ភ្នំពេញ ៖ អ្នកកាសែតកម្ពុជាថ្មីម្នាក់ត្រូវបានអង្គរក្សលោកធំនិងមាន អំណាចជាច្រើននាក់ឃាត់ខ្លួនដកម៉ាស៊ីនថតនិងដកកាំភ្លើងអាមេគំរាមបាញ់ក្នុងឧប្បត្តិហេតុគ្រោះថ្នាក់ចរាចរវាងរ៉ឺម៉ក កង់បីនិងរថយន្តឡិចស៊ីសស៊េរីទំនើបអ្នកមានអំណាចមួយគ្រឿងកាលពីវេលាម៉ោង១០និង៤០នាទីយប់ថ្ងៃទី២២ខែកុម្ភៈ ឆ្នាំ២០១៣នៅតាមបណ្តោយផ្លូវជាតិ៥ ទល់មុខមជ្ឈមណ្ឌល ម៉ូដែន ៥ស្ថិតនៅ ភូមិសាមគ្គី សង្កាត់ឫស្សីកែវ ខណ្ឌឫស្សីកែវខណៈអ្នកកាសែតរូបនោះទៅថតយករូបភាពលើទីសាធារណៈក្នុងករណីនេះយកមកផ្សព្វផ្សាយព័ត៌មាន។
លោកស៊ុន គឹមសាន អាយុ២២ឆ្នាំមុខរបររត់រ៉ឺម៉កម៉ូតូកង់៣អ្នកឃើញហេតុការណ៍នេះបានឲ្យដឹងថានៅមុនពេលកើតហេតុគេឃើញរថយន្ត ឡិចស៊ីស ពណ៌ខ្មៅ ស៊េរីទំនើបមួយគ្រឿងពាក់ស្លាកលេខភ្នំពេញ 2T -9505 និងរ៉ឺម៉កកង់បីបើកបរដោយឈ្មោះឃុន ឃិន ភេទប្រុស អាយុ៣៥ឆ្នាំ មានទីលំនៅសង្កាត់ទួលសង្កែ ខណ្ឌឬស្សីកែវ បើកបរតាមបណ្តោយផ្លូវជាតិលេខ៥ ពីជើងទៅត្បូងស្របទិសគ្នា លុះដល់ចំណុចទល់មុខមជ្ឈមណ្ឌល ម៉ូដែន ៥ រ៉ឺម៉កកង់បីបានគេចរថយន្តផ្សេងមួយគ្រឿងទៀត ក៏ត្រូវរថយន្តឡិចស៊ីស ស៊េរីទំនើបមួយគ្រឿងដែលបើកស្របទិសគ្នា បុកពេញទំហឹងបណ្ដាលឲ្យរ៉ឺម៉កកង់បីក្រឡាប់ផ្ងារជើង។ក្រោយមករថយន្តឡិចស៊ីសបានបើកថយឡើងទៅលើការូឡា ដើម្បីយកត្រូវ ហើយបន្ទាប់មកស្រាប់តែអ្នកបើកបររថយន្តនិងអង្គរក្សចុះពីលើរថយន្តទៅ សម្លុតគំរាមវាយក្បាល អ្នកបើករ៉ឺម៉កកង់បី ឲ្យ លុតជង្គង់មុខឡានសុំទោសដូចទាសករ ហើយគាប់ជួនអ្នកកាសែតកម្ពុជាថ្មីទៅដល់ ថតផ្តិតយក រូបភាពនៃទិដ្ឋភាពគ្រោះថ្នាក់ចរាចរទៅចុះផ្សាយក៏ត្រូវជនទាំងនេះដែលគេអះអាងថាជាអង្គរក្សលោកធំម្នាក់គំរាមថែមទៀត។បន្ទាប់មកស្រាប់តែមាន អង្គរក្សមួយក្រុមជិះរថយន្តតូយូតា ពី កឹបបំពាក់ស៊ីរ៉ែននៅពីលើពាក់ស្លាកលេខ ខេមរភូមិន្ទ ២2-3018 បានមកដល់រកមុខអ្នកកាសែតថតគ្រោះថ្នាក់ចរាចរនេះព្រមទាំងឃាត់ខ្លួន ដកយកម៉ាស៊ីនថត យកទៅលុបរូបភាពចោលអស់ព្រមទាំងគំរាមបាញ់ទៀត។
សាក្សីបន្តថាក្រោយមកទៀតមានអ្នកកាសែតនគរវត្ត និងគេហទំព័រCENបានទៅដល់ថតយករូបភាពនៃ គ្រោះថ្នាក់ចរាចរនោះដែរប៉ុន្តែត្រូវបុរសម្នាក់ស្លៀកពាក់ស៊ីវិល បើករថយន្តបំពាក់ដោយស៊ីរ៉េននៅពីលើមានភាពស្រវឹងជោក បានសម្លុត គំរាមនិង បានដកកាំភ្លើងពីចង្កេះអាម៉េកាន់និងដៃគំរាមបាញ់ទៀត។
ក្រោយមកទើបសមត្ថកិច្ចនគរបាលខណ្ឌឬស្សីកែវទៅដល់ហៅ ម្ចាស់ម៉ូតូកង់៣ទៅដោះស្រាយនៅនគរបាលខណ្ឌ ឯភាគីរថយន្តឡិចស៊ីសរបស់អ្នកមានអំណាច មិនហៅទៅទេ ព្រោះខ្លាចអំណាចអ្នកធំ។ បន្ទាប់មកដោយសារមិនចង់ឲ្យមានបញ្ហាជាមួយអង្គរក្សរូបនេះ បុរសម្នាក់ឈ្មោះស៊ុន ថាច អាយុ៣៥ឆ្នាំ ត្រូវជាបងប្អូនជីដូនមួយម្ចាស់ម៉ូតូរ៉ឺម៉កម៉ូតូកង់៣ បានសុខចិត្តធានាសងកាងឡានដែលខូចខាតនោះទាំងស្រុង ព្រោះយល់ថា បើទោះជាប្អូនជីដូនមួយគាត់ជាអ្នកត្រូវ ក៏ជជែកមិនឈ្នះអ្នកមានកាំភ្លើង និងមានអំណាចនោះដែរ។
អ្នកកាសែត កម្ពុជាថ្មីដែលរងគ្រោះដោយអង្គរក្សគំរាមបានឲ្យដឹងថាលោកនឹងដាក់ពាក្យបណ្តឹងប្ដឹងក្រុមជនជនទាំងនេះ ទៅសមត្ថកិច្ចពីបទ គំរាម កំហែងដោយអាវុធនិងពីបទឃាត់ខ្លួនដកម៉ាស៊ីនថតអ្នកសារព័ត៌មានកំពុង បំពេញភារកិច្ចនៅតាមដងផ្លូវសាធារណៈដើម្បីឲ្យសមត្ថកិច្ចស្រាវជ្រាវ រកអត្តសញ្ញាណជនបង្កទាំងនោះនិងមានវិធានការទៅតាមផ្លូវច្បាប់។
ប្រជាពលរដ្ឋឃើញហេតុការណ៍នេះបាននាំគ្នាលាន់មាត់ថាធ្វើដល់អង្គរក្សអ្នកធំផឹកស៊ីស្រវឹងអួទីណួនិយាយគ្នាស្តាប់មិនបានព្រមទាំងអាងអីទាញកាំភ្លើងភ្ជង់គេឯងយ៉ាងនេះមិនងាប់ជនស្លូតត្រង់អស់ទៅហើយទេ? តើយុត្តិធម៌នៅត្រង់ណា?
ប្រជាពលរដ្ឋកំពុងរង់ចាំមើលចំណាត់ការរបស់លោក ស្នងការនគរបាលរាជធានីថាតើមានវិធានការបែបណាចំពោះករណីនេះ៕
No comments:
Post a Comment
yes