ខេត្តស្វាយរៀង: ក្រុមកម្មករកាត់ដេរប្រមាណ ៣៥០ នាក់ នៅព្រឹកថ្ងៃចន្ទ ទី៣១ ខែធ្នូ ឆ្នាំ២០១២ បានប្រមូលផ្តុំគ្នាជិះឡានកាំមីញ៉ុង ៥ ឡាន លើកបដា ហែក្បួនពីទីក្រុងបាវិត មកកាន់ទីរួមខេត្តស្វាយរៀង ដើម្បីស្វែងរកអន្តរាគមន៍ពីអាជ្ញាធរខេត្ត ឲ្យអន្តរាគមន៍ក្នុងករណីរោងចក្រកាត់ដេរ ដែលមានកម្មករជាង ១០០០ នាក់ បានបិទទ្វារ ហើយទូទាត់ប្រាក់ខែកម្មករ មិនបានសមរម្យ។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ ដែលចូលរួមដឹកនាំកម្មករធ្វើការតវ៉ា បានឲ្យដឹងថា "ក្រុមកម្មករ ដែលបានលើកគ្នាមកកាន់សាលាខេត្តស្វាយរៀង នៅព្រឹកនេះ គឺទាមទារឲ្យលោកអភិបាលខេត្ត ជួយអន្តរាគមន៍ ក្នុងករណីក្រុមហ៊ុនរោងចក្រកាត់ដេរស្វាយរៀង កាំបូឌា ហ្គាមិន ( Svay Rieng Cambodia Garment ) នៅក្រុងបាវិត បានបិទទ្វារលែងដំណើរការ ហើយទូទាត់ប្រាក់អត្ថប្រយោជន៍ជូនកម្មករ មិនត្រឹមត្រូវតាមផ្លូវច្បាប់"។
ក្រុមហ៊ុនរោងចក្រកាត់ដេរ ស្វាយរៀង កាំបូឌា ហ្គាមិន បានប្រកាសបិទទ្វារ ដោយប្រាប់មូលហេតុថា ក្ស័យធន ហើយផ្តល់ដំណោះស្រាយដល់កម្មករ ចំនួន ៣ ចំណុច គឺទី១-ការជូនដំណឹង។ ទី២-បើកប្រាក់ខែចុងក្រោយ និងទី៣-ប្រាក់បំណាច់ឆ្នាំ។ តែក្រុមកម្មករជាង ១.០៥០ នាក់ នៅរោងចក្រនោះ ទាមទារឲ្យក្រុមហ៊ុនរោងចក្រកាត់ដេរនោះ ផ្តល់បន្ថែម ២ ចំណុចទៀត គឺទី១-ប្រាក់បំណាច់បណ្ដេញចេញ និងទី២-សោហ៊ុយជំងឺចិត្ត។
ក្រុមកម្មករ បានផ្ទុះការតវ៉ា ចាប់តាំងពីថ្ងៃទី២៥ ខែធ្នូ ឆ្នាំ២០១២ នៅពេលដែលរោងចក្រកាត់ដេរនោះ បានប្រកាសជូនដំណឹងពីការបិទទ្វាររោងចក្រ។ ប៉ុន្តែមិនមានដំណោះស្រាយ។
នៅព្រឹកនេះ ក្នុងពេលកម្មករលើកគ្នាមកកាន់សាលាខេត្តស្វាយរៀង កម្មករបានដាក់សំណើទៅកាន់អាជ្ញាធរខេត្ត ដោយមានអភិបាលរងខេត្ត រួមទាំងគណៈកម្មការដោះស្រាយកូដកម្ម បាតុកម្ម និងមន្ទីរការងារខេត្តស្វាយរៀង ចូលរួមដោះស្រាយជាមួយនឹងតំណាងកម្មករកាត់ដេរ។ ប៉ុន្តែមកដល់ម៉ោង ១០ ព្រឹកនេះ មិនទាន់មានលទ្ធផលបែបណាទេ៕
សារព័ត៌មានជួយខ្មែរ
No comments:
Post a Comment
yes