លោក ហោ ណាំហុង ប្រាប់ទូតថៃពីសារសំខាន់
នៃការដោះស្រាយបញ្ហាដោយសន្តិវិធី
ដោយ : រតនាភ្នំពេញ: នៅក្នុងជំនួបសន្ទនាគ្នានៅព្រឹកថ្ងៃទី១០មិថុនានេះ លោកឧបនាយករដ្ឋមន្ត្រី ហោ ណាំហុងបានប្រាប់ឯកអគ្គរាជទូតថៃថ្មី លោក សំពង់ សាងហ្គាន់ប៊ុន អំពីសារសំខាន់នៃការដោះស្រាយបញ្ហាដោយសន្តិវិធីរវាងប្រទេសទាំងពីរ ហើយលោកទូតថៃបានឯកភាពតាមប្រសាសន៍របស់ប្រមុខការទូតកម្ពុជា។
លោកទូតថៃបានចូលជួបសម្តែងការគួរសម និងពិភាក្សាការងារជាមួយលោកឧបនាយករដ្ឋមន្ត្រីហោ ណាំហុង រដ្ឋមន្ត្រីការបរទេសកម្ពុជានៅឯទីស្តីការក្រសួងការបរទេស។ នៅក្នុងជំនួបនោះ ក៏មានការពិភាក្សាអំពីបញ្ហាកម្ពុជានិងថៃជាច្រើនដែរ។ លោកកុយ គួង អ្នកនាំពាក្យក្រសួងការបរទេសកម្ពុជាបាននិយាយប្រាប់អ្នកកាសែតក្រោយ ជំនួបថា លោកឧបនាយករដ្ឋមន្ត្រីហោ ណាំហុង បានបញ្ជាក់ប្រាប់ទូតថៃអំពីភាពចាំបាច់នៃការដោះស្រាយបញ្ហាដោយសន្តិវិធី។
លោកហោ ណាំហុង ប្រាប់ទូតថៃថា ការណ៍ដែលកម្ពុជាដាក់ពាក្យបណ្តឹងទៅតុលាការឡាអេក៏ជាដំណោះស្រាយដោយ សន្តិវិធីដែរ។ លោកលើកឡើងទៀតថា មិនត្រូវធ្វើឲ្យបញ្ហាព្រំដែនរាលដាលទៅជាបញ្ហាផ្សេងទៀតទេ។ លោកប្រមុខការទូតកម្ពុជាបានស្នើថា ក្នុងនាមមេដឹកនាំកម្ពុជានិងថៃត្រូវមើលឲ្យបានឆ្ងាយហួសពីបញ្ហា ព្រំដែនពោលគឺត្រូវមើលទៅអនាគតវែងឆ្ងាយ។ កម្ពុជាមានគោលជំហរបង្រួមទំនាស់និងពង្រីកកិច្ចសហប្រតិបត្តិការ។
បើយោងតាមលោកកុយ គួង លោកហោ ណាំហុង ក៏បានលើកឡើងពីកិច្ចព្រមព្រៀងជាកញ្ចប់ដែលសម្រេចបានកាលពីថ្ងៃទី៩ ឧសភា នៅទីក្រុងហ្សាការតារវាងរដ្ឋមន្ត្រីការបរទេសកម្ពុជា ថៃនិងឥណ្ឌូនេស៊ីដែលមានគោលដៅជំរុញឲ្យប្រទេសទាំងពីរទទួលយក អ្នកសង្កេតការណ៍មកត្រួតពិនិត្យការឈប់បាញ់នៅតំបន់ព្រំដែនពីព្រោះថា នៅរាល់ពេលមានបញ្ហា ភាគីទាំងពីរតែងចោទគ្នាទៅវិញទៅមកថាជាអ្នកបង្កហេតុ។
លោកឧបនាយករដ្ឋមន្ត្រីហោ ណាំហុង បញ្ជាក់ថា កម្ពុជាបានត្រៀមរួចរាល់ និងបានបំពេញរាល់លក្ខខណ្ឌទាំងអស់ស្តីពីអ្នកសង្កេតការណ៍ គឺនៅតែភាគីថៃតែប៉ុណ្ណោះ។ ប្រមុខការទូតកម្ពុជាបញ្ជាក់ជាថ្មីទៀតថា កិច្ចប្រជុំគណៈកម្មការព្រំដែនទូទៅ GBC និងកិច្ចប្រជុំគណៈកម្មការព្រំដែនចម្រុះកម្ពុជាថៃ JBC មិនអាចធ្វើបានទេដរាបណាថៃមិនទាន់ទទួលយកវិធានការកញ្ចប់ដែលសម្រេច បានកាលពីថ្ងៃទី៩ ឧសភាទេនោះ។
ជាការឆ្លើយតប លោកទូតថៃបានឯកភាពទាំងស្រុងចំពោះការលើកឡើងរបស់ម្រមុខការទូត កម្ពុជា។ ប៉ុន្តែ គេមិនដឹងថា ថៃនឹងព្រមអនុវត្តដែរឬយ៉ាងណាទេ៕
ពីគេហទំព័រ៖ CEN
No comments:
Post a Comment
yes