លោក ម៉ម ប៊ុនហេង រដ្ឋមន្ត្រីក្រសួងសុខាភិបាល ចែកមុងជ្រលក់ថ្នាំដល់អ្នក
ភូមិនៅខេត្តសៀមរាបកាលពីខែកុម្ភៈ
ភ្នំពេញៈ ជំនួយប្រឆាំងជំងឺគ្រុនចាញ់ចំនួន៤៦,៩ លានដុល្លារ ដែលគ្រោងនឹងចាប់ផ្តើមនៅឆ្នាំក្រោយដោយអង្គការមូលនិធិសកល (The Global Fund) អាចបន្តទៅមុខបានលុះត្រាណាតែហិរញ្ញវត្ថុរបស់ខ្លួន មិនត្រូវបានគ្រប់គ្រងដោយមជ្ឈមណ្ឌលជាតិប្រយុទ្ធនឹងជំងឺគ្រុន ចាញ់។
សេចក្តីសម្រេចនេះ ធ្វើឡើងនៅចំពេលការស៊ើបអង្កេត មួយកំពុងដំណើរការ និងរក្សាការសម្ងាត់បំផុត ទៅលើភ្នាក់ងារសុខាភិបាលកម្ពុជា ដែលទទួលហិរញ្ញវត្ថុ ពីអង្គការមូលនិធិនេះ ហើយអ្នកនាំពាក្យរបស់ម្ចាស់ជំនួយផ្នែកសុខាភិបាលដ៏ធំបំផុតមួយនេះ កាលពីយប់ថ្ងៃព្រហស្បតិ៍សប្តាហ៍មុន បានថ្លែងថា៖«ភស្តុតាងជាច្រើន និងដែលអាចជឿជាក់បាន អំពីកំហុសខុសឆ្គងធ្ងន់ធ្ងរ ផ្នែកហិរញ្ញវត្ថុ ផ្នែកលទ្ធកម្ម និងផ្នែកបញ្ហាដទៃៗទៀត»។
ប្រធានផ្នែកទំនាក់ទំនងលោក Seth Faison បានសរសេរនៅក្នុងអ៊ីមែលមួយថា៖ «ចំណាត់ការភ្លាមៗនេះ ត្រូវបានធ្វើឡើងដើម្បីការពារសុខភាពរបស់ប្រជាជន ដែលគាំទ្រដោយជំនួយរបស់អង្គការមូលនិធិសកលក្នុងប្រទេសកម្ពុជា ដោយធ្វើការការពារក្នុងផ្នែកលទ្ធកម្ម ហិរញ្ញវត្ថុ និងការគ្រប់គ្រង។ អង្គការមូលនិធិសកលនិងភាគីពាក់ព័ន្ធក៏កំពុងពិចារណាផងដែរ អំពីការផ្លាស់ប្តូរនេះ»។
នៅក្នុងសេចក្តីប្រកាសមួយទៀត ដែលចេញផ្សាយនៅក្នុងកាសែតភាសាអង់គ្លេសក្នុងស្រុកកាលពីថ្ងៃ ពុធសប្តាហ៍មុន ដៃគូក្នុងស្រុករបស់អង្គការមូលនិធិនេះ បានសរសេរថា ការអនុម័តលើជំនួយលើកក្រោយ ស្ថិតនៅក្នុងលក្ខខណ្ឌអាស្រ័យលើគណៈកម្មាធិការសម្របសម្រួល ប្រចាំប្រទេស ដែលកំណត់ថា តើអ្នកណាត្រូវទទួលជំនួយ»។ ជំនួយត្រូវបានរំពឹងថា នឹងចូលជាធរមាននៅថ្ងៃទី ១ ខែមេសា ឆ្នាំ ២០១៣។ បច្ចុប្បន្ននេះ ទីភ្នាក់ងាររដ្ឋាភិបាល គឺមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្រ្ត និងបាណកសាស្រ្ត ដែលជាអ្នកសំខាន់ នឹងត្រូវទទួលជំនួយមានស្វយ័តភាពក្នុងការគ្រប់គ្រងហិរញ្ញវត្ថុ ដែលផ្តល់ដោយអង្គការមូលនិធិនេះ។
លោក តៃ ផល្លា ប្រធានផ្នែកយន្តការសម្របសម្រួលប្រចាំប្រទេសរបស់អង្គការមូលនិធិ សកលនិងជាអនុប្រធានអាជ្ញាធរជាតិប្រយុទ្ធប្រឆាំងជំងឺអេដស៍ បានថ្លែងថា សំណើនេះ បានធ្វើឡើងទៅតាមការស្នើសុំរបស់អង្គការមូលនិធិសកល ប៉ុន្តែបានបដិសេធមិននិយាយបន្ថែមទៀត អំពីបញ្ហានេះទេ។
សមាជិក ម្នាក់នៃយន្តការសម្របសម្រួលប្រចាំប្រទេសរបស់អង្គការមូលនិធិសកលបានថ្លែងថា អង្គការមូលនិធិសកលបានជឿថា ស្ថាប័នប្រយុទ្ធនឹងជំងឺគ្រុនចាញ់ របស់រដ្ឋាភិបាល មិនមានសមត្ថភាព ក្នុងការគ្រប់គ្រងហិរញ្ញវត្ថុទេ។
សមាជិក ដែលសុំមិនបញ្ចេញឈ្មោះម្នាក់នេះ បានថ្លែងបន្តថា៖ «ប្រហែលជាមានបញ្ហាសមត្ថភាព និងបញ្ហាគ្រប់គ្រងមួយចំនួន។ អង្គការមូលនិធិសកល បានស្នើយើងឲ្យផ្លាស់ប្តូរអ្នកដែលត្រូវទទួលជំនួយ ទើបតែនៅថ្ងៃទី៣០ ខែតុលា»។ ប្រភពនេះបន្តទៀតថា៖ «ប្រសិនបើមិនអាចរកបានស្ថាប័នណាមួយ ដែលមានលក្ខណៈគ្រប់គ្រាន់ អង្គការ UNDP អាចនឹងត្រូវបានផ្តល់ឲ្យនូវការងារគ្រប់គ្រងជំនួយទ្រង់ទ្រាយ ធំនេះ។ នៅក្នុងអ៊ីមែលមួយ ការិយាល័យអ្នកសម្របសម្រួលប្រចាំប្រទេសរបស់អង្គការសហប្រជាជាតិ បានថ្លែងថា ខ្ញុំមិនអាចអះអាងបានទេ ពីព្រោះខ្ញុំមិនអាចធ្វើអត្ថាធិប្បាយ លើសេចក្តីលម្អិតអំពីបញ្ហានេះទេ រហូតទាល់តែលទ្ធផលនៃការស៊ើបអង្កេតត្រូវបានបង្ហាញឡើង។
ការចោទប្រកាន់ដែលកំពុងមានអំពីអំពើពុករលួយ
ក្នុង រយៈកាលជាង ១៨ ខែ អង្គការនេះ ដែលមានមូលដ្ឋាននៅទីក្រុងហ្សឺណែវ (Geneva) បានធ្វើការស៊ើបអង្កេតមួយ មកលើកម្មវិធីផ្សេងៗក្នុងប្រទេសកម្ពុជា ហើយការស៊ើបអង្កេតនេះ ដឹកនាំដោយការិយាល័យអធិការកិច្ចរបស់ខ្លួន។
ចាប់តាំងពី ឆ្នាំ ២០០៣ មូលនិធិសកល ប្រឆាំងនឹងជំងឺអេដស៍ ជំងឺរបេង និងគ្រុនចាញ់ ក្នុងប្រទេសកម្ពុជា បានផ្តល់ជំនួយចំនួន១១៦,៨ លានដុល្លារ សម្រាប់តែកម្មវិធីជំងឺគ្រុនចាញ់តែមួយប៉ុណ្ណោះ និង ៣៥៣,៣ លានដុល្លារ សម្រាប់កម្មវិធីជំងឺទាំងអស់ខាងលើ។ ប៉ុន្តែក្នុងចំណោមកម្មវិធីជំងឺទាំងនេះ មានតែកម្មវិធីជំងឺគ្រុនចាញ់មួយប៉ុណ្ណោះដែលទទួលរងការចោទ ប្រកាន់ជាច្រើនពាក់ព័ន្ធនឹងអំពើពុករលួយ និងការគ្រប់គ្រងហិរញ្ញវត្ថុមិនត្រឹមត្រូវ។
នៅក្នុងសវនកម្ម ចុងក្រោយ ដែលចេញផ្សាយក្នុងខែតុលាឆ្នាំ២០១០ មន្រ្តីអធិការកិច្ចបានរៀបរាប់លម្អិត អំពីសកម្មភាពមិនត្រឹមត្រូវនិងមិនស្មោះត្រង់ លើផ្នែកហិរញ្ញវត្ថុ នៅក្នុងមជ្ឈមណ្ឌលជាតិ ប្រយុទ្ធនឹងជំងឺគ្រុនចាញ់ ដូចជាការក្លែងបន្លំ ដើម្បីបើកប្រាក់ និងការគ្រប់គ្រងថវិកាខុស។ របាយការណ៍នេះ បានឲ្យដឹងថា ក្នុងឆ្នាំ២០០៨ មានការចំណាយមិនត្រឹមត្រូវ ចំនួនជិត១៨ ០០០ ដុល្លារ។ នៅក្នុងករណីកត់សម្គាល់ពិសេសមួយ ការចំណាយទៅលើអ្នកឆុងកាហ្វេគឺមានចំនួន១៥៩០ ដុល្លារ និងករណីមួយទៀត គឺការចំណាយលើទូរស័ព្ទចំនួន ៤គ្រឿង ដែលទិញឲ្យអ្នកគ្រប់គ្រងគឺមានចំនួន ៣៤៤០ ដុល្លារ។
ការ ស៊ើបអង្កេត ក៏បានបង្ហាញផងដែរ អំពីកាលវិភាគនៃការធ្វើដំណើរហួសហេតុ ដែលកាត់ចេញពីសកម្មភាព ដែលត្រូវធ្វើដំណើរស្នូលរបស់កម្មវិធីនេះ ហើយវាបានធ្វើឲ្យប៉ះពាល់ដល់ប្រសិទ្ធភាពនៃកម្មវិធី ដោយសារបុគ្គលិកមិនអាចធ្វើដំណើរតាមកាលវិភាគនោះបាន ដើម្បីបំពេញការងាររបស់ខ្លួនសម្រាប់កម្មវិធីនេះ។
លោកវេជ្ជ បណ្ឌិត ច ម៉េងចួរ នាយកមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ និងអនុប្រធានលោក វេជ្ជបណ្ឌិត ខេង ស៊ីម និងប្រធានផ្នែករដ្ឋបាលលោក វេជ្ជបណ្ឌិត មុត ស៊ីនួន មិនអាចទាក់ទងសុំអត្ថាធិប្បាយបានទេ កាលពីចុងសប្តាហ៍មុន។
របាយការណ៍បានកត់សម្កាល់ថា៖ « បញ្ហាសំខាន់ៗ... ដែលនៅមានរួមមាន ហានិភ័យផ្នែកគ្រប់គ្រង ដូចជា ភាពខ្សោយខ្លាំងក្នុងការព្យាករការកំណត់បរិមាណ និងការបំពេញលក្ខខណ្ឌកាតព្វកិច្ច និងបញ្ហាគ្រប់គ្រងហិរញ្ញវត្ថុ»។
របាយការណ៍បន្ត៖ «ជាការឆ្លើយតប នឹងការរកឃើញរបស់ការិយាល័យអធិការកិច្ច លេខាធិការដ្ឋាន កំពុងធ្វើការពិចារណាលើការកាត់បន្ថយសកម្មភាពជំនួយ និងរឹតបន្តឹងការការពារដូចជា ផ្នែកលទ្ធកម្ម និងផ្នែកហិរញ្ញវត្ថុ»។
ខណៈអង្គការមូលនិធិសកល បានអះអាងអំពីសកម្មភាពការពារថ្មី អ្នកនាំពាក្យម្នាក់បានបញ្ជាក់ថាអង្គការមិនមានបំណងបញ្ឈប់ ជំនួយទេ ហើយស្វែងរកការគូសបញ្ជាក់ អំពីលទ្ធផលជោគជ័យ ដែលបានធ្វើឡើងក្នុងបណ្តាឆ្នាំកន្លងមក រួមទាំងការធ្លាក់ចុះចំនួន៨០ភាគរយនៃករណីស្លាប់ ដោយសារជំងឺគ្រុនចាញ់។
តំណាងអង្គការ UNDP ស្ថានទូតបារាំង និងស្ថានទូតអូស្រ្តាលី បានថ្លែងថា ពួកគេបានដឹងអំពីការស៊ើបអង្កេតនេះ ប៉ុន្តែបានបដិសេធមិនធ្វើអត្ថាធិប្បាយទេ រហូតដល់អង្គការមូលនិធិសកល ចេញផ្សាយរបាយការណ៍របស់ខ្លួន ដែលគ្រោងនឹងចេញពីពីរបីសប្តាហ៍ខាងមុខ។
អ្នកនាំពាក្យស្ថាន ទូតអូស្រ្តាលី បានសរសេរនៅក្នុងអ៊ីមែលមួយថា៖ «ក្នុងនាមជាម្ចាស់ជំនួយមួយដល់មូលនិធិសកល មូលនិធិ AusAID ពិតជាមានក្តីបារម្ភណាស់ ចំពោះការចោទប្រកាន់ទាំងនោះ ហើយកំពុងតែរង់ចាំលទ្ធផលនៃការស៊ើបអង្កេត មុនពេលចាត់វិធានការណាមួយបន្តទៀត»។
អ្នកនាំពាក្យក្រសួង សុខាភិបាល លោក លី សុវណ្ណ បានថ្លែងថា លោកមិនអាចធ្វើអត្ថាធិប្បាយបានទេ ពីព្រោះលោកមិនបានពាក់ព័ន្ធជាមួយកម្មវិធីជំងឺគ្រុនចាញ់ឡើយ ខណៈដែលអ្នកឆ្លើយទូរស័ព្ធរបស់លោក ម៉ម ប៊ុនហេង រដ្ឋមន្រ្តីក្រសួងសុខាភិបាលបានថ្លែងថា គាត់គ្រាន់តែជាអ្នកបើកឡាន៕
No comments:
Post a Comment
yes