ទៅស៊ីឈ្នួលភ្ជួររាស់ដីចំការឱ្យគេត្រូវត្រាក់ទ័រ
សង្កត់លើស្លាប់ចោលប្រពន្ធមានផ្ទៃពោះ
ខេត្តប៉ៃលិន ៖ បុរសអ្នកបើកត្រាក់ទ័រម្នាក់ឈ្មោះប៊ុន ដេត ភេទប្រុស អាយុ២៣ឆ្នាំ រស់នៅភូមិអូរប្រើស សង្កាត់អូរតាវ៉ៅ ក្រុងប៉ៃលិន បានស្លាប់ភ្លាមៗនៅក្នុងឧប្បត្តិហេតុក្រឡាប់ត្រាក់ទ័រ កាលពីព្រឹកថ្ងៃទី២៣ កក្កដា ២០១១ ក្នុងពេលចេញទៅស៊ីឈ្នួលភ្ជួររាស់ដីដាំពោតឱ្យអ្នកភូមិម្នាក់ឈ្មោះវុធ រស់នៅភូមិប៉ាហ៊ីខាងជើង សង្កាត់ជាមួយគ្នា ដែលមានដីទំហំ២ហិកតា មានចម្ងាយពីផ្ទះប្រហែល១គីឡូម៉ែត្រ។
តាមសម្តីរបស់អ្នកស្រីកួន ចាន់ អាយុ៤៤ឆ្នាំ ត្រូវជាម្តាយក្មេករបស់ជនរងគ្រោះបាននិយាយថា ក្នុងរដូវវស្សានេះកូនប្រសាឈ្មោះដេត បានបើកត្រាក់ទ័រចេញពីផ្ទះឆ្ពោះទៅកន្លែងស៊ីឈ្នួលគេជាមួយនឹងបងថ្លៃតាំងពីម៉ោង៧ព្រឹករហូតដល់ម៉ោង១០ព្រឹក ជិតរួចរាល់ហើយនៅសល់មិនដល់១រ៉ៃផង ក៏ស្រាប់តែត្រាក់ទ័រឡើងដីទួលជាហេតុបណ្តាលឱ្យរអិលថយក្រោយចាប់ហ្វ្រាំងមិនស៊ី ក៏ក្រឡាប់ធ្លាក់ចូលទៅក្នុងអូរគ្មានទឹកជម្រៅជាង២ម៉ែត្រ ធ្វើឱ្យកូនប្រសារបស់គាត់ធ្លាក់ត្រូវត្រាក់ទ័រសង្កត់ពីលើស្លាប់ភ្លាមៗនៅនឹងកន្លែងតែម្តង។
ស្ត្រីជាម្តាយក្មេកបានប្រាប់បន្តថា កូនស្រីបង្កើតរបស់គាត់ឈ្មោះផាន់ សម្ផស្ស អាយុ១៨ឆ្នាំ បានរៀបការជាមួយបុរសខាងលើបាន៧ខែមកហើយ។
អ្នកស្រីបានបន្តទៀតថា មុននឹងកូនប្រសារងគ្រោះថ្នាក់យ៉ាងនេះ មានប្រផ្នូលមួយកើតឡើងដែលគួរឱ្យកត់សម្គាល់គឺតាំងពីដើមរហូតមកកូនប្រសាមិនដែលបបួលប្រពន្ធទៅចំការឡើយដោយទុកឱ្យប្រពន្ធនៅផ្ទះគ្រាន់ដាំបាយ តែនៅព្រឹកថ្ងៃខាងលើនេះ ប្តីបានបបួលប្រពន្ធទៅឈរមើលខ្លួនភ្ជួរដី តែប្រពន្ធបានប្រាប់ថា មិនស្រួលខ្លួនមិនអាចទៅចំការបាននោះទ ទើបកូនប្រសាទៅភ្ជួរដីជាមួយបងប្រុសរបស់ខ្លួន និងម្ចាស់ចំការបាត់ទៅ បន្ទាប់មកស្រាប់តែឮគេទូរស័ព្ទប្រាប់គាត់ថា «កូនប្រសារបស់គាត់់បានក្រឡាប់ត្រាក់ទ័រស្លាប់បាត់ហើយ»៕
ពីគេហទំព័រ៖ កោះសន្តិភាព
No comments:
Post a Comment
yes