កម្មកររោងចក្រ តេ យុង លើកគ្នាធ្វើកូដកម្មតវ៉ាកាលពីដើមខែតុលា
ភ្នំពេញៈ កម្មករ១៦នាក់នៅរោងចក្រតេយ៉ុង ក្នុងស្រុកអង្គស្នួល ខេត្តកណ្ដាល ដែលបានធ្វើការតវ៉ាកាលពីដើមខែនេះ ដើម្បីទាមទារឲ្យក្រុមហ៊ុនទទួលយកពួកគេឲ្យចូលធ្វើការវិញ បានសម្រេចលាឈប់ពីការងារកាលពីសប្ដាហ៍មុន បន្ទាប់ពីមានការចរចាសម្របសម្រួលគ្នា។
កម្មករប្រហែល៦០០ នាក់បានជួបជុំគ្នានៅខាងមុខរោងចក្រនេះកាលពីដើមខែតុលាដើម្បី ទាមទារឲ្យថៅកែទទួលយកតំណាងកម្មករទាំង១៦នាក់វិញ ហើយនិងដកពាក្យបណ្ដឹងពីពួកគេផង។
លោក អ៊ុន ប៊ុនគា តំណាងកម្មករបានប្រាប់ថា កម្មករទាំង១៦នាក់បានសម្រេចលាឈប់ពីការងារហើយ និងបានទទួលប្រាក់អត្ថប្រយោជន៍ខ្លះៗពីក្រុមហ៊ុនផង។ លោកថា៖«យើងព្រមលាឈប់ពីក្រុមហ៊ុននេះ ព្រោះក្រុមហ៊ុនបានយល់ព្រមដកពាក្យបណ្ដឹងដែលប្តឹងពួកយើង។ បើក្រុមហ៊ុនមិនដកពាក្យបណ្ដឹងតាមផ្លូវច្បាប់ទេ យើងនឹងមិនលាឈប់ដែរ ព្រោះយើងបារម្ភថា មិនអាចរកការងារកន្លែងផ្សេងបាន ពេលយើងជាប់ឈ្មោះនៅតុលាការ»។
លោក អ៊ុន ប៊ុនគា និងកម្មករបួននាក់ទៀតនឹងចាប់ផ្ដើមធ្វើការងារថ្មីក្នុងនាមជា មន្ត្រីសហជីពសេរីកម្មករ(FTU)នៅថ្ងៃព្រហស្បតិ៍នេះក្នុងតួនាទីជាអ្នកសម្របសម្រួលកម្មករនៅតាមរោងចក្រឲ្យចូលជាសមាជិក សហជីពនេះ។
លោក ប៊ុនគា ប្រាប់ថា៖«ខ្ញុំមានការងារថ្មីនៅ FTU នឹងចាប់ផ្ដើមធ្វើការនៅថ្ងៃទី១ ខែវិច្ឆិកានេះ»។
លោក ម៉ាន់ សេងហាក់ អគ្គលេខាធិការសហជីពសេរីកម្មករក៏បានឲ្យដឹងដែរថា លោកបានចុះទៅធ្វើអន្តរាគមន៍សម្របសម្រួលជាមួយក្រុមហ៊ុន និងកម្មករដើម្បីបញ្ចប់ជម្លោះ ហើយអ្វីៗត្រូវបានបញ្ចប់រួចរាល់ហើយ។
លោកបន្តថា៖ «កម្មករយល់ព្រមលាឈប់ពីការងារ និងទទួលយកប្រាក់ខ្លះៗ ហើយក្រុមហ៊ុនបានប្រាប់យើងថា ពួកគេនឹងដកពាក្យបណ្ដឹងនិងមិនឲ្យយើងព្រួយបារម្ភពីបញ្ហានេះ ទេ»។
លោកបញ្ជាក់ថា កម្មករមានគម្រោងបន្តធ្វើកូដកម្ម ប៉ុន្តែបន្ទាប់ពីបានពិភាក្សាគ្នា ពួកគេបានស្នើឲ្យមន្ត្រីសហជីព FTU ជួយធ្វើអន្តរាគមន៍ជាមួយក្រុមហ៊ុនបញ្ចប់បញ្ហានេះ ព្រោះថា ពួកគេក៏មិនចង់ធ្វើឲ្យរឿងរ៉ាវកាន់តែធំឡើងៗដែរ ម្យ៉ាងការតវ៉ាកន្លងមកក៏មិនទាន់ទទួលបានការយល់ព្រមណាមួយពី ភាគីក្រុមហ៊ុនផង។
ប្រធានរដ្ឋបាលនៃរោងចក្រតេយ៉ុង លោក ព្រាប ឡេន ថ្លែងពីម្សិលមិញថា ជម្លោះរវាងកម្មករនិងរោងចក្របានបញ្ចប់ហើយ។
លោក ថា៖ «យើងបានបញ្ចប់ការតវ៉ានៅក្រុមហ៊ុនយើងហើយ ហើយកម្មករទាំង១៦នាក់នោះ ក៏បានលាឈប់ហើយដែរ។ ក្រុមហ៊ុនមិនទាន់បានដកពាក្យបណ្ដឹងពីតុលាការទេ ប៉ុន្តែ យើងបានចុះកិច្ចព្រមព្រៀងដើម្បីបញ្ចប់បញ្ហានេះរួចហើយ»៕
No comments:
Post a Comment
yes