យីង ឡាក់ ជំរុញឲ្យអាប់ភីស៊ីតឃោសនាក្នុងន័យស្ថាបនា
នៅពេលត្រូវបានសាកសួរនូវអ្វីដែលលោកស្រីគិតពិចារណាអំពីគណបក្ស ប្រជាធិបតេយ្យ ដែលបានផ្លាស់ប្តូរទីកន្លែងធ្វើយុទ្ធនាការឃោសនាបោះឆ្នោតរបស់ខ្លួន ពីជិតសាលារាជធានី ទៅកាន់សង្កាត់រ៉ាត់ចាប្រាសុងដែលជាតំបន់ពាណិជ្ជកម្មដ៏សំខាន់នោះ លោកស្រី យីងឡាក់ បានថ្លែងថា នោះគឺជាយុទ្ធសាស្ត្រធ្វើការឃោសនារបស់គណបក្សនយោបាយនីមួយៗ ហើយខ្លួនលោកស្រីផ្ទាល់ក៏ចង់ឃើញយុទ្ធនាការឃោសនាប្រព្រឹត្តទៅ ក្នុងន័យស្ថាបនាផងដែរ។
លោកស្រី យីងឡាក់ មានប្រសាសន៍ថា លោកស្រីមិនព្រួយបារម្ភថា យុទ្ធនាការឃោសនានៅសប្តាហ៍នេះរបស់គណបក្សប្រជាធិបតេយ្យនៅតំបន់ រ៉ាត់ចាប្រាសុងនោះ នឹងប៉ះពាល់ដល់សម្លេងឆ្នោតរបស់គណបក្សលោកស្រីនៅក្នុងការបោះ ឆ្នោតឡើយ ពីព្រោះ អ្នកបោះឆ្នោត គឺជាអ្នកសម្រេចចិត្តថា តើគណបក្សណាដែលពួកគេចង់ឲ្យគ្រប់គ្រងប្រទេស។
គណបក្សប្រជាធិបតេយ្យ បាននិយាយកាលពីថ្ងៃម្សិលមិញថា ខ្លួននឹងរៀបចំនូវយុទ្ធនាការឃោសនាបោះឆ្នោតដ៏ធំមួយនៅថ្ងៃ ព្រហស្បតិ៍ខាងមុខនេះ នៅសង្កាត់ពាណិជ្ជកម្មរ៉ាត់ចាប្រាសុង។
រ៉ាត់ចាប្រាសុង គឺជាសង្កាត់ពាណិជ្ជកម្មកណ្តាលរាជធានីបាងកក និងជាទីកន្លែងធ្វើបាតុកម្មធំរបស់រណសិរ្សរួបរួមដើម្បីលទ្ធិ ប្រជាធិបតេយ្យប្រឆាំងនឹងរបបផ្តាច់ការ (UDD) ឬអាវក្រហម នៅអំឡុងពេលបាតុកម្មរបស់ពួកគេប្រឆាំងនឹងរដ្ឋាភិបាលនាយករដ្ឋ មន្ត្រី អាភីស៊ីត កាលពីឆ្នាំ២០០៩។
មនុស្សដល់ទៅ ៩១នាក់ ត្រូវបានគេសម្លាប់ និងជាង ១៩០០នាក់ បានរងរបួសនៅអំឡុងពេលនៃការប្រឈមមុខដាក់គ្នាកាលពីខែមីនា ដល់ខែឧសភា រវាងកម្លាំងសន្តិសុខ និងក្រុមបាតុករអាវក្រហម ដែលជាអ្នកគាំទ្រគណបក្សភឿថៃ។
ខណៈពេលការបោះឆ្នោតកំពុងតែរំខិលខិតចូលមកដល់ បណ្តាញប្រជាជនដើម្បីការបោះឆ្នោតនៅថៃ (P-NET) កំពុងតែរៀបចំកិច្ចពិភាក្សាមួយនៅក្នុងនោះ មេដឹកនាំនៃបណ្តាគណបក្សនយោបាយ ដែលកំពុងប្រកួតប្រជែងគ្នានៅក្នុងការបោះឆ្នោតនេះ នឹងត្រូវបានគេអញ្ចើញឲ្យចូលរួមកិច្ចពិភាក្សានេះ។
ដោយសារលោកស្រី យីងឡាក់ មានពេលមមាញឹកពេក គណបក្សភឿថៃបានសម្រេចបញ្ជូនលោក អូឡាន ឆៃប្រាវ៉ាត់ អតីតនាយករដ្ឋមន្ត្រី និងជាអតីតនាយកធនាគារពាណិជ្ជកម្មសៀម ឲ្យចូលរួមក្នុងកិច្ចពិភាក្សានេះ ក្នុងនាមគណបក្ស។
ប៉ុន្តែ P-NET បាននិយាយថា លោក អូឡាន មិនអាចធ្វើការសន្យាណាមួយទៅកាន់សាធារណជនក្នុងនាមគណបក្សបានឡើយ ហើយបានបដិសេធទទួលយកគាត់ធ្វើជាតំណាង។ លោកស្រី យីងឡាក់ ទោះជាយ៉ាងណា បាននិយាយថា លោក អូឡាន គឺជាសមាជិកនៃក្រុមការងារសេដ្ឋកិច្ចរបស់បក្ស ហើយក៏ជាសមាជិកប្រតិបត្តិមួយរូបផងដែរ ដូច្នេះ គាត់គឺជាមនុស្សសាកសមម្នាក់សម្រាប់ឡើងជជែកសម្រាប់គណបក្សលោក ស្រី។
ខណៈពេលនេះដែរ នាយករដ្ឋមន្ត្រីចាំផ្ទះ អាភីស៊ីត វេចាជីវ៉ា មេដឹកនាំគណបក្សប្រជាធិបតេយ្យ នៅថ្ងៃនេះ បានរៀបចំនូវយុទ្ធនាការឃោសនាមួយនៅខេត្តសមុទ្រប្រាកាន នៅជាប់នឹងរាជធានីបាងកក។ នៅអំឡុងដំណើរទៅកាន់ខេត្តនេះ សមាជិកក្រុមអាវក្រហមបានរៀបចំលើកស្លាកជាច្រើន ដែលបានរិះគន់ការដឹកនាំប្រទេសដោយរដ្ឋាភិបាលចម្រុះរបស់គាត់។
គ្មានអំពើហិង្សាណាមួយត្រូវបានគេរាយការណ៍ឡើយ ខណៈពេលពប៉ូលិសត្រូវបានគេដាក់ពង្រាយពេញផ្លូវ និងផ្តល់សុវត្ថិភាពសម្រាប់លោក អាភីស៊ីត និងក្រុមឃោសនារបស់លោក ដែលធ្វើដំណើរតាមរថយន្ត។
លោក អាភីស៊ីត ក្រោយមកបានថ្លែងប្រហែល ២០នាទីនៅទីផ្សារនៅខេត្តនេះ។ លោកបានពន្យល់ពីគោលនយោបាយរបស់គណបក្សគាត់ និងមធ្យោបាយដើម្បីដោះស្រាយតម្លៃម្ហូបអាហារ។
អាភីស៊ីត ក៏បានជំរុញឲ្យប្រជាពលរដ្ឋបោះឆ្នោតជូនបេក្ខជនគណបក្សរបស់លោក ដើម្បីឲ្យគណបក្សលោកអាចបង្កើតរដ្ឋាភិបាល បន្ទាប់ពីការបោះឆ្នោត និងបន្តការងារលើគម្រោងនានា ដែលកំពុងតែអូសបន្លាយពេល៕ ប្រែសម្រួល ឌិត សុខធី
ពីគេហទំព័រ៖ ភ្នំពេញប៉ុស្តិ៏
No comments:
Post a Comment
yes