ធ្លាក់យន្តហោះយោធា នៅម៉ារ៉ុក បានសម្លាប់
អ្នកជិះទាំង៨០នាក់
ក្រុងរ៉ាបាតៈ ប្រភពយោធា និងមន្ទីរពេទ្យបាននិយាយថា យន្តហោះដឹកជញ្ជូនយោធាមួយគ្រឿង បានធ្លាក់បុកចង្កេះភ្នំមួយនៅក្នុងអាកាសធាតុអាក្រក់ នៅភាគខាងត្បូងនៃប្រទេសម៉ារ៉ុក កាលពីថ្ងៃអង្គារ ដោយសម្លាប់អ្នកជិះនៅលើយន្តហោះទាំង៨០នាក់។
កងទ័ពបាននិយាយថា មនុស្ស៧៨នាក់ បានស្លាប់នៅនឹងកន្លែង កើតហេតុ ហើយពីរនាក់ត្រូវបានគេប្រញាប់ប្រញាល់បញ្ជូនទៅមន្ទីរពេទ្យ បន្ទាប់ពីយន្តហោះ Hercules C-130 បានធ្លាក់នៅចុងវាលខ្សាច់សាហារ៉ា នៅក្នុងមហន្តរាយផ្លូវអាកាសចរណ៍យោធាដ៏អាក្រក់បំផុតរបស់ប្រទេសនេះ។
ប្រភពមួយពីមន្ទីរពេទ្យក្រោយមក បានប្រាប់ក្រុមអ្នកយកព័ត៌មានថា អ្នករងរបួសទាំងអស់ បានស្លាប់ ដោយសារតែរបួសរបស់ពួកគេហើយ។
មុននេះ ក្រុមអាជ្ញាធរ បានរាយការណ៍ថា មនុស្ស៨១នាក់ បានជិះនៅលើយន្តហោះជួបវាសនាអាក្រក់នោះ និងយ៉ាងតិចមនុស្ស៧៨នាក់បានស្លាប់ ប៉ុន្តែក្រោយមកបានបញ្ជាក់ថា អ្នកធ្វើដំណើរម្នាក់ មិនបានជិះយន្តហោះនៅក្រុង ឡាយូន នៅតំបន់សាហារ៉ាខាងលិចនោះទេ ហើយក៏ត្រូវបានគេរាប់បញ្ចូលក្នុងចំនួនសរុបទាំងមិនត្រឹមត្រូវ។
ក្នុងសេចក្តីថ្លែងការណ៍មួយដែលទីភ្នាក់ងារព័ត៌មានរដ្ឋ MAP បានទទួលថា ក្រុមយោធា ក៏បាននិយាយផងដែរថា មានអ្នករបួសនៅរស់បីនាក់ពីការធ្លាក់យន្តហោះនេះរហូតមកដល់នឹងពេលនេះ ខណៈយន្តហោះអភ័ព្វនោះ កំពុងចុះចតនៅក្រុងហ្គូអែលមីម បន្ទាប់ពីហោះហើរពីតំបន់សាហារ៉ាខាងលិចដែលមានជម្លោះ ទៅតំបន់ភាគខាងជើងនេះ។
ការធ្លាក់យន្តហោះនេះ ជាមហន្តរាយផ្លូវអាកាសអាក្រក់បំផុតនៅម៉ារ៉ុក ចាប់តាំងពីឆ្នាំ១៩៧៣ នៅពេលដែលមនុស្សចំនួន១០៥នាក់ បានស្លាប់បន្ទាប់ពីយន្តហោះរូយ៉ាល់អ៊ែរ ម៉ារ៉ុក បានធ្លាក់នៅក្បែរក្រុងរ៉ាបាត។
អ្នកក្រុងហ្គូអែលមីមម្នាក់ បានប្រាប់រ៉យទ័រថា មានអ័ព្ទក្រាស់នៅពេលដែលយន្តហោះនេះធ្លាក់ នៅម៉ោង៩ព្រឹក ចម្ងាយប្រមាណ៧៣០គ.មខាងត្បូងក្រុងរ៉ាបាត។
មន្ត្រីថ្នាក់ខេត្តម្នាក់ បាននិយាយ ថា យន្តហោះនោះ បានត្រៀមខ្លួន ចុះចតនៅព្រលានយោធាក្នុងតំបន់មួយ នៅពេលនោះ ស្រាប់តែផ្សែង ដ៏ធំមួយបានលេចចេញពីលើភ្នំ។
លោកបានមានប្រសាសន៍ថា យន្តហោះនេះ បានបុកចង្កេះភ្នំល្បីឈ្មោះ សៃយើត។
ក្នុងសេចក្តីថ្លែងការណ៍នោះ កម្លាំងប្រដាប់អាវុធភូមិន្ទម៉ារ៉ុក នៅតែនិយាយថា៖ «ការធ្លាក់យន្តហោះ ដោយសារតែស្ថានភាពអាកាសធាតុអាក្រក់នេះ បណ្តាលឲ្យមនុស្ស៧៨នាក់ស្លាប់ និងបីនាក់ទៀត បានរងរបួសធ្ងន់» ដោយពួកគេមិនទាន់មានចេញសេចក្តីបញ្ជាក់ពីការកែប្រែថ្មីទេ។
យោធា បាននិយាយថា ទាហាន៦០នាក់ ជនស៊ីវិល១២នាក់ និងក្រុមអាកាសយានិក៩នាក់ ជិះនៅលើយន្តហោះនេះ នៅពេលដែលយន្តហោះនេះធ្លាក់។
យោធា បានអះអាងបន្ថែមទៀតថា អ្នកនៅរស់ និងសាកសព៤២នាក់ផ្សេងទៀត ត្រូវបានបញ្ជូនទៅដល់មន្ទីរពេទ្យយោធាក្បែរនោះ។
យោងតាមទីភ្នាក់ងារព័ត៌មាន MAP ឲ្យដឹងថា ក្នុងរាជសារ មួយផ្ញើជូនសាច់ញាតិរបស់ជនរងគ្រោះ ព្រះមហាក្សត្រ មូហាម៉ាដ ដែលដឹកនាំកងទ័ព បានមានព្រះបន្ទូលថា ព្រះអង្គ «មានព្រះទ័យតក់ស្លុតជាខ្លាំងជាមួយគ្រោះថ្នាក់ដ៏សែនឈឺចាប់នេះ»។
យន្តហោះនេះ បានធ្វើដំណើរពីក្រុងដាខ្លាភាគខាងលិចនៃតំបន់វាលខ្សាច់សាហារ៉ា ហើយគ្រោងនឹងធ្វើដំណើរទៅក្រុង កេនីត្រា ចម្ងាយ៤០គ.មពីខាងជើងរដ្ឋធានីរ៉ាបាត៕ NR
ពីគេហទំព័រ៖ ភ្នំពេញប៉ុស្តិ៏
No comments:
Post a Comment
yes