ភ្នំពេញ : នេះបន្ទាប់ពីបង្កនូវចម្ងល់ដល់ទស្សនិកជនស្ទើរគ្រប់គ្នា ពិសេសអ្នកប្រើប្រព័ន្ធហ្វេសប៊ុក តាមរយៈការ បង្ហាញរូបថតបីទារិកាទើបតែមានអាយុមិនដល់មួយខែនៅលើ ទំព័រ ហ្វេសប៊ុករបស់ខ្លួន ហើយអះអាងថា ជាកូនស្រីមិនទាន់នឹងបាត់មន្ទិលផង បែរជាតារាសម្តែង ស៊ុក សុភា បានបង្កនូវចម្ងល់មួយកាន់តែធំទៀត នៅពេលលោកបានបង្ហោះរូបថតមួយផ្សេងទៀតក្នុងកាយវិការស្និទ្ធស្នាល ជាមួយនារីម្នាក់បីកូនរបស់លោក ដោយលោកកៀកករបស់នាងប្រៀបបាននឹងប្រពន្ធនោះ។
តែនៅពេលនេះ តារាសម្តែងដែលពូកែលាក់ប្រវត្តិស្នេហា លោក ស៊ុក សុភា បានបង្ហាញនូវភាពក្លាហានក្នុងនាមជាកូនប្រុសទ្រូង៥ហត្ថ ថា នារីម្នាក់នោះ គឺជាប្រពន្ធរបស់លោក ដែលត្រូវជាម្តាយរបស់ ស៊ូហ្សាណា ស៊ុក នោះឯង។
នៅរសៀលថ្ងៃទី២ ខែមេសា ម្សិលមិញនេះ នៅលើទំព័រហ្វេសប៊ុករបស់តារាសម្តែងរមែងជាប់ជំពាក់រឿងអាស្រូវស្នេហាជាមួយមេម៉ាយកូនពីរ ម៉េង កែវពេជ្ជតា លោក ស៊ុក សុភា បានរំលេចចេញនូវរូបថតថ្មី មួយសន្លឹកទៀត បន្ថែមលើរូបថតដែលលោកឈរបីកូន ហើយរូបថតដែលលោកបញ្ចេញមកក្រោយនេះ គឺរឹតតែបង្ហាញយ៉ាងច្បាស់ឲ្យដឹងថា លោកពិតជាមានប្រពន្ធ និងកូនប្រាកដមែន។
រូបថតមួយសន្លឹកចុងក្រោយដែលលេចចេញនៅក្នុងហ្វេសប៊ុករបស់ ស៊ុក សុភា នោះ គឺស្ថិតនៅក្នុងកាយវិការ តារាប្រុស ស៊ុក សុភា អង្គុយកៀកកនារីម្នាក់ដែលក្នុងដៃរបស់នាងមានបីទារិកា ហើយទារិកានោះត្រូវបានគេដឹងថាជាទារិកាម្នាក់ដែល ស៊ុក សុភា បានអះអាងថា ជាកូនស្រីរបស់ខ្លួនឈ្មោះ ស៊ូហ្សាណា ស៊ុក។
ដើម្បីបកស្រាយនូវចម្ងល់ដែលបានកប់ទុកជាយូរមកនេះ ភ្នំពេញ ប៉ុស្តិ៍ ក៏បានសម្ភាសផ្ទាល់ជាមួយតារារូបនេះតាមទូរស័ព្ទ ហើយតារាដែលតែងបិទមាត់ខ្លួនឯងមិនព្រមនិយាយការពិត ស៊ុក សុភា ក៏បានតាំងចិត្តយ៉ាងក្លាហាន ហើយសារភាពថា៖«ស្រ្តីដែលអង្គុយបីកូន ហើយខ្ញុំកៀកកនោះ គឺជាប្រពន្ធខ្ញុំហើយ ហើយនាងក៏ជាម្តាយ ស៊ូហ្សាណា ស៊ុក ដែរ ដែលទើបសម្រាលបានជាង១០ថ្ងៃហ្នឹង»។
ដោយទទូចចង់ដឹងពីឈ្មោះម្តាយរបស់ ស៊ូហ្សាណា ស៊ុក និងចង់ដឹងច្បាស់ពីប្រវត្តិស្នេហ៍គ្រាដំបូងមុននឹងឈានដល់ទទួល បានបុត្រី ទាំងមិនទាន់រៀបការបែបនេះ តារាសម្តែងរូបសង្ហា ដែលអ្នកណាៗ ក៏ហៅថា អាខៀវ គឺ ស៊ុក សុភា បានឆ្លើយទាំងកំបុតស្ញេញថា៖ «លោក(អ្នកព័ត៌មានភ្នំពេញ ប៉ុស្តិ៍) គិតមើលទៅ! ខ្ញុំមានកូនរហូតបានឆ្លងទន្លេហើយ ប្រហែលជាមិនមែនទើបតែស្គាល់គ្នាពីរ ឬបីខែនេះទេ»។
តែទោះបីជាយ៉ាងណាតារារូបនេះ បានឲ្យដឹងថា៖«ចំពោះឈ្មោះភរិយាខ្ញុំ មិនទាន់អាចប្រាប់បានទេគឺទុកជាចម្ងល់ តែទស្សនិកជននឹងបានដឹងនៅក្នុងកញ្ចក់ទូរទស្សន៍ CTN ប៉ុស្តិ៍២១ តែខ្ញុំអាចប្រាប់បានថា គាត់ជាអាណិកជនរស់នៅប្រទេសអូស្រ្តាលី»។
ដោយសារតែភរិយាទើបតែផ្តល់កំណើតឲ្យកូនស្រី ស៊ុក សុភា បានឲ្យដឹងថា ប្រពន្ធរបស់លោកកំពុងស្ថិតនៅប្រទេសកម្ពុជានៅឡើយ ហើយលោកកំពុងខ្វែងដៃជើងរៀបចំឯកសារដើម្បីបានចេញទៅរស់នៅ ប្រទេសអូស្រ្តាលីជុំគ្នាជាមួយភរិយាដែរ។
បើទោះជាពេលនេះដំណើរស្នេហ៍ជ្រុលជើងរហូតបានកូនមួយហើយក៏ដោយ តែតារាដែលធ្លាប់តែរស់នៅខ្លួនមួយ ស៊ុក សុភា នៅតែអះអាងថា៖«ក្រោយឯកសារចេញទៅរស់នៅប្រទេសអូស្រ្តាលីធ្លាក់មកដល់ដៃចប់ សព្វគ្រប់ពេលណា ខ្ញុំនឹងដឹកដៃម៉ាក់ ស៊ូហ្សាណា ចូលរោងការភ្លាម ដោយមិនបង្អង់យូរឡើយ ព្រោះប្រញាប់ចេញទៅរស់នៅទីនោះសាងសុភមង្គលជុំគ្នា»៕
No comments:
Post a Comment
yes