ប្រជាពលរដ្ឋជាច្រើននាក់ដែលត្រូវបានក្រុមហ៊ុនចិនជួលឲ្យទៅរុករករ៉ែមាសនៅភ្នំព្រឹកបានពុលជាតិគីមីរដូករណែលជាច្រើននាក់ក្នុងនោះមានពីរនាក់ធ្ងន់ធ្ងរត្រូវដឹកបញ្ជូនទៅមន្ទីរពេទ្យថៃដើម្បីជួយសង្គ្រោះ។
ហេតុការណ៍ពុលនេះបានកើតឡើងកាលពីវេលាម៉ោង៥និង៣០នាទី ទៀបភ្លឺថ្ងៃទី០៤ ខែតុលា ឆ្នាំ២០១១ នៅចំណុចភូមិភ្នំព្រឹក ឃុំ ភ្នំព្រឹក ស្រុក ភ្នំព្រឹក ខេត្ត បាត់ដំបង។
ប្រភពព័ត៌មានពីអាជ្ញាធរបានឲ្យដឹងថាទីតាំងនោះ ត្រូវក្រុមហ៊ុនចិន ឈ្មោះ យូ យ៉ាន បានជួលកម្មកររុករករ៉ែមាសជាច្រើនខែមកហើយ។ ការរុករកនោះធ្វើឡើងទាំងយប់ទាំងថ្ងៃ ហើយកម្មកររាប់សិបនាក់បានខួងដីរករ៉ែ ប៉ុន្តែនៅពេលកើតហេតុនោះកម្មករពីរនាក់បានទន់ដៃទន់ជើង សន្លប់ ទំនងជាពុលនឹងសារធាតុគីមី ត្រូវបានសង្គ្រោះជាបន្ទាន់ ហើយកម្មករដ៏ទៃទៀតក៏មានអាការៈពុលស្រដៀងគ្នានេះដែរ គ្រាន់តែមិនសូវធ្ងន់ធ្ងរប៉ុណ្ណោះ។
សារធាតុគីមីដែលធ្វើឲ្យកម្មករពុលនោះគេមិនទាន់បានពិសោធន៍មើលថាវាបណ្ដាលមកពីអ្វីឲ្យពិតប្រាកដនោះទេ។
អាជ្ញាធរបានបង្ហើបប្រាប់កម្ពុជាថ្មីទៀតថា សកម្មភាពរុករករ៉ែនេះមានលក្ខណៈជាទ្រង់ទ្រាយធំ មានទាំងក្រុមហ៊ុន រុករករ៉ែស្របច្បាប់ និង ប្រជាពលរដ្ឋដែលនាំគ្នាទៅជីករករ៉ែយ៉ាងអនាធិបតេយ្យ គឺគ្មានការទប់ស្កាត់នោះទេ៕
ពីគេហទំព័រ៖ កម្ពុជាថ្មី
No comments:
Post a Comment
yes