លោកស្រី យីង ឡាក់ និងលោក អាភីស៊ីត
ចុះសួរសុខទុក្ខភូមិជួបទឹកជំនន់
ទាំងមេដឹកនាំបក្សប្រជាធិបតេយ្យ និងជានាយករដ្ឋមន្ត្រីថៃ លោកអាភីស៊ីត វេចាជីវ៉ា និងជម្រើសនាយករដ្ឋមន្ត្រីរបស់បក្សភឿថៃ លោកស្រី យីងឡាក់ ស៊ីណាវ៉ាត្រា កាលពីថ្ងៃអង្គារបានប្រញាប់ប្រញាល់ចុះទៅសាកសួរសុខទុក្ខសហគមន៍ លិចទឹកជាច្រើនក្នុងខេត្តណាន។
ទឹកជំនន់មានភាពនឹងនរហើយ ប៉ុន្តែអាជ្ញាធរនៅបន្តឆ្លើយតប ថ្វីបើស្ថានភាពទឹកជំនន់នៅបន្តប៉ះពាល់ក្នុងស្រុកចំនួន ១៥ ដែលមុននេះត្រូវគេប្រកាសជាតំបន់គ្រោះមហន្តរាយក្ដី។
អាជ្ញាធរខេត្ត និងយោធាត្រូវបានបញ្ជូនទៅកាន់តំបន់មានគ្រោះថ្នាក់ខ្ពស់ជាច្រើន ដើម្បីបន្តផ្តល់ជំនួយភ្លាមៗដល់ពលរដ្ឋដែលត្រូវការជំនួយ។
សហគមន៍ពាណិជ្ជកម្មក្នុងតំបន់ បានថ្លែងថា ទឹកជំនន់បានបង្កការខូចខាតយ៉ាងធ្ងន់ធ្ងរក្នុងទំហំប៉ុននឹងទឹក ជំនន់ដ៏មហាសាល កាលពីឆ្នាំ ២០០៦។
លោកអាភីស៊ីតបានទៅដល់ព្រលានយន្តហោះខេត្តណានតាមឧទ្ធម្ភាគចក្រនៅ វេលាម៉ោងប្រមាណមួយរសៀលដើម្បីចុះសួរសុខទុក្ខជនរងគ្រោះ។
ប៉ុន្តែលោកមកដល់យឺតជាងលោកស្រីយីងឡាក់ដែលបានមកដល់ព្រលានយន្ត ហោះដដែលនេះតាមជើងយន្តហោះរត់ឈ្នួល ៩០នាទីមុន ដោយមានការទទួលស្វាគមន៍ពីសំណាក់អ្នកគាំទ្ររណសិរ្សរួបរួមដើម្បី លទ្ធិប្រជាធិបតេយ្យប្រឆាំងភាពផ្តាច់ការប្រមាណជាង ១០០ នាក់។
មុនពេលលោកអាភីស៊ីតមកដល់ បាតុករអាវក្រហមជាច្រើនដែលនៅរញ៉េរញ៉ៃក្រោយពីទទួលស្វាគមន៍ បេក្ខនារី បក្សភឿថៃ ត្រូវបានស្នើឲ្យចាកចេញពីព្រលានយន្តហោះនៅពេលភ្នាក់ងារប្រមាណ ៣០០នាក់ត្រូវពង្រាយផ្តល់សន្តិសុខសម្រាប់លោកនាយករដ្ឋមន្ត្រី។
លោកស្រីយីងឡាក់ បានចាកចេញពីព្រលានយន្តហោះតាមរយៈត្រាក់ទ័រមួយគ្រឿងដោយបើកនាំ មុខក្បួនយុទ្ធនាការឃោសនារបស់បក្សភឿថៃ ជាមួយក្រុមអ្នកគាំទ្រអាវក្រហមឈរតម្រៀបគ្នាជាជួរសងខាងផ្លូវ ឆ្ពោះទៅកាន់ក្រុងនោះ។
ពួកគេបានស្រែកអបអរសាទរ និងបក់ដៃដាក់លោកស្រី ខណៈក្បួននោះបានរំកិលទៅសួរសុខទុក្ខជនរងគ្រោះទឹកជំនន់ក្នុង ស្រុកមឿង។
ក្រោយមក លោកស្រីយីងឡាក់បានឡើងជិះទូកមួយគ្រឿងដើម្បីទៅពិនិត្យមើលសហគមន៍ ដែលរងគ្រោះដោយទឹកជំនន់ក្នុងស្រុកមឿង ហើយលោកស្រីត្រូវបានស្វាគមន៍យ៉ាងកក់ក្តៅពីសំណាក់អ្នកគាំទ្រលោក ស្រីនៅគ្រប់ទីកន្លែងដែលលោកស្រីបានចុះទៅដល់។
លោកអាភីស៊ីតដំបូងបានចុះទៅស្រុកវៀងសាជាតំបន់ដែលរងគ្រោះធ្ងន់ ធ្ងរបំផុតដោយសារទឹកជំនន់។ នៅទីនោះ លោកបានចុះលុយទឹកជំនន់ទៅសួរសុខទុក្ខអ្នកភូមិដែលរងផលប៉ះពាល់ ដែលក៏បានទទួលការរាក់ទាក់យ៉ាងកក់ក្តៅផងដែរ ដោយពួកគេជាច្រើននាក់បានស្វាគមន៍លោកដោយជូនផ្កា។
ក្រោយមក លោកបានបន្តដំណើរទៅស្រុកមឿងដើម្បីស្តាប់ការពន្យល់សង្ខេបពីអាជ្ញាធរ អំពីគ្រោះទឹកជំនន់នេះ។
មុនពេលមកដល់ខេត្តណាន អាភីស៊ីតបានបញ្ជាឲ្យអាជ្ញាធរពាក់ព័ន្ធចុះធ្វើការអង្កេតលើការ ខូចខាតនៅតាមបណ្តាខេត្តភាគខាងជើង៕ CR
ពីគេហទំព័រ៖ ភ្នំពេញប៉ុស្តិ៏
No comments:
Post a Comment
yes