួរសុខទុក្ខក្រុម គ្រួសារម្ដងជា ២ដង មិនឲ្យរហូតដល់គាត់បានដាច់ចិត្តលោតបាក់ជើង។ យើងគិតថា ការស៊ើបអង្កេត និងត្រូវធ្វើហើយ។ ខ្ញុំគិតថា នៅមូលដ្ឋានប្រហែលជាគេធ្វើហើយ»។
មន្ត្រីកម្មវិធីផ្នែកសិទ្ធិការងារនៃមជ្ឈមណ្ឌលអប់រំច្បាប់សម្រាប់ សហគមន៍ លោក ហ៊ុយ ពេជ្យសុ វណ្ណ ដែលបានចុះទៅជួបស្ត្រីរងគ្រោះ បានមានប្រសាសន៍ថា លោកនឹងបន្តស្វែងរកការពិតជុំវិញរឿងនេះ ៖ «ធ្វើការ ជាមួយអង្គការដៃគូ ហើយនិងក្រសួងពាក់ព័ន្ធក្នុងការចេញអាជ្ញាប័ណ្ណ ឬ License ឲ្យក្រុមហ៊ុន ដើម្បីជំរុញឲ្យមានការអនុវត្តឲ្យបានត្រឹមត្រូវ»។
មន្ត្រីជាន់ខ្ពស់ក្រសួងការងារ និងបណ្ដុះបណ្ដាលវិជ្ជាជីវៈ បានឲ្យដឹងថា មានពលករចំណាកស្រុកកម្ពុជា នៅប្រទេសម៉ាឡេស៊ី ចំនួនជាង ៤០.០០០នាក់។
ក្រុមសកម្មជនការពារសិទ្ធិមនុស្ស និងមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ សរុបជាង ៤០នាក់ បានជួបប្រជុំគ្នា នៅថ្ងៃទី៣ ខែមីនា ដើម្បីស្វែងរកយន្តការការពារពលករចំណាកស្រុក និងប្រឆាំងអំពើជួញដូរមនុស្សកម្លាំងពលកម្ម និងការកេងប្រវ័ញ្ចកម្លាំងពលកម្ម៕ ពីវិទ្យុ អាស៊ីសេរី
No comments:
Post a Comment
yes