ដីនៅក្បែរស្ថានទូតប្រទេសអូស្រ្តាលី ត្រូវបានទុកទំនេរចោល
មានដីឡូត៍ធំៗជាច្រើននៅតំបន់មុខ និងក្រោយក្រសួងការបរទេសនិងសហប្រតិបត្តិការអន្តរជាតិបានទុកទំនេរជាយូរមកហើយបើទោះបីដីទាំងនោះមានគម្រោងអភិវឌ្ឍន៍ជាអគារនិងមជ្ឈមណ្ឌលពាណិជ្ជកម្មក្តីប៉ុន្តែមួយទសវត្សរ៍កន្លងមកក៏គម្រោងទាំងនោះនៅតែស្ថិតក្នុងគម្រោងខ្យល់ដដែល។
លោក ស៊ឹង ប៊ុណ្ណា អគ្គនាយកក្រុមហ៊ុនប៊ុណ្ណា រៀលធីគ្រុប និងជាប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា បាននិយាយថាដីទាំងនោះពិតជានៅទំនេរនៅពេលវាស្ថិតនៅចំរបត់នៃសង្គមថាតើយើងគួរគ្រប់គ្រងអចលនទ្រព្យដែលទំនេរឬក៏ធ្វើបែបណា។ហេតុនេះទាមទារឲ្យរាជរដ្ឋាភិបាលជំរុញនិងលើកទឹកចិត្តឲ្យមានការអភិវឌ្ឍព្រមទាំងការពារអ្នកវិនិយោគ។លោកបន្តថាប្រសិនបើដីទាំងនោះគ្មានការអភិវឌ្ឍគេអាចចាប់បង្ខំឬដាក់ទោសទណ្ឌតាមរូបភាពផ្សេងៗទៅលើអ្នកកាន់កាប់ដីធ្លីទាំងនោះជាជាងទុកឲ្យដីទំនេរចោលយូរបែបនេះ។
លោកថ្លែងថា៖«រាជរដ្ឋាភិបាលកម្ពុជាគួរគិតពីរឿងនេះព្រោះវាអាចនឹងនាំឲ្យមានការអភិវឌ្ឍយឺតដែលប្រៀបដូចជាមានតែហាងឆេងតែគិតលេខមិនចេញគឺដូចជាម៉ាស៊ីនគិតលេខអស់ថ្មអ៊ីចឹង»។លោកបានបន្តថា៖«ដីទាំងនោះស្ថិតនៅចំទីតាំងល្អកណ្តាលរាជធានីនិងមានដង់ស៊ីតេប្រជាជនច្រើនឲ្យតែអភិវឌ្ឍអ្វីមួយជាការល្អព្រោះការទុកដីទំនេរយូរមិនខុសពីផ្ទះធ្វើរួចទុកចោលនាំឲ្យមានធូលីពុកផុយនិងអាចខ្លាចមិនហ៊ានចូលទៅរស់នៅនោះទេ»។
លោក ប៊ុណ្ណា បានប្រាប់ទៀតថាដីនៅម្តុំមាត់ទន្លេទាំងនោះមានតម្លៃចាប់ពី១.៥០០ដល់២.៥០០ដុល្លារក្នុងមួយម៉ែត្រការ៉េ។
លោក ឌឹត ចណ្ណា ប្រធានគ្រប់គ្រងអចលនទ្រព្យវីអឹមស៊ីមានប្រសាសន៍ថាតាមលោកដឹងដីទាំងនោះសុទ្ធតែមានគម្រោងអភិវឌ្ឍន៍រួចហើយ ប៉ុន្តែម្ចាស់គម្រោងទាំងនោះប្រហែលជារង់ចាំមើលស្ថានភាពសេដ្ឋកិច្ច។ ប៉ុន្តែបើដីទុកទំនេរចោលយូរបែបនេះមិនល្អឡើយ សម្រាប់មុខមាត់ប្រទេសក៏ដូចជាការខាតបង់សេដ្ឋកិច្ចផងដែរ។ លោកបានបន្តថាប្រសិនបើគម្រោងទាំងនោះចាប់ផ្តើមវាអាចជួយដល់សេដ្ឋកិច្ចជាតិតាមរយៈការផ្តល់ការងារធ្វើដល់ពលករនិងផ្តល់សោភណភាពដល់រាជធានីរបស់យើងទៀតផង។
លោកអះអាងថា៖«ខ្ញុំដឹងថាដីទាំងនោះសុទ្ធតែមានគម្រោងសាងសង់អស់ហើយ ប៉ុន្តែបើមិនសង់បែបនេះគួរតែលក់ចេញ។ ដីនៅទីនោះបើសង់អាផាតមិន ឬសណ្ឋាគារ កម្ពស់២០ជាន់ក៏អាចផ្តល់ចំណូល១ខែពី៣០.០០០ទៅ៤០.០០០ដុល្លារដែរ»។លោកបន្តថា៖«ដីទាំងនោះស្ថិតនៅចំទីតាំងល្អប្រសិនបើមានគម្រោងអភិវឌ្ឍន៍វានឹងដំណើរការល្អហេតុនេះដីទាំងនោះមិនគួរទុកចោលទេ»។
លោកវិស្វករ អួង គឹមសាយ ប្រធានគ្រប់គ្រងការសាងសង់នៃគម្រោង Bali Scenery បាននិយាយថាថៅកែធំរបស់លោកមានបំណងទិញដីទាំងនោះសម្រាប់សាងសង់ខុនដូនិងអាផាតមិនដែរប៉ុន្តែម្ចាស់ដីទាំងនោះមិនព្រមលក់ទេ ពីព្រោះដីទាំងនោះសុទ្ធតែមានគម្រោងសម្រាប់អភិវឌ្ឍន៍ធ្វើជាអគារពាណិជ្ជកម្មធំៗទាំងអស់។
លោក ខៀវ ធារិទ្ធ នាយកគ្រប់គ្រងដីនិងទីលានបាល់ទាត់ 3G Picth ដែលជាកម្មសិទ្ធិរបស់លោកឧកញ៉ា គិត ម៉េងបាននិយាយថាដីនេះលោកឧកញ៉ាទុកសម្រាប់ជួលមិនលក់នោះទេប៉ុន្តែរហូតមកដល់ពេលនេះលោកឧកញ៉ាមិនទាន់មានគម្រោងអភិវឌ្ឍន៍អ្វីលើដីនេះនៅឡើយទេ៕
No comments:
Post a Comment
yes