ភ្ញៀវកិត្តិយស កំពុងមើលគំរោងអាគារមាស ៤២ជាន់ នាឳកាសសម្ភោធ
ការសាងសង់ កាលពីថ្ងៃទី ១៨ ខែមិថុនា ឆ្នាំ២០០៨ ។
នៅថ្ងៃទី ១៨ ខែមិថុនា ឆ្នាំ២០០៨ ពិធីសម្ភោធការសាងសង់អាគារ Golden Tower 42 បាន ប្រព្រឹត្តិ យ៉ាងមហោឡារឹក និងមោទនភាពបំផុត។ តាមការគ្រោងទុក អាគារដែលមានសំបុរលឿងឆ្អៅដូច មាសគីឡូនេះ នឹងសាងសង់ហើយរួចរាល់នៅឆ្នាំ២០១៣ ដោយក្រុមសំណង់មួយ មកពីប្រទេសកូរ៉េខាងត្បូង។
លោកឧបនាយករដ្ឋមន្រ្តី សុខ អាន បានមានប្រសាសន៍ថា៖ Golden Tower 42 គឺជាសំណង់អាគារដែលខ្ពស់ជាងគេជាប្រវត្តិសាស្រ្តនៅទីក្រុងភ្នំពេញ និងជានិមិត្តរូបនៃកំណើនសេដ្ឋកិច្ចរបស់ប្រទេស កម្ពុជា នារយៈពេលចុងក្រោយនេះ…។
បើតាមគំនូរប្លង់ អាគារពណ៌មាសនេះមានកំពស់ ១៩២ម ចែកចេញជា ៤២ជាន់ គឺខ្ពស់ជាងអាគារកាណាឌីយ៉ា ដែលមានកំពស់ត្រឹមតែ ១១៨.១០ម និងមានតែ ៣២ជាន់តែប៉ុណ្ណោះ។ បើប្រៀបធៀបនឹងអាគារនានានៅទីក្រុងម៉ានីល អាគារមាស ៤២ជាន់របស់យើងមានកំពស់ខ្ពស់ជាងអាគារ Pacific Plaza (178.90m) និងទាបជាងអាគារ One Rockwell (202m) នៃប្រទេសហ្វីលីពីន។
ប៉ុន្តែគួរអោយស្តាយ… អាគារដែលជាតំណាងអោយមោទនភាពនៅទីក្រុងភ្នំពេញយើង ត្រូវបាន ប្រកាសផ្អាកការសាងសង់នៅថ្ងៃទី ១៣ ខែកញ្ញា ឆ្នាំ២០១០ កាលពីឆ្នាំកន្លងទៅ ដែលធ្វើអោយអាគារនេះ នៅឈរជង្គ្រឹងក្នុងភាពមេម៉ាយ រហូតដល់សព្វថ្ងៃនេះ។ តាមការបញ្ជាក់ពីម្ចាស់ ក្រុមហ៊ុន សំណង់អាគារនេះ បានអោយដឹងថា៖ អាគារនេះនឹងផ្អាកការសាងសង់ជាបណ្តោះអាសន្ន នៅត្រឹម ជាន់ទី ៣១ សិន ហើយក្រុមហ៊ុននឹងត្រឡប់មកបន្តសាងសង់ម្តងទៀត… តែមិនដឹងថា ពេលណាអោយប្រាកដទេ..!!
បើតាមប្រភពក្រៅផ្លូវការមួយបានអោយដឹងថា៖ ៦០% នៃតំលៃអចលនៈទ្រព្យរបស់អាគារនេះ បាន លក់ទៅអតិថិជនដាច់អស់ហើយ…។
ទីតាំងអាគារមាស ៤២ជាន់នេះ បានសាងសង់នៅលើទីតាំងបរិវេណមន្ទីរពេទ្យមិត្តភាពកម្ពុជា-ចិន (ហៅកាត់ថា ពេទ្យចិន) ដែលមន្ទីរពេទ្យនេះ ត្រូវបានសាងសង់ឡើងដោយជំនួយពីមហាមិត្តចិន ក្នុងសម័យសង្គមរាស្ត្រនិយមរបស់សម្តេចឪ សម្តេចតា។ ហេតុនេះហើយបានជានៅកាច់ជ្រុងទីនោះ អ្នកដំណើរទូទៅនៅតែហៅថា ស្តុបពេទ្យចិនៗ ជាប់មាត់រហូតមក ដោយមិនទាន់មានការផ្លាស់ប្តូរទៅហៅស្អីផ្សេងទៀតនៅឡើយទេ។
នៅតាមដងមហាវិថីព្រះមុនីវង្ស ខាងជើងអាគារមាស ៤២ជាន់នេះបន្តិច គឺនៅចំទីតាំងក្រសួង ទេស ចរណ៍ចាស់ មានសំណង់អាគារមួយបានលូតឡើងកំពស់បែបស្ងាត់ស្ងៀម ដែលមានកំពស់មិនចាញ់អាគារកាណាឌីយ៉ា ប៉ុន្មានទេ… គឺជាសំណង់អាគាររបស់ក្រុមហ៊ុន Hyundai របស់ប្រទេស កូរ៉េខាង ត្បូងដែរ។
ឈរនៅលើពហុកីឡាដ្ឋានជាតិអូឡាំពិក យើងអាចមើលឃើញអាគារខ្ពស់ៗ នាពេលបច្ចុប្បន្ននៅទីក្រុងភ្នំពេញ បានយ៉ាងច្បាស់ចែស…៕
ភាពមេម៉ាយនៃអាគារមាស ៤២ជាន់ (មើលពីនាគបាញ់ទឹកទៅ) ។
នៅជិតនេះគឺសំណង់អាគារក្រុមហ៊ុន Hyundai ហើយនៅឯនាយនោះ
គឺសំណង់អាគារមាស ៤២ជាន់ កាលពេលកំពុងសាងសង់ដូចគ្នា។
បច្ចុប្បន្នភាពនៃអាគារក្រុមហ៊ុន Hyundai និងភាពមេម៉ាយ
នៃអាគារមាស ៤២ជាន់
ការប្រៀបធៀបរវាងសំណង់អាគារមាស ៤២ជាន់ និងអាគារកាណាឌីយ៉ា ។
ការប្រៀបធៀបរវាងសំណង់អាគារមាស ៤២ជាន់ និងអាគារនានា
នៅ ប្រទេសហ្វីលីពីន ។
ពីគេហទំព័រ៖ ស្រុកស្រែ
No comments:
Post a Comment
yes