ភ្នំពេញ៖ ប្រជាពលរដ្ឋសហគមន៍បឹងកក់ និងបុរីកីឡា នៅរាជធានីភ្នំពេញទទូចនៅថ្ងៃនេះឲ្យសាលាដំបូងរាជធានីភ្នំពេញ ដោះលែងសកម្មជនដីធ្លីពីរនាក់ របស់គេនៅថ្ងៃពុធស្អែកនេះ ដើម្បីបង្ហាញពីភាពយុត្តិធម៌របស់តុលាការ ដែលកំពុងរងការរិះគន់។
ការទទូចនេះធ្វើឡើង មួយថ្ងៃមុនការបើកការកាត់ក្តីនៅរសៀលថ្ងៃពុធស្អែកនេះ លើសកម្មជនទាំងពីរ គឺអ្នកស្រី ទឹម សាក់មុនី ក្រោមបណ្តឹងរបស់ប្រធានក្រុមហ៊ុនផានអ៊ីម៉ិច រឿងជម្លោះដីធ្លីនៅបុរីកីឡា ក្រោមបទចោទថាញុះញង់ឲ្យមានបទឧក្រិដ្ឋ និងអ្នកស្រី យ៉ោម បុប្ផា ត្រូវចោទពីបទប្រើហិង្សាដោយចេតនា និងមានស្ថានទម្ងន់ទោស រឿងជម្លោះដីធ្លីនៅបឹងកក់។
តំណាងឲ្យសហគមន៍បុរីកីឡា អ្នកស្រី ជុំ ង៉ាន់ មានប្រសាសន៍ថា ក្រុមរបស់អ្នកស្រីនឹងទៅចូលរួមលើកទឹកចិត្តសកម្មជនទាំងពីរ និងអំពាវនាវឲ្យតុលាការដោះលែងសកម្មជនទាំងពីរជាបន្ទាន់៖ «ខ្ញុំចង់ស្រែកទាមទារឲ្យតុលាការមានយុត្តិធ៌មអឺ!ឯករាជ្យ ដូចថា កុំយកអ្នកដែលអត់ទោសទៅដាក់នៅពន្ធនាគារអីចឹង គឺថាពួកគាត់គ្រាន់តែទាមទារសិទិ្ធរស់រានមានជីវិតរបស់គាត់សោះ ហេតុអីបានជាសមត្ថកិច្ចមកចាប់គាត់ដាក់ពន្ធនាគារ អយុត្តិធ៌មណាស់» ?។
« ខ្ញុំតំណាងអ្នកភូមិបឹងកក់ អ្នកស្រី ហេង មុំ បានឲ្យដឹងនៅព្រឹកថ្ងៃអង្គារនេះថា សកម្មជនទាំងពីរដែលកំពុងជាប់ពន្ធនាគារនៅព្រៃសជាសកម្មជនស្លូតត្រង់ ដូច្នេះសុំឲ្យតុលាការ បង្ហាញភាពឯករាជ្យលើករណីនេះ »។ អ្នកស្រីបានបន្តថា «ព្រោះអី ខ្ញុំសម្គាល់ទៅលើ អ្នកស្រី ទឹម សាក់មុនី និងអ្នកស្រី យ៉ោម បុប្ជា គាត់ជាសកម្មជនការពារដីធ្លី គាត់គ្មានកំហុសអីទេ ហេតុអីបានជាគេចោទប្រកាន់ ដែលនៅក្នុងហ្នឹងអ្នកស្រីក៍បានសុំស្នើឲ្យប្រព័ន្ធតុលាការហ្នឹង ត្រូវឯករាជ្យ ហើយពិនិត្យឲ្យបានម៉ត់ចត់នូវរឿងរ៉ាវ ដែលសមត្ថកិច្ចបានចាប់ខ្លួនអ្នកស្រី ទឹម សាក់មុនី នឹងអ្នកស្រី យ៉ោម បុប្ជាយកទៅដាក់នៅពន្ធនាគារព្រៃស បែបនេះទៅវិញគ្រាន់តែពួកគាត់ទាមទារនិងការពារសិទិ្ធរស់នៅតែប៉ុណ្ណោះ តើវាខុសដែរមែនទេ»។
សូមបញ្ជក់ថា កាលពីថ្ងៃទី២០ ខែធ្នូ ឆ្នាំ២០១២ អង្គការលើកលែងទោសអន្តរជាតិ (Amnesty International) អំពាវនាវជាលើកទី២ឲ្យកម្ពុជាដោះលែងសកម្មជនដីធ្លីពីរនាក់ របស់សហគមន៍មានជម្លោះដីធ្លី នៅរាជធានីភ្នំពេញ ជាបន្ទាន់និងគ្មានលក្ខខណ្ឌ ដើម្បីជាសញ្ញាវិជ្ជមានមួយសម្រាប់ចុងឆ្នាំ២០១២នេះ។
អង្គការលើកលែងទោសអន្តរជាតិនិយាយថា សកម្មជនដីធ្លីពីរនាក់ នោះត្រូវតែដោះលែងជាបន្ទាន់ និងគ្មានលក្ខខណ្ឌ។ អង្គការនោះបន្តថា អាជ្ញាធរកម្ពុជាព្យាយាមបំបិទសំឡេងសកម្មជនដីធ្លីទាំងពីរនាក់ ដែលហ៊ានចេញមុខតវ៉ាសម្រាប់សហគមន៍របស់ពួកគេ។
ប្រសិនបើរកឃើញសកម្មជនទាំងពីរនាក់ នោះអាចប្រឈមនឹងការជាប់ពន្ធនាគារ ពី៦ខែ ទៅ៥ឆ្នាំ។ កន្លងទៅ អ្នកនាំពាក្យរដ្ឋាភិបាល លោក ផៃ ស៊ីផាន ធ្លាប់បានមានប្រសាសន៍ប្រាប់ក្រុមអ្នកសារព័ត៌មានថា នេះជាសិទ្ធិរបស់សង្គមស៊ីវិលអន្តរជាតិ ក្នុងការទាមទារឲ្យដោះលែងសកម្មជនដីធ្លី តែករណីនេះស្ថិតនៅលើនីតិវិធីរបស់តុលាការ។
គួរបញ្ជាក់ថា សកម្មជនដីធ្លីទាំងពីរនាក់ តំណាងឲ្យអ្នកភូមិរាប់រយនាក់ នៅសហគមន៍ពីរក្នុងរាជធានីភ្នំពេញ គឺសហគមន៍បឹងកក់ និងបុរីកីឡា បានតស៊ូមតិទាមទារសិទ្ធិដីធ្លី។ ជម្លោះដីធ្លីនេះ មានជាប់ពាក់ព័ន្ធនឹងក្រុមហ៊ុនពីរ គឺក្រុមហ៊ុនស៊ូកាគូអ៊ីន និងក្រុមហ៊ុនផានអ៊ីម៉ិច ដែលធ្វើឲ្យមានការតវ៉ាជាបន្តបន្ទាប់។
ចំណែកសហគមន៍បឹងកក់ដែលមានទំនាស់ជាច្រើនឆ្នាំមកនោះជាមួយក្រុមហ៊ុនស៊ូកាគូអ៊ីន ដែលមានម្ចាស់ជាមន្ត្រីជាន់ខ្ពស់ក្នុងជួររាជរដ្ឋាភិបាលនិងបម្រើការងារនៅព្រឹទ្ធសភានោះ បាននាំគ្នាធ្វើការតវាច្រើនលើកច្រើនសារ និងស្វែងរកការជួយអន្តរាគមន៍ពីស្ថានទូត និងបណ្តាប្រទេសម្ចាស់ជំនួយ ដើម្បីអន្តរាគមន៍ទៅរដ្ឋាភិបាល ក្រោយមកត្រូវបានប្រមុខដឹកនាំរាជរដ្ឋាភិបាលកម្ពុជា សម្តេចតេជា ហ៊ុន សែន នាយករដ្ឋមន្ត្រី បានចេញបញ្ជាឲ្យសាលារាជធានីភ្នំពេញនិងស្ថាប័នពាក់ព័ន្ធ ចុះវាស់វែងនិងកាត់ដីទំហំ១២,៤៤ហិកតា ចេញពីក្រុមហ៊ុនស៊ូកាគូអ៊ីន ប្រគល់ឲ្យទៅប្រជាពលរដ្ឋរស់នៅតំបន់បឹងកក់ ដែលនៅសេសសល់ពីការបណ្តេញចេញ ធ្វើការអភិវឌ្ឍន៍ដោយខ្លួនឯង ប៉ុន្តែរហូតមកដល់ពេលនេះនៅតែគ្មានដំណោះស្រាយដដែល ។
ដោយឡែកសហគមន៍បុរីកីឡាជាមួយ និងក្រុមហ៊ុនផានអ៊ីម៉ិច បានធ្វើការតវា និងទាមទារឲ្យម្ចាស់ក្រុមហ៊ុន គឺលោកស្រី ស៊ុយ សុផាន គោរពកិច្ចសន្យាឲ្យសាងសង់អាគារ១០ នៅពេលនេះក្រុមហ៊ុនផានអ៊ីម៉ិច បានសាងសង់អាគារ៨នៅខ្វះ២អាគារទៀត ក្រោមឡេសក្ស័យធន់។ ក្រោយមកនៅក្នុងខែមករា ឆ្នាំ២០១២នេះក្រុមហ៊ុនផានអ៊ីម៉ិច បានប្រើគ្រឿងចក្រ និងកម្លាំងសមត្ថកិច្ចជាច្រើនរយនាក់ ចុះទៅធ្វើការឈូសឆាយ និងវាយកម្ទិចលំនៅឋានប្រជាពលរដ្ឋនៅសហគមន៍បុរីកីឡានិងបានចាប់ប្រជាពលរដ្ឋជាច្រើននាក់ដាក់ពន្ធនាគារថែមទៀត ក្នុងគោលបំណងបំបាក់ស្មារតី នៅពេលនោះមានអ្នកខ្លះព្រមទទួលយកសំណងបន្តិចបន្តួច ជាថ្នូរចាកចេញទៅរស់នៅឯជាយរាជធានីភ្នំពេញ៕
No comments:
Post a Comment
yes