ឧត្តមសេនីយ៍ឈុំ សុជាតិៈថៃដើរផ្ទុយពីឆន្ទៈ
សហគមន៍អន្តរជាតិ
ម ន្ត្រីអ្នកនាំពាក្យក្រសួងការពារជាតិកម្ពុជាបានថ្លែងថាថៃបានព្យាយាមអូសបន្លាយសភាពការណ៍ និងព្យាយាមរារាំងក្រុមសង្កេតការណ៍អាស៊ាន មិនអោយធ្វើដំណើរមកកាន់ព្រំប្រទល់កម្ពុជាថៃ។
ប្រតិកម្មរបស់មន្ត្រីអ្នកនាំពាក្យក្រសួងការពារជាតិលោក ឧត្តមសេនីយ៍ ឯក ឈុំសុជាតិ បានធ្វើឡើងនៅគ្រាដែលថៃគេចវេះមិនតបឆ្លើយចំពោះសំណើបែបបទការងាររបស់ប្រទេសឥណ្ឌូណេស៊ីដែលបានសរសេរទៅប្រទេសថៃ តបនឹងឆន្ទៈរបស់ថៃនិងកម្ពុជាដែលមានបំណងចង់អោយមានអ្នកសង្កេតការណ៍អាស៊ានទៅសង្កេតស្ថានការណ៍នៅតាមព្រំប្រទល់កម្ពុជានិងថៃនិងការ ឈប់បាញ់គ្នា។
សូមជំរាបថា ឆន្ទៈចង់បានក្រុមសង្កេតការណ៍ឥណ្ឌូណេស៊ីនិងការឈប់បាញ់គ្នានៅតំបន់ប្រាសាទព្រះវិហារគឺជាឆន្ទៈឯកភាពធ្វើឡើងដោយប្រទេសកម្ពុជានិងថៃក្នុងកិច្ចប្រជុំរដ្ឋមន្ត្រីក្រសួងការបរទេសអាស៊ានថ្ងៃទី២២កុម្ភៈ ក្នុងក្រុងហ្សាកាតាប្រទេសឥណ្ឌូណេស៊ី។ ប៉ុន្តែក្រោយដែលឥណ្ឌូណេស៊ីដែលជាប្រធានអាស៊ាន នាបច្ចុប្បន្នបានដាក់សំណើបែបបទទៅអោយថៃដើម្បីរកការឆ្លើយតបជាវិជ្ជមានប្រទេសថៃត្រូវគេរាយការណ៍ថាបានរារាំងកិច្ចការរកសន្តិភាពនោះទៅវិញ។ មេបញ្ជាការកងទ័ពជើងគោកថៃលោកប្រាយុទ្ធចាន់អូចា បានថ្លែងថាថៃមិនទាន់សម្រេចយ៉ាងណាចំពោះសំណើបែបបទ របស់ប្រទេសឥណ្ឌូណេស៊ីនោះទេ ដោយថៃចង់ធ្វើការពិភាក្សាបញ្ហាបែបបទនោះជាមួយកម្ពុជាក្នុងកិច្ចប្រជុំគណៈកម្មាធិការព្រំដែនទូទៅ GBC ដែលថៃនិយាយថានឹងគ្រោងធ្វើនៅក្នុងខែមិថុនាខាងមុខនេះ។មន្ត្រីអ្នកនាំពាក្យក្រសួងការពារជាតិ លោក ឧត្តមសេនីយ៍ឯកឈុំសុជាតិបានប្រាប់ឲ្យដឹងថាកន្លងមកកិច្ចប្រជុំរបស់ក្រុមប្រឹក្សាសន្តិសុខអង្គការសហប្រជាជាតិ បានស្វាគមន៍ចំពោះតួនាទីអាស៊ានដើម្បីធ្វើការដោះស្រាយបញ្ហារវាងកម្ពុជានិងថៃនិងស្នើសុំអោយមានការបញ្ឈប់ការបាញ់គ្នាជាអចិន្ត្រៃយ៍។
លោកឧត្តមសេនីយ៍ឯកឈុំសុជាតិបានបន្តថាក្រោយមកកិច្ចប្រជុំរបស់រដ្ឋមន្ត្រីក្រសួងការបរទេសអាស៊ានថ្ងៃទី២២កុម្ភៈ បានធ្វើឡើងនិងបានដាក់ចេញទី១ គាំទ្រការប្តេជ្ញាចិត្តកម្ពុជាថៃមិនអោយមានការផ្ទុះអាវុធ និងគាំទ្រការឈប់បាញ់គ្នា។ ចំណុចទី២ ស្វាគមន៍ប្រទេសកម្ពុជានិងថៃដែលអនុញ្ញាតអោយមានអ្នកសង្កេតការណ៍អាស៊ានទៅសង្កេតស្ថានការណ៍នៅតាមព្រំប្រទល់កម្ពុជានិងថៃ។ ចំណុចទី៣ កិច្ចប្រជុំគណៈកម្មការឬគណៈកម្មាធិការព្រំដែននានា JBC ឬ GBCត្រូវធ្វើដោយមានការចូលរួមពីប្រទេសអាស៊ាន។ លោកឧត្តមសេនីយ៍ឯកឈុំសុជាតិបានបញ្ជាក់ថា ការដែលថៃរារាំងមិនអោយមានការបញ្ជូនក្រុមសង្កេតការណ៍អាស៊ានទៅតំបន់ព្រំប្រទល់គឺជានយោបាយបិទទ្វាររារាំងមិនអោយសហគមអន្តរជាតិជួយធ្វើអន្តរាគមន៍និងបានដើរផ្ទុយពីសេចក្តីសម្រេចរបស់ក្រុមប្រឹក្សាសន្តិសុខអ. ស.ប និងស្មារតីសម្រេចរបស់កិច្ចប្រជុំរដ្ឋមន្ត្រីក្រសួងការបរទេសអាស៊ានថ្ងៃទី២២កុម្ភៈ៕
No comments:
Post a Comment
yes