អ្នកបឹងកក់ទាមទារឲ្យសាលាក្រុងដាក់បញ្ចូលតំណាងអ្នកភូមិ៦រូបក្នុងអនុគណៈកម្មការវាស់វែងដីធ្លីតំបន់បឹងកក់
ផ្ទះអ្នកបឹងកក់ដែលត្រូវបូមខ្សាច់ពន្លិចដោយក្រុមហ៊ុនស៊ូកាគូអ៊ីន
ក្នុងសន្និសីទកាសែតនៅព្រឹកថ្ងៃចន្ទ ក្រុមប្រជាពលរដ្ឋសហគមន៍បឹងកក់បាន សម្តែងការមិនយល់ស្របចំពោះគណៈ កម្មការរបស់សាលាក្រុងភ្នំពេញក្នុងការចុះវាស់វែងដីធ្លីសម្រាប់ ការអភិវឌ្ឍន៍នៅតំបន់បឹងកក់ដោយថា ការវាស់វែងមិនមានតម្លាភាព ហើយបានស្នើសុំដាក់បញ្ចូលតំណាងពលរដ្ឋចំនួន៦រូបទៅក្នុងអនុ គណៈកម្មការនោះ។
តំណាងប្រជាពលរដ្ឋសហគមន៍បឹងកក់ម្នាក់បាននិយាយថា ពួកគេនឹងដាក់លិខិតនៅថ្ងៃទៅសាលាក្រុងភ្នំពេញ ស្នើសុំឲ្យមានតំណាងអ្នកភូមិ៦រូបបានចូលរួមនៅក្នុងគណៈកម្មការ វាស់វែងដីធ្លីសម្រាប់ការអភិវឌ្ឍន៍នៅតំបន់បឹងកក់ ដើម្បីឲ្យការវាស់វែងនេះមានតម្លាភាព។
កាលពីរសៀលថ្ងៃទី០៩ មិថុនា អាជ្ញាធរក្រុងភ្នំពេញបានចាប់ផ្តើមធ្វើការវាស់វែងទៅលើលំនៅដ្ឋាន ប្រជាពលរដ្ឋអ្នកបឹងកក់ចាប់ពីភូមិ៦ទៅ។ ប៉ុន្តែប្រជា ពលរដ្ឋបានសម្តែងការមិនពេញចិត្ត ដោយថា ការវាស់វែងរបស់គណៈកម្មការមិនមានលក្ខណៈច្បាស់លាស់។
លោក ហេង សុខវៀង អ្នកភូមិ៦ក្នុងតំបន់បឹងកក់បាននិយាយថា គាត់មិនពេញចិត្តចំពោះគណៈកម្មការចុះវាស់វែងនេះឡើយ ដោយពួកគេវាស់វែងទំហំដីផ្ទះគាត់ និងថតរូបគាត់មុខផ្ទះ ព្រមទាំងឲ្យគាត់ផ្តិតមេដៃលើលិខិតបញ្ជាក់ដែលសរសេរតែលេខកូដផ្ទះ និងសុំស្នាមមេដៃពីម្ចាស់ផ្ទះ។ ប៉ុន្តែទោះជាយ៉ាងណាក៏ដោយអ្នកភូមិបានផ្តិតមេដៃ ប៉ុន្តែបានសរសេរបន្ថែមលើលិខិតនោះថា «ខ្ញុំសុំអភិវឌ្ឍន៍ជាផ្ទះល្វែងផ្ទាល់ដីទំហំ ៤x៦ម៉ែត្រ និងមានកម្មសិទ្ធិស្របច្បាប់»៕
ពីគេហទំព័រ៖ សារព័ត៌មានសេរី
No comments:
Post a Comment
yes