៨-មករា-២០១៣៖ លោក សឿង យ៉ារាត់ ពិការជើងដោយសារប៉ូលិសក្រុមហ៊ុនឌី.អឹម
គ្រុប បាញ់កាលពីឆ្នាំ២០០៩ និងអ្នកភូមិនៅលើដីដែលគេកាប់ដើមឈើអ្នកភូមិអស់
នៅភូមិសាយ៉ោះលើ ឃុំកាឡែង ស្រុកលំផាត់ ខេត្តរតនគិរី
ប្រជាពលរដ្ឋជនជាតិដើមភាគតិច ១២គ្រួសារ នៅខេត្តរតនគិរី បានរត់ចោលផ្ទះសម្បែងដោយសារភ័យខ្លាចកូនប្រុសម្ចាស់កសិដ្ឋានម្នាក់ប្រើអាវុធគំរាមសម្លាប់។ គេបានបង្ខំឲ្យពួកគាត់ចាកចេញពីផ្ទះ ហើយប្រគល់ដីទៅឲ្យម្ចាស់កសិដ្ឋាននោះ។ មន្ត្រីឃ្លាំមើលសិទ្ធិមនុស្ស ចាត់ទុកថានេះគឺជាអំពើរំលោភសិទ្ធិមនុស្សធ្ងន់ធ្ងរ។
មន្ត្រីឃ្លាំមើលសិទ្ធិមនុស្ស ឲ្យដឹងថា ប្រជាពលរដ្ឋម្នាក់ក្នុងចំណោម ១២គ្រួសារបានបោះបង់ផ្ទះសម្បែងមកសុំស្នាក់អាស្រ័យនៅការិយាល័យសមាគមអាដហុក (Adhoc) ដើម្បីការពារអាយុជីវិតពីការគំរាមសម្លាប់។
មន្ត្រីស៊ើបអង្កេតជាន់ខ្ពស់នៃសមាគមអាដហុក លោក ប៉ែន ប៊ុណ្ណារ៍ មានប្រសាសន៍បញ្ជាក់ថា មន្ត្រីលោកបានសម្រេចផ្តល់កន្លែងស្នាក់អាស្រ័យបណ្ដោះអាសន្នជូនអ្នកភូមិនោះហើយ នៅថ្ងៃពុធ ទី៩ ខែមករា ឆ្នាំ២០១៣។ លោកបន្តថា តាមការស៊ើបអង្កេតរបស់លោករកឃើញថា អ្នកភូមិចំនួន ១២គ្រួសារ នៅភូមិសាយ៉ោះលើ កំពុងរងការគំរាមកំហែងរំលោភសិទ្ធិរស់នៅ ហើយពួកគាត់បានចាកចេញពីផ្ទះ ដោយសារភ័យខ្លាចពីសកម្មភាពប្រើប្រាស់អាវុធគំរាមសម្លាប់៖ «គាត់ភ័យខ្លាចនឹងការគំរាមកំហែងដោយឈ្មួញមានអាវុធ យើងបានជួយគាត់ក្នុងនាមគាត់ភៀសខ្លួនពីភូមិគាត់រស់នៅមកបានលុង»។
អ្នកភូមិដែលបានភៀសខ្លួនមកស្នាក់នៅការិយាល័យសមាគមអាដហុក ខេត្តរតនគិរី គឺលោក សឿង យ៉ារាត់ រស់នៅភូមិសាយ៉ោះលើ ឃុំកាឡែង ស្រុកលំផាត់។ លោកបានបញ្ជាក់ថា អ្នកភូមិទាំង ១២គ្រួសារ បានសម្រេចចិត្តចាកចេញពីផ្ទះទៅស្នាក់នៅផ្ទះសាច់ញាតិបងប្អូននៅភូមិផ្សេង ដោយសារភ័យព្រួយពីសុវត្ថិភាព។ លោកបន្តថា ចាប់តាំងពីចុងខែធ្នូ ឆ្នាំ២០១២ កូនប្រុសម្ចាស់កសិដ្ឋាន គឺលោក គុជជូ ច័ន្ទបូណាក់ និងលោក គុជជូ ច័ន្ទគ្រឹស្នា អមជាមួយកម្មករមានអាវុធ បានមកកាប់រំលំដើមឈើអ្នកភូមិ និងគំរាមបាញ់សម្លាប់ បើសិនអ្នកភូមិមិនរុះរើលំនៅឋានចេញ។
លោកបន្តថា ម្ចាស់កសិដ្ឋានប៉ុនប៉ងរំលោភយកដី ដោយសំអាងថាដីនោះអ្នកភូមិផ្សេងទៀតបានលក់ទៅឲ្យម្ចាស់កសិដ្ឋាននោះ៖«គេជិះម៉ូតូតាមពីក្រោយទៀត គេថា ម៉េង ឯងថ្ងៃនេះចង់ងាប់ឬចង់រស់។ ខ្ញុំភ័យខ្ញុំ។ ១២គ្រួសារហ្នឹងរត់រប៉ាត់រប៉ាយអស់ហើយ គេរត់ទៅស្រុករកបងប្អូនគេអ៊ីចឹង។ ចេញអស់ហើយអត់មាននរណានៅទេ អត់ហ៊ាននៅទេបាទ! ខ្ញុំគេចខ្លួនដែរហ្នឹង បើសិននៅហ្នឹង អាចប្រហារជីវិតខ្ញុំហើយមើលទៅ»។
ទាក់ទិនការចោទប្រកាន់នេះ កូនម្ចាស់កសិដ្ឋាន លោក គុជជូ ច័ន្ទបូណាក់ ចាត់ទុកថាជាការមិនពិត។ លោកបញ្ជាក់ថា ដីដែលប្រជាពលរដ្ឋ ១២គ្រួសារកំពុងរស់នៅ គឺជាដីរបស់គ្រួសារលោកបានទិញពីប្រជាពលរដ្ឋជនជាតិដើមនៅតំបន់នោះ។ ចំណែកប្រជាពលរដ្ឋ ១២គ្រួសារ បានសុំដីនោះដាំដុះបណ្ដោះអាសន្ន៖«យករបស់កាន់កាំភ្លើងយកទៅគំរាមសម្លាប់ អាហ្នឹងអត់ការពិតទេ បើមានការពិតខ្ញុំ សុខចិត្តទទួលខុសត្រូវទាំងអស់រឿងហ្នឹង»។
មេឃុំកាឡែង លោក ស៊ុត សុំ មានប្រសាសន៍បញ្ជាក់ថា មន្ត្រីប៉ូលិសប៉ុស្តិ៍បានចុះអង្កេតករណីនេះ ហើយរកឃើញថា ពិតជាមានការគំរាម និងកាប់ផលដំណាំប្រជាពលរដ្ឋមែន។ លោកបន្តថា សូម្បីលោកជាមន្ត្រីអាជ្ញាធរក៏រងការគំរាមកំហែងពីគ្រួសារម្ចាស់កសិដ្ឋាននេះដូចគ្នា៖ «ប្រជាពលរដ្ឋអត់សុខចិត្តចេញទេ។ ខ្ញុំថាមិនបាច់ចេញទេ ទោះបីកាប់សម្លាប់ក៏នៅហ្នឹងហើយ។ ខ្ញុំឲ្យប៉ុស្តិ៍ទៅត្រួតពិនិត្យឃើញកាប់ដើមខ្នុរ ស្វាយចន្ទី ដើមគរកាប់អស់ គឺគាត់ឲ្យកូនចៅគាត់ តាជូ ហ្នឹងណា។ លើកទី១ កម្មករគាត់ លើកទី២ កូនគាត់ថាបើមិនចេញទេ គាត់នឹងរុះរើផ្ទះសម្បែង មិនត្រឹមតែខ្ញុំទេ ទាំងលោកអភិបាលក៏គាត់ថាញាត់ក្នុងគុកដែរ»។
របាយការណ៍អង្កេតរបស់មន្ត្រីសមាគមអាដហុក ខេត្តរតនគិរី ឲ្យដឹងថា តំណាងឲ្យអ្នកភូមិ ១២គ្រួសារ គឺលោក សឿង យ៉ារ៉ាត់ បានដាក់ពាក្យប្ដឹងទៅស្ថាប័នអយ្យកាតុលាការខេត្តរតនគិរី នៅថ្ងៃពុធ ទី៩ ខែមករា ចោទប្រកាន់កូនប្រុសម្ចាស់កសិដ្ឋានទាំងពីរនាក់ពីបទបំផ្លាញផលដំណាំ និងប្រើប្រាស់អាវុធគំរាមបាញ់សម្លាប់អ្នកភូមិ៕
No comments:
Post a Comment
yes