រ៉ុង ឈុន ហៅការបង្ក្រាបរបស់អាជ្ញាធរ
ជារូបភាពដ៏អាក្រក់
លោក រ៉ុង ឈុន ក្នុងការដឹកនាំបាតុកម្មរបស់កម្មកររោងចក្រមិថុនា (រូប៖CEN)
ផែនការរបស់សហភាពសហជីពកម្ពុជាដែលថា នឹងនាំក្រុមកម្មកររោងចក្រមិថុនាដង្ហែក្បួនបាតុកម្មទៅកាន់ទីលាន សេរីភាពនៅព្រឹកមិញដើម្បីតវ៉ាទាមទារឲ្យថៅកែរោងចក្រផ្ដល់ប្រាក់ បំណាច់ឆ្នាំដល់ពួកគេឲ្យបានយ៉ាងហោចណាស់១រយដុល្លារក្នុងមួយ ឆ្នាំនោះត្រូវទទួលបរាជ័យ បន្ទាប់ពីមានការបង្រ្កាបយ៉ាងសាហាវពីសំណាក់ក្រុមសមត្ថកិច្ចរាប់ រយនាក់។ លោក រ៉ុង ឈុន បានហៅការ បង្រ្កាបនោះថា ជារូបភាពដ៏អាក្រក់បំផុត។
គ្រាន់តែរៀបចំប្រកូកប្រកាសចេញក្បួន ក្រុមនគរបាលបានស្ទុះមកហ៊ុមព័ទ្ធកម្មករដែលមានគ្នារាប់ពាន់នាក់ និងដណ្ដើមប្រតាយប្រតប់យកក្បាលមីក្រូពីលោក រ៉ុង ឈុន ដែលធ្វើឲ្យប្រធានសហភាពសហជីពរូបនេះរងរបួសត្រង់ដៃ។ ប៉ុន្ដែយ៉ាងណាក៏ដោយលោក រ៉ុង ឈុន ពុំមានគម្រោងប្ដឹងចំពោះបញ្ហានេះទេ ដោយគ្រាន់តែចាត់ទុកថា វាជាអំពើគួឲ្យអាម៉ាស់របស់អាជ្ញាធររដ្ឋាភិបាល។
លោក រ៉ុង ឈុន បានថ្លែងប្រាប់ទស្សនាវដ្ដីសារព័ត៌មានសេរីថា «ពួកអាជ្ញាធរបានត្រៀមចាំពួកខ្ញុំ ទុកដូចពួកខ្ញុំមិនមែនខ្មែរអញ្ចឹង, បើយើងមើលវាជារូបភាពអាក្រក់មែនទែន សឹងតែរកលេខដាក់គ្មាន»។
គួរបញ្ជាក់ថា រោងចក្រជូតិចថាយ៏ដែលគេស្គាល់ថា រោងចក្រមិថុនាមានទីតាំងនៅតាមបណ្ដោយផ្លូវសហភាពរុស្ស៊ី ក្នុងសង្កាត់ទឹកថ្លាខណ្ឌសែនសុខត្រូវបានបំផ្លាញដោយអគ្គីភ័យកាលពីចុងខែមិនាកន្លងទៅ។ មូលហេតុនេះបានក្លាយជាសំអាងដែលត្រូវបានភាគីរោងចក្រស្នើឲ្យ កម្មករទទួលយកប្រាក់បំណាច់ប្រចាំឆ្នាំរបស់ពួកគេត្រឹម២០ដុល្លារ ក្នុង១ឆ្នាំ។ ប៉ុន្តែភាគីកម្មករបានបដិសេធមិនទទួលយកឡើយ។ ដែលបង្កឲ្យមានការតវ៉ាទាមទារជាហូរហែ។
នៅព្រឹកមិញតាមគម្រោងលោក រ៉ុង ឈុន និងក្រុមកម្មករគ្រោងនាំញត្តិទៅកាន់ស្ថានទូតអាមេរិក និងសហគមន៍អឺរ៉ុបជាផ្នែកដាក់សម្ពាធក្នុងសកម្មភាពទាមទារឲ្យថៅកែ រោងចក្រផ្ដល់ប្រាក់បំណាច់ឆ្នាំ១រយដុល្លារសម្រាប់ឆ្នាំដែលពួកគេ បានបំរើការងារ។ ដោយលោក រ៉ុង ឈុន បានពន្យល់ដូច្នេះថា ការឆេះរោងចក្រវាបណ្ដាលមកពីការធ្វេសប្រហែសរបស់អ្នកគ្រប់គ្រងរោង ចក្រវាមិនមែនជាករណីប្រធានសក្ដិទេ, ករណីប្រធានសក្ដិលុះត្រាតែបណ្ដាលមកពីគ្រោះធម្មជាតិដូចជាទឹកជំនន់ គ្រោះរញ្ជួយដីជាដើមនោះ។ ដូច្នេះបញ្ហានេះភាគីរោងចក្រត្រូវតែដោះស្រាយប្រាក់បំណាច់ឆ្នាំឲ្យ ដល់កម្មករឲ្យបានសមរម្យតាមការទាមទារនេះ។ ដោយលោក រ៉ុង ឈុន បានព្រមានថា បើសិនជាភាគីរោងចក្រមិនដោះស្រាយឲ្យកម្មករទេ សហភាពសហជីពកម្ពុជានឹងមានវិធីជាច្រើនទៀតដើម្បីដាក់សម្ពាធដល់ភាគី រោងចក្រឲ្យឆ្លើយតបតាមការទាមទាររបស់ក្រុមកម្មករ៕
ពីគេហទំព័រ សារព័ត៌មានសេររី
No comments:
Post a Comment
yes