ខឹងប្រពន្ធចាក់ចម្រៀងបទ <<ចិត្តសុខពីមុន>> យកកែវស្រាវាយបែក្បាល
ការរស់នៅមិនចុះសម្រុងនិងមិនយល់ចិត្តគ្នា ក្នុងគ្រួសារមួយបានឈានទៅប្រើអំពើហិង្សាជាបន្តបន្ទាប់ដោយលើកមុនប្តីវាយប្រពន្ធហូរឈាមតាមត្រចៀក លើកនេះវាយប្រពន្ធនឹងកែវស្រាបែកក្បាល ព្រោះតែខឹងប្រពន្ធចាក់ចម្រៀងក្នុងទូរស័ព្ទបទ «ចិត្តខុសពីមុន» ។ បុរសជាប្តីត្រូវប្រពន្ធរបស់ខ្លួនដាក់ពាក្យបណ្តឹងឱ្យប៉េអឹមក្រុងប៉ោយប៉ែត ឃាត់ខ្លួនកាលពីវេលាម៉ោង៩ព្រឹកថ្ងៃទី៧ កញ្ញា ២០១១ នៅភូមិក្បាលស្ពាន សង្កាត់-ក្រុងប៉ោយប៉ែត ។
បុរសដែលត្រូវប្រពន្ធប្តឹងឱ្យប៉េអឹមឃាត់ខ្លួននោះឈ្មោះឈី សេងគង់ អាយុ៣៤ឆ្នាំ ឯស្ត្រីជាប្រពន្ធឈ្មោះសេង សុធា អាយុ៤៣ឆ្នាំ មានមុខរបរជាអ្នកជ្រែខោអាវជជុះចូលផ្សាររុងក្លឿទឹកដីថៃ ហើយទាំង២នាក់មានទីលំនៅក្នុងភូមិខាងលើ។
លោកវរសេនីយ៍ត្រីហម ម៉ុត មេបញ្ជាការកងរាជអាវុធហត្ថក្រុងប៉ោយប៉ែត បានប្រាប់ថា មុនការឃាត់ខ្លួន បុរសឈ្មោះឈី សេងគង់ គឺប្រពន្ធរបស់គេបានមកប្តឹងថា បានវាយនាងនឹងកែវស្រាបណ្តាលឱ្យបែកក្បាល ខណៈកំពុងផឹកស៊ីជុំគ្នាក្នុងខ្យូសខាងក្រោយផ្ទះ ជាមួយមិត្តភក្តិដោយពុំដឹងពីមូលហេតុ កាលពីវេលាម៉ោង៥និង៣០នាទីល្ងាចថ្ងៃទី៦ កញ្ញា ២០១១ ។ ស្ត្រីជាប្រពន្ធបានមកប្តឹងប៉េអឹមទាំងក្បាលរបួស ហើយប្រាប់ថា ប្តីរបស់គាត់រូបនេះធ្លាប់វាយធ្វើបាបគាត់ជាច្រើនដងហើយទើបគាត់ទ្រាំមិនបាន ព្រោះថ្ងៃមុនប្តីគាត់ទើបតែទះកំផ្លៀងគាត់រហូតហូរឈាមតាមត្រចៀក មិនទាន់ជាសះស្បើយផង។
ស្ត្រីជាប្រពន្ធប្រាប់ប៉េអឹមថា ជិតមួយសប្តាហ៍ហើយគាត់និងប្តីរបស់គាត់មិនដែលនិយាយរកគ្នាទេ ក្រោយពីវាយគាត់ឱ្យហូរឈាមតាមត្រចៀក ប៉ុន្តែនៅល្ងាចថ្ងៃទី៦ កញ្ញា ២០១១ ខណៈគាត់ផឹកស៊ីជុំមិត្តភក្តិខាងក្រោយផ្ទះ គាត់ចិត្តមិនដាច់គិតដល់ប្តីក៏ឱ្យមិត្តភក្តិហៅប្តី ពីក្នុងផ្ទះមកផឹកជាមួយ ហើយនិយាយទៅមករកគ្នាជាធម្មតាវិញ ។
លុះផឹកដល់ធ្លាក់ភ្នែករៀងខ្លួន ពេលគាត់បើកចម្រៀងក្នុងទូរស័ព្ទ ក៏ត្រូវប្តីគាត់ទាញកែវវាយគាត់តែម្តង ។ បុរសជាប្តីប្រាប់ថា ដោយសារខឹងប្រពន្ធចាក់បទ «ចិត្តខុសពីមុន» ដូចជាផ្លែផ្កាឱ្យគាត់ ទើបវាយយ៉ាងដូច្នេះ ៕
ពីគេហទំព័រ៖ កោះសន្តិភាព
No comments:
Post a Comment
yes