ប្រតិទិននៃការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០១២ បានបង្ហាញថា ការចាប់ផ្ដើមពិនិត្យបញ្ជីឈ្មោះ និងការចុះឈ្មោះបោះឆ្នោតនៅតាមឃុំ-សង្កាត់ ចាប់ផ្ដើមនៅថ្ងៃទី១ ខែកញ្ញា ដល់ថ្ងៃទី១២ ខែតុលា ឆ្នាំ២០១២។
កិច្ចប្រជុំប្រកាសលទ្ធផលបណ្ដោះអាសន្ននៃការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០១០ នៅឯស្នាក់ការកណ្ដាល គ.ជ.ប ក្នុងរាជធានីភ្នំពេញ នៅថ្ងៃទី១២ ខែតុលា ឆ្នាំ២០១០។
ទាក់ទិនបញ្ហានេះ មន្ត្រីគណបក្សប្រឆាំង និងមន្ត្រីសង្គមស៊ីវិលធ្វើការពាក់ព័ន្ធការងារបោះឆ្នោត ក៏បានរំលឹកស្មារតីឲ្យពលរដ្ឋត្រូវទៅពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០១២ ឲ្យបានច្រើន ដើម្បីមានសិទ្ធិបោះឆ្នោតសម្រេចពីជោគវាសនាប្រទេសជាតិ។
លោក កឹម សុខា ប្រធានគណបក្ស សិទ្ធិមនុស្ស បានឲ្យដឹងថា ដើម្បីមានសិទ្ធិចូលរួមបោះឆ្នោតជ្រើសតាំងតំណាងរាស្ត្រអាណត្តិទី៥ នៅឆ្នាំ២០១៣ ប្រជាពលរដ្ឋមានសិទ្ធិបោះឆ្នោត ត្រូវទៅពិនិត្យឈ្មោះ និងចុះឈ្មោះបោះឆ្នោតឲ្យបានទាំងអស់គ្នា។
លោកថា ការបោះឆ្នោតតំណាងរាស្ត្រអាណត្តិទី៥ ជាការបោះឆ្នោតមានសារសំខាន់ដើម្បីឲ្យមានការអភិវឌ្ឍប្រទេស ជំរុញឲ្យមានការគោរពសិទ្ធិមនុស្ស និងលទ្ធិប្រជាធិបតេយ្យជាដើម។
ដូច្នេះ ពលរដ្ឋគ្រប់អាយុបោះឆ្នោត ត្រូវទៅចុះ ឬទៅពិនិត្យឈ្មោះឲ្យបានទៀងទាត់តាមការប្រកាសរបស់ស្ថាប័នគណៈកម្មាធិការជាតិរៀបចំការបោះឆ្នោត (គ.ជ.ប)។
លោក កឹម សុខា សង្កត់ធ្ងន់ថា ការខកខានមិនបានទៅពិនិត្យ និងចុះឈ្មោះបោះឆ្នោតឆ្នាំ២០១២ ដែលចាប់ផ្ដើមនៅខែកញ្ញា អាចនាំឲ្យពលរដ្ឋបាត់ឈ្មោះពីបញ្ជីឈ្មោះបោះឆ្នោត និងមិនមានសិទ្ធិចូលរួមបោះឆ្នោតតំណាងរាស្ត្រអាណត្តិទី៥ នោះទេ។
មិនខុសគ្នាទេ លោក យឹម សុវណ្ណ មន្ត្រីនាំពាក្យគណបក្ស សម រង្ស៊ី ក៏បានអំពាវនាវឲ្យប្រជាពលរដ្ឋខ្មែរមានសិទ្ធិបោះឆ្នោត ត្រូវត្រៀមខ្លួនទៅពិនិត្យបញ្ជីឈ្មោះ និងចុះឈ្មោះបោះឆ្នោត នៅដើមខែកញ្ញា ឆ្នាំ២០១២ កុំបីខាន។
លោកបន្តថា បញ្ជីឈ្មោះបោះឆ្នោតឆ្នាំ២០១២ ជាបញ្ជីឈ្មោះសម្រាប់យកទៅប្រើប្រាស់ក្នុងការបោះឆ្នោតជ្រើសរើសតំណាងរាស្ត្រអាណត្តិទី៥ ឆ្នាំ២០១៣។ ដូច្នេះ បើប្រជាពលរដ្ឋរូបណា មិនបានទៅចុះឈ្មោះ ឬទៅពិនិត្យឈ្មោះឲ្យបានទៀងទាត់ទេ មិនអាចបោះឆ្នោតបានទេ។
ចំណែកលោកបណ្ឌិត ហង្ស ពុទ្ធា ជានាយកប្រតិបត្តិអង្គការ និចហ្វិក ក៏បានលើកឡើងពីសារសំខាន់ចំពោះការពិនិត្យបញ្ជីឈ្មោះ និងចុះឈ្មោះបោះឆ្នោត ឆ្នាំ២០១២ នេះដែរ។ ព្រោះថា បញ្ជីបោះឆ្នោតនេះសម្រាប់យកទៅបម្រើឲ្យការងារបោះឆ្នោត ជ្រើសតាំងតំណាងរាស្ត្រអាណត្តិទី៥ ឆ្នាំ២០១៣។
លោកថា ប្រជាពលរដ្ឋមិនត្រូវខកខានក្នុងការពិនិត្យឈ្មោះ និងចុះឈ្មោះបោះឆ្នោត នៅថ្ងៃទី១ ខែកញ្ញា ដល់ថ្ងៃទី១២ ខែតុលា ឆ្នាំ២០១២ នោះទេ។
លោក អ៊ឹម សួស្តី ជាប្រធានគណៈកម្មាធិការជាតិរៀបចំការបោះឆ្នោត លោកក៏បានអំពាវនាវដល់ប្រជាពលរដ្ឋ ដែលគ្រប់អាយុ ឬមានសិទ្ធិបោះឆ្នោតត្រូវត្រៀមខ្លួនទៅពិនិត្យបញ្ជីឈ្មោះ និងចុះឈ្មោះបោះឆ្នោតឲ្យបានគ្រប់គ្នា នៅដើមខែកញ្ញា តាមឃុំ សង្កាត់ របស់ខ្លួន។
លោក អ៊ឹម សួស្តី បានបញ្ជាក់ដែរថា ការធ្វើបច្ចុប្បន្នភាពបញ្ជីឈ្មោះអ្នកបោះឆ្នោត ត្រូវធ្វើជារៀងរាល់ឆ្នាំ និងទាមទារឲ្យប្រជាពលរដ្ឋមានសិទ្ធិបោះឆ្នោត ឬគ្រប់អាយុបោះឆ្នោតចូលរួមទាំងអស់គ្នា។ ទោះប្រជាពលរដ្ឋទាំងនោះធ្លាប់បានចុះឈ្មោះក្នុងបញ្ជីបោះឆ្នោត ឬធ្លាប់បានបោះឆ្នោតកន្លងមកក្តី ក៏ត្រូវទៅពិនិត្យបញ្ជីឈ្មោះតាមសេចក្តីប្រកាសរបស់ គ.ជ.ប ឲ្យបានត្រឹមត្រូវ បើមិនដូច្នេះទេនឹងត្រូវលុបចេញពីបញ្ជីបោះឆ្នោត។
កាលបរិច្ឆេទនៃការចុះឈ្មោះតំណាងគណបក្សនយោបាយ ចាប់ផ្ដើមពីថ្ងៃទី២៣ ខែសីហា ដល់ថ្ងៃទី២២ ខែធ្នូ ឆ្នាំ២០១២។
កាលបរិច្ឆេទនៃការបោះឆ្នោតជ្រើសតាំងតំណាងរាស្ត្រអាណត្តិទី៥ នឹងចាប់ផ្ដើមនៅថ្ងៃអាទិត្យ ទី២៨ ខែកក្កដា ឆ្នាំ២០១៣៕
No comments:
Post a Comment
yes