រអិលបាក់ដីនៅកូរ៉េខាងត្បូងសម្លាប់មនុស្ស២២នាក់
ក្រុងឈុនឈិនៈ ក្រុមមន្រ្តី បាននិយាយថា ការរអិលបាក់ដី ដែលបង្កមកពីភ្លៀងធ្លាក់ខ្លាំងនៅតំបន់រមណីយដ្ឋានភ្នំកូរ៉េខាងត្បូងមួយកន្លែងនៅខាងកើតក្រុងសេអ៊ូលកាលពីព្រលឹមថ្ងៃពុធ ដោយបានបំផ្លាញអគារ៤ខ្នង ក្នុងនោះមានសណ្ឋាគារតូចពីរ និងបានធ្វើឲ្យមនុស្សយ៉ាងតិច២២នាក់ស្លាប់។
អាកាសធាតុអាក្រក់ បានវាយប្រហារឧបទ្វីបនេះតាំងពីរាត្រីថ្ងៃអង្គារ ដោយបង្កឲ្យមានទឹកជំនន់ជាទូទៅ និងមានការពន្យារពេលក្នុងការដឹកជញ្ជូន រីឯតម្លៃផ្សារហ៊ុនរបស់ក្រុមហ៊ុនធានារ៉ាប់រង បានធ្លាក់ ដោយបារម្ភថាតម្លៃនៃការខូចខាតនឹងមានរាប់លានដុល្លារ។
នៅឯក្រុងឈុនឈិន ចម្ងាយប្រមាណ១០០គ.មខាងកើតក្រុងសេអ៊ូល ក្រុមជួយសង្គ្រោះ នៅតែកំពុងកកាយរុករកក្នុងកម្ទេចកម្ទីបាក់បែកលាយភក់នៃសណ្ឋាគារភោជនីយដ្ឋាននិងហាងកាហ្វេដើម្បីរកមនុស្សដែលបាត់ខ្លួន។
និស្សិត លី បើនសឺក បានប្រាប់ទូរទស្សន៍ក្នុងស្រុកមួយថា៖«យើងកំពុងតែដេកលក់ ហើយភ្លាមៗនោះ ខ្ញុំបានឮសំឡេងខ្លាំង មួយ ហើយបន្ទាប់មកពិតានក៏បានបាក់ធ្លាក់»។
អ្នកស្រុកម្នាក់ បានរាយការណ៍ថា សំឡេងនោះឮដូចជារថភ្លើង។
អ្នកស្រី បានបញ្ជាក់ថា៖ «បន្ទាប់មក ខ្ញុំបានឮម្នាក់ស្រែកថា «ជួយខ្ញុំផង»។ ដូច្នោះខ្ញុំក៏បានចេញទៅក្រៅមើល ហើយខ្ញុំបានឃើញការរអិលបាក់ដីមួយបានវាយប្រហារទូទាំងតំបន់នេះ»។
ក្រុមមន្រ្តីនិយាយថា មនុស្សប្រមាណ២៤នាក់ បានរងរបួសនៅពេលជញ្ជាំងភក់ បានបុកចូលអគារជាច្រើន នៅក្បែរទំនប់ទន្លេ សូយ៉ាង បន្ទាប់ពីពាក់កណ្តាលអធ្រាត្របន្តិច។
របាយការណ៍ប្រព័ន្ធឃោនាក្នុងស្រុក បានរាយការណ៍ថា និស្សិតមហាវិទ្យាល័យ៣៥នាក់ និងភ្ញៀវទេសចរប្រមាណ៤០នាក់ កំពុងស្នាក់នៅសណ្ឋាគារតូចៗនោះ។
រយៈពេល២៤ម៉ោងកន្លងទៅនេះ កម្រិតទឹកភ្លៀងកម្ពស់ ៤០០ម.ម បានធ្លាក់នៅឯក្រុងសេអ៊ូល ដោយបណ្តាលឲ្យមានទឹកជំនន់ភ្លាមៗ ពីការរាអិលបាក់ដី និងការបាក់ស្ពានជាដើម។
នៅភាគខាងត្បូងក្រុងសេអ៊ូលបានដាច់ភ្លើង ដោយធ្វើឲ្យមានការផ្អាកសេវារថភ្លើងជាច្រើន។ អ្នកធ្វើដំណើរដែលទៅណាមិនរួច បាននិយាយថា ស្ថានីយផ្លូវក្រោមដីនៅក្រុងសេអ៊ូល ត្រូវបានក្លាយជាអាងហែលទឹក៕ NR
ភ្នំពេញប៉ុស្តិ៏
No comments:
Post a Comment
yes