ភ្នំពេញ: គណបក្សសិទ្ធិមនុស្ស កាលពីថ្ងៃទី១៤ ខែកុម្ភៈ ឆ្នាំ២០១២ បានធ្វើសេចក្ដីអំពាវនាវ ដោយទទូច ចំពោះអង្គការសហប្រជាជាតិ និងប្រទេសម្ចាស់ជំនួយ ដែលមានបំណងចង់ជួយអភិវឌ្ឍន៍ប្រទេសកម្ពុជា ចង់ជួយលើកកម្ពស់ជីវភាពប្រជាពលរដ្ឋខ្មែរពិត និងចង់ឲ្យកម្ពុជាមានសន្តិភាព និងស្ថេរភាព សូមមេត្តាជួយផ្តោតការយកចិត្តទុកដាក់ជាអាទិភាព ទៅលើដំណើរការបោះឆ្នោតជ្រើស រើសក្រុមប្រឹក្សាឃុំ-សង្កាត់ ឆ្នាំ២០១២ និងការបោះឆ្នោតជ្រើសរើសតំណាងរាស្ដ្រឆ្នាំ២០១៣ នៅកម្ពុជា នាពេលខាងមុខនេះ។
សេចក្ដីអំពាវនាវបានលើកឡើងថា គណបក្សសិទ្ធិមនុស្សយល់ឃើញថា ដើម្បីឲ្យការបោះឆ្នោតខាង មុខនេះ អាចប្រព្រឹត្តទៅបានដោយសេរី ត្រឹមត្រូវ និងយុត្តិធម៌បាន ជាការចាំបាច់ ត្រូវទាមទារឲ្យ៖
១. គណៈកម្មាធិការជាតិរៀបចំការបោះឆ្នោត (គ.ជ.ប.) ឯករាជ្យ ដោយត្រូវតែផ្លាស់ប្ដូរសមាសភាព គ.ជ.ប. បច្ចុប្បន្ន ដែលមតិជាតិ និងអន្តរជាតិដឹងច្បាស់ថា សមាសភាព គ.ជ.ប. បច្ចុប្បន្ន ភាគច្រើន ជាមនុស្សរបស់គណបក្សប្រជាជនកម្ពុជា (បក្សកាន់អំណាច) ដែលមិនអាចជឿទុកចិត្តបានថា សមាសភាពទាំងនោះអាចបំពេញការងារបោះឆ្នោត ដោយឯករាជ្យ អព្យាក្រឹត្យ និងយុត្តិធម៌បាន ឡើយ។
២. អាជ្ញាធរមូលដ្ឋាន ភូមិ ឃុំ សង្កាត់ ដែលជាសមត្ថកិច្ច ចូលរួមក្នុងការរៀបចំការបោះឆ្នោតយ៉ាងសំខាន់ ដូចជា ការធ្វើអត្តសញ្ញាណប័ណ្ណ ការចុះឈ្មោះបោះឆ្នោត ការធានានូវបរិយាកាសនយោបាយអព្យាក្រឹត្យ ជាដើម មិនត្រូវរើសអើង ប្រកាន់គណបក្ស មិនត្រូវគំរាមកំហែងទៅលើប្រជាពលរដ្ឋក្នុងមូលដ្ឋានឡើយ។ សមត្ថកិច្ចទាំងនោះ ត្រូវបំពេញការងារមន្ត្រីសាធារណៈ មិនត្រូវយកតួនាទីជាមន្ត្រីសាធារណៈ ទៅបម្រើគណបក្សកាន់អំណាចនោះឡើយ។
៣. គណបក្សកាន់អំណាច មិនត្រូវប្រើប្រាស់ស្ថាប័នរដ្ឋ មធ្យោបាយរដ្ឋ បុគ្គលិករដ្ឋ បណ្ដាញផ្សព្វ ផ្សាយ រដ្ឋ ថវិកាជាតិ មុខតំណែង ឬ វេទិការបស់រដ្ឋាភិបាល ដើម្បីបម្រើផលប្រយោជន៍គណបក្សខ្លួន ដោយវាយប្រហារ បំបែកបំបាក់ បំភិតបំភ័យ អូសទាញ ទិញដូរប្រជាពលរដ្ឋ ឬ សកម្មជនរបស់គណបក្សផ្សេង ឲ្យគាំទ្រគណបក្សរបស់ខ្លួន។ ជាពិសេសមិនត្រូវប្រើប្រាស់ឥទ្ធិពលរបស់ខ្លួន ទៅលើប្រព័ន្ធតុលាការ ដើម្បីគំរាមកំហែង ចោទប្រកាន់ ចាប់ខ្លួន ឬ ផ្ដន្ទាទោសអ្នកមិនគាំទ្រគណបក្សខ្លួនឡើយ។
សេចក្ដីអំពាវនាវបានបន្តថា គណបក្សសិទ្ធិមនុស្សសង្កេតឃើញថា មកដល់ដំណាក់កាលបច្ចុប្បន្ន នេះ ដែលបញ្ហានយោបាយ សេដ្ឋកិច្ច និងសង្គមកិច្ចនៅកម្ពុជា ស្ថិតនៅស្ថានភាពមួយគួរឲ្យព្រួយ បារម្ភយ៉ាងខ្លាំង ដូចជា៖
ទីមួយ ៖ ការកាន់អំណាចដ៏យូរលង់ គ្មានកាលកំណត់របស់បុគ្គលម្នាក់ ការប្រមូលផ្ដុំអំណាច បក្ស ពួក និយម គ្រួសារនិយម ដែលនាំឲ្យឃ្លាតឆ្ងាយពីគោលការណ៍ប្រជាធិបតេយ្យ រអិលទៅរកឯកបក្ស ការរំលោភសិទ្ធិមនុស្ស និងអំណាចផ្ដាច់ការវិញ។
ទីពីរ ៖ ការរាលដាលនៃអំពើពុករលួយ ដែលមានលក្ខណៈជាប្រព័ន្ធ ធ្វើឲ្យមានគម្លាតរវាងអ្នកមាន និងអ្នកក្រ នៅក្នុងប្រទេសកម្ពុជាកាន់តែធំទៅៗ។ ការបំផ្លិចបំផ្លាញធនធានធម្មជាតិ ទ្រព្យសម្បត្តិជាតិ ការរឹបអូសយកដីធ្លី ផ្ទះសម្បែងពីប្រជាពលរដ្ឋក្រីក្រ ពីកសិករទន់ខ្សោយ យកទៅឲ្យអ្នកមានលុយ អ្នកមានអំណាច ក្រោមស្លាកអភិវឌ្ឍន៍ ដែលប្រជាពលរដ្ឋទទួលរងនូវការឈឺចាប់ ដោយការអភិវឌ្ឍក្រោមតំណក់ឈាម តំណក់ទឹកភ្នែករបស់ប្រជាពលរដ្ឋខ្មែរនៅគ្រប់ទិសទី គ្មានដំណោះ ស្រាយដោយយុត្តិធម៌។ ប្រាក់បៀវត្សរ៍ដ៏តិចតួចរបស់មន្ត្រីរាជការ កងកម្លាំងប្រដាប់អាវុធ និងកម្មករ បើប្រៀបធៀបទៅនឹងតម្លៃទំនិញលើទីផ្សារ ចេះតែឡើងជាបន្តបន្ទាប់ ដែលរដ្ឋាភិបាលបច្ចុប្បន្ន គ្មានសមត្ថភាពដោះស្រាយនោះឡើយ។
ទីបី ៖ យុវជន សិស្ស និស្សិត ជាពិសេសកូនអ្នកក្រីក្រ ខ្វះថវិកាបន្តការសិក្សា ចេញពីសលាអត់ការ ធ្វើ។ អ្នកក្រីក្រខ្វះថវិកាពិនិត្យ និងព្យាបាលជំងឺ ឈឺដេកចាំតែស្លាប់យ៉ាងវេទនា៘
សេចក្ដីអំពាវនាវបន្ថែមថា យោងតាមកត្តាដូចបានរៀបរាប់ខ្លះៗខាងលើនេះ គណបក្សសិទ្ធិមនុស្ស សង្កេតឃើញថា ប្រជាពលរដ្ឋខ្មែរ ដែលគិតគូរលើបញ្ហាអនាគតរបស់ប្រទេសជាតិ របស់សង្គមខ្មែរ និងរបស់ក្រុមគ្រួសារខ្ឡួន កាន់តែមានចំនួនច្រើនទៅៗ បាននិងកំពុងអស់សង្ឃឹមលើការដឹកនាំរបស់មេដឹកនាំ និងគណបក្សកាន់អំណាចដដែលៗ ដែលកាន់អំណាចគ្មានកំណត់ អស់រយៈពេល ប្រមាណ ជាបីទសវត្សរ៍មកហើយនោះ។ កំណើននៃប្រជាពលរដ្ឋដែលអស់សង្ឃឹម គឺទាមទារឲ្យមានការផ្លាស់ប្ដូរមេដឹកនាំរដ្ឋាភិបាល ដែលសូម្បីតែប្រទេសកុម្មុយនីស្ដមួយចំនួន នៅក្នុងពិភពលោក ក៏គេបាននិងកំពូងផ្លាស់ប្ដូរមេដឹកនាំប្រទេសរបស់គេដែរ។ ក៏ប៉ុន្តែយើងសង្កេតឃើញថា ចរន្តរបស់ប្រជាពលរដ្ឋខ្មែរ ចំពោះការផ្លាស់ប្ដូរនោះ បាននិងកំពុងលេចចេញនូវទស្សនៈផ្សេងៗគ្នាពីរ៖
- ទស្សនៈទី១ ៖ ចង់ឲ្យមានការផ្លាស់ប្ដូរតាមរយៈការបោះឆ្នោត ដោយសេរី ត្រឹមត្រូវ យុត្តិធម៌ និងដែលអាចទទួលយកបាន។
- ទស្សនៈទី២ ៖ ចង់ឲ្យមានការផ្លាស់ប្ដូរដោយកម្លាំងមហាជន មិនមែនតាមរយៈការបោះឆ្នោតទេ។
សេចក្ដីអំពាវនាវរបស់គណបក្សសិទ្ធិមនុស្សដដែល បានលើកឡើងថា ប្រទេសកម្ពុជា ល្មមដល់ពេលឲ្យមានការផ្លាស់ប្ដូរអ្នកដឹកនាំរដ្ឋាភិបាលហើយ។ ក៏ប៉ុន្តែគណបក្សសិទ្ធិមនុស្សយល់ឃើញថា ការផ្លាស់ប្ដូរអ្នកដឹកនាំរដ្ឋាភិបាល តាមរយៈការបោះឆ្នោត ដោយសេរី ត្រឹមត្រូវ និងយុត្តិធម៌ គឺជាជម្រើសដ៏ល្អប្រសើរ ដែលគណបក្សសិទ្ធិមនុស្សចង់បាន ព្រោះគណបក្សសិទ្ធិមនុស្សប្រកាន់នូវគោលការណ៍អហិង្សា។
ទោះជាយ៉ាងណាក៏ដោយ គណបក្សសិទ្ធិមនុស្សរបស់លោក កឹម សុខា សូមឲ្យមតិសាធារណៈជាតិ និងអន្តរជាតិ រួមទាំងអ្នកកាន់អំណាចបច្ចុប្បន្នផង កុំប្រមាថមើលស្រាលទៅលើប្រជាពលរដ្ឋខ្មែរ ដែលធ្លាប់មានប្រវត្តិជាអ្នកតស៊ូរើបម្រះពីការជិះជាន់កន្លងទៅនោះថា ពួកគាត់ទាល់ច្រក មិនអាចធ្វើអ្វីកើតនោះឡើយ៕
CEN
No comments:
Post a Comment
yes