បន្ទាប់ពីសមត្ថកិច្ចខេត្តរតនគិរី ចាប់បានពលរដ្ឋវៀតណាម ៧នាក់ ដែលសង្ស័យលួចឆ្លងដែនមកកាប់ឈើលើដីខ្មែរមក ក្រុមសហគមន៍ការពារព្រៃឈើរាយការណ៍ថា មានគំនរឈើមូល ៤កន្លែងទៀត ត្រូវគេកាប់ថ្មីៗនៅចម្ងាយប្រមាណ ៤គីឡូម៉ែត្រពីប៉ុស្តិ៍ការពារព្រំដែនខេត្តរតនគិរី។
ឈើមូល ឬឈើហ៊ុបចំនួន ២៩០ដើមថ្មីទៀត ត្រូវបានសហគមន៍ការពារព្រៃឈើភូមិឡំ ឃុំប៉ក់ញ៉ៃ ស្រុកអូរយ៉ាដាវ រកឃើញនៅចម្ងាយប្រមាណ ៤គីឡូម៉ែត្រពីប៉ុស្តិ៍ការពារព្រំដែនអូរថ្មដា។
តំណាងសហគមន៍លោក រម៉ាស់ ស្វាត់ នៅថ្ងៃច័ន្ទ ទី២៤ ខែធ្នូ ឆ្នាំ២០១២ មានប្រសាសន៍បញ្ជាក់ថា សមាជិកសហគមន៍មានគ្នា ៨នាក់បានដើរល្បាតក្នុងព្រៃចំងាយ ៣គីឡូម៉ែត្រពីទីតាំងកាប់ឈើដែលក្រុមសមត្ថកិច្ចស្ទាក់ចាប់បានពលរដ្ឋវៀតណាម ៧នាក់ កាលពីថ្ងៃទី២០ ធ្នូ កន្លងទៅ ហើយបានប្រទះឃើញគំនរឈើថ្មីនេះ។
លោកបន្តថា គំនរឈើនេះត្រូវគេកាប់ហើយយកមកគរទុកនៅទីនោះប្រមាណ ២ថ្ងៃប៉ុណ្ណោះ ក៏ប៉ុន្តែសហគមន៍មិនឃើញមានមុខសញ្ញា ឬអ្នកទទួលខុសត្រូវជាម្ចាស់ឈើនោះឡើយ៖ «ថ្ងៃម្សិលខ្ញុំទៅអត់ឃើញមានមនុស្សទេ ខ្ញុំអត់ឃើញរោងគេទេ ឃើញតែឈើមូលទេ។ គេកាប់ថ្មីកន្លែងហ្នឹងគេមិនទាន់ដឹកទេ គេប្រមូលគរៗទុក អត់ឃើញវាយត្រា ប្រហែលគេខុសច្បាប់មិនដឹង។ អត់កាប់យប់ទេកាប់ថ្ងៃ គេធ្វើដូចអាជីវកម្មធំ ឲ្យតែឈើល្អ ឈើប្រភេទណាក៏គេកាប់ទាំងអស់ ចាប់ពីមុខម្ភៃឡើងទៅ»។
កាលពីថ្ងៃទី២០ ខែធ្នូ សមត្ថកិច្ចចម្រុះនៃអាជ្ញាធរខេត្តរតនគិរី រួមទាំងសហគមន៍ការពារព្រៃឈើភូមិឡំ បានស្ទាក់ចាប់បានពលរដ្ឋវៀតណាម ៧នាក់ ម៉ាស៊ីនកាត់ឈើ ៤គ្រឿង និងត្រាក់ទ័រ ២គ្រឿងនៅចំណុចព្រំប្រទល់ព្រៃសហគមន៍ និងក្រុមហ៊ុនសម្បទានវៀតណាម៧២ ហើយបន្ទាប់នេះមួយថ្ងៃ ក្រុមសហគមន៍បានប្រទះឃើញក្រុមជនជាតិវៀតណាម មួយក្រុមទៀតមានគ្នា ១២នាក់ ប្រដាប់ដោយម៉ាស៊ីនកាត់ឈើ ៤គ្រឿង និងត្រាក់ទ័រ ៣គ្រឿងនៅបន្តអាររំលំឈើនៅចំណុចព្រៃក្បែរក្រុមហ៊ុនសម្បទានវៀតណាម ឈ្មោះ ដាយដុងយឿង ចំងាយ ៣គីឡូម៉ែត្រពីក្រុមហ៊ុន៧២។
នាយរងខណ្ឌរដ្ឋបាលព្រៃឈើ ខេត្តរតនគិរី លោក ផាន់ ភីន មានប្រសាសន៍បញ្ជាក់ថា លោកទើបទទួលបានសេចក្ដីរាយការណ៍ពីករណីនេះដូចគ្នា ហេតុនេះលោកនឹងចាត់សមត្ថកិច្ចចុះទៅកាន់ទៅទីតាំងនោះ៖ «ចាំមើលខ្ញុំចុះទៅស៊ើបអង្កេតប្រហែលជាល្ងាចហ្នឹង ស្អែក»។
អ្នកសម្របសម្រួលសមាគមអាដហុក ខេត្តរតនគិរី លោក ឆាយ ធី កត់សំគាល់ថា តាមវត្ថុតាងដែលលោក និងក្រុមសហគមន៍បានទៅដល់កន្លែងកាប់ឈើនាំឆ្លងដែនខុសច្បាប់ចេញទៅប្រទេសវៀតណាម គឺជាតំបន់ជាប់នឹងក្រុមហ៊ុនសម្បទានសេដ្ឋកិច្ចវៀតណាម ពីរ គឺក្រុមហ៊ុនដាយដុងយឿង និងក្រុមហ៊ុន៧២។
លោកបន្តថា ការដឹកជញ្ជូនឈើឆ្លងដែននេះ មិនអាចធ្វើទៅបានងាយស្រួលទេ ពីព្រោះតំបន់នេះមានក្រុមហ៊ុនសម្បទាន និងមានតម្រួតព្រំដែនដាក់ប៉ុស្តិ៍ត្រួតពិនិត្យ។
លោកអំពាវនាវឲ្យស៊ើបអង្កេតករណីនេះឲ្យបានជាក់លាក់៖ «ខ្ញុំក៏បានអន្តរាគមន៍ព្រឹកមិញភ្លាមៗ ដើម្បីឲ្យចាត់វិធានការតាមនីតិវិធីបន្តទៀត»។
លោកអំពាវនាវឲ្យស៊ើបអង្កេតករណីនេះឲ្យបានជាក់លាក់៖ «ខ្ញុំក៏បានអន្តរាគមន៍ព្រឹកមិញភ្លាមៗ ដើម្បីឲ្យចាត់វិធានការតាមនីតិវិធីបន្តទៀត»។
ចៅក្រមស៊ើបសួរនៃតុលាការខេត្តរតនគិរី លោក ឯក ប៉ូលីហ្វៀល មានប្រសាសន៍បញ្ជាក់ថា ពលរដ្ឋវៀតណាមទាំង ៧នាក់ ត្រូវបានចោទប្រកាន់ និងឃុំខ្លួនបណ្ដោះអាសន្នតាមផ្លូវតុលាការ ដើម្បីបើកការស៊ើបអង្កេតបន្ត។ លោកបន្តថា បានជូនដំណឹងទៅក្រសួងការបរទេសវៀតណាម រួចហើយ ស្តីពីការចាប់ខ្លួនពលរដ្ឋវៀតណាមនេះ៕
No comments:
Post a Comment
yes