ភ្នំពេញ ៖ យ៉ាងហោចណាស់មនុស្ស៤នាក់បានស្លាប់និងប្រមាណជាង១០នាក់ទៀតបានរងរបួសធ្ងន់និងស្រាល ដោយរថយន្តកាមរីបាឡែនមួយគ្រឿងពណ៌ស្ករបើកបរដោយនិស្សិតស្រីម្នាក់ក្នុងលឿនដូចព្យុះហោះទៅបុករះម៉ូតូ បន្តបន្ទាប់គ្នាចំនួន៣ទីតាំងខុសគ្នាចុងក្រោយបុករះម៉ូតូ កង់ សិស្សសាលានៅមុខក្រសួងមហាផ្ទៃដ៏គួរឲ្យរន្ធត់ មនុស្សជាច្រើននាក់ប៉ើងខ្ទាតរេលពេញផ្លូវគួរឲ្យសង្វេគបំផុត។
គ្រោះថ្នាក់ចរាចរដ៏សាហាវនិងរន្ធត់នេះបានកើតឡើងកាលពីវេលាម៉ោង៥និង៣០នាទីល្ងាច ថ្ងៃទី១ ខែមីនា ឆ្នាំ២០១៣ នៅចំណុចមុខក្រសួងមហាផ្ទៃ ក្បែរធនាគារ សិន ហាន តាមបណ្ដោយមហាវិថីព្រះនរោត្ដម ក្នុងសង្កាត់ទន្លេបាសាក់ ខណ្ឌចំការមន។
សមត្ថកិច្ចមូលដ្ឋានបានឲ្យដឹងថារថយន្តបង្កម៉ាកកាមរីបាឡែនពណ៌ស្ករពាក់ស្លាកលេខភ្នំពេញ2R-5008បើកបរនារីម្នាក់ឈ្មោះ គាម ពិសិដ្ឋណារីតា ជានិស្សិតសាកលវិទ្យាល័យវេជ្ជសាស្ត្រនិងវិទ្យាសាស្ត្រសុខាភិបាលនិងយុវជនពីរនាក់ទៀតស្លៀកពាក់ជាសិស្សសាលាឯកជនរួមដំណើរជាមួយ មិនមានរងរបួសទេ។ ចំណែកជនរងគ្រោះជាសិស្សស្លាប់៤នាក់និងអ្នករងរបួសធ្ងន់ស្រាលប្រមាណជាង១០នាក់មិនទាន់ត្រូវបានគេស្គាល់អត្តសញ្ញាណនៅឡើយទេ។
សាក្សីនៅកន្លែងកើតហេតុបានឲ្យដឹងថា នៅមុនពេលកើតហេតុរថយន្តបង្កបានបើកបុកម៉ូតូពីក្រោយ នៅម្ដុំវិមានឯករាជ្យបន្តិចបន្តួច ប៉ុន្តែរថយន្តបង្កមិនបានឈប់ចូលដោះស្រាយឡើយ គឺបានព្យាយាមបើករត់គេចតាមបណ្ដោយផ្លូវនរោត្តម ពីជើងទៅត្បូងក្នុងល្បឿនយ៉ាងលឿន លុះទៅដល់ស្ដុបជលផលរថយន្តបង្កបានប៉ះជាមួយម៉ូតូ២គ្រឿងបន្ថែមទៀត បណ្ដាលឲ្យអ្នកបើកបរម៉ូតូរងរបួស ហើយរថយន្តបានព្យាយាមបើករត់ក្នុងល្បឿនយ៉ាងលឿន លុះដល់ចំណុចកើតហេតុមុខក្រសួងមហាផ្ទៃ (ច្រកចេញ)ក្បែរធនាគារសិន ហានរថយន្តបានជ្រុលទៅបុករះម៉ូតូ កង់ ដែលធ្វើដំណើរស្របទិសគ្នាពីក្រោយពេញមួយទំហឹងបណ្ដាលឲ្យអ្នក ជិះ កង់ ម៉ូតូ ខ្ទាតប៉ើង ធ្លាក់រេលពេញផ្លូវ ស្លាប់មនុស្ស២នាក់ភា្លមៗនឹងកន្លែងនិង១០នាក់ទៀតរងរបួសធ្ងន់ស្រាល។
ចំណែករថយន្តបង្កមិនទាន់អស់ល្បឿននៅឡើយ បានបន្តបុកអូសមនុស្សនិងម៉ូតូ កង់ ទៅបុកដើមឈើ រួចជ្រុលទៅបុក របងជញ្ជាំង ក្រសួងមហាផ្ទៃខ្ទេចទៅមុខលែងរួច។
សាក្សីបន្តថា ដោយឃើញទិដ្ឋភាពគ្រោះថ្នាក់ចរាចរដ៏គួរឲ្យខ្លោចផ្សា អាណិត អាសូរដល់ជនរងគ្រោះ ជាពន់ពេក ប្រជាពលរដ្ឋដែលធ្វើដំណើរតាមដងផ្លូវនោះមានការខឹងសម្បាយ៉ាងខ្លាំងបម្រុងប្រើអំពើហិង្សាទៅលើអ្នកបើកបរ ប៉ុន្តែដោយមានការអន្តរាគមន៍ពីកម្លាំងនគរបាលនៅក្បែរនោះបានឃាត់ខ្លួនស្ត្រីដែលបើករថយន្តបង្កនាំខ្លួនចូលទៅក្រសួងមហាផ្ទៃដើម្បីបញ្ចៀសកុំឲ្យមានអំពើហិង្សា។
សមត្ថកិច្ចបានចុះទៅដល់កន្លែងកើតហេតុបានបញ្ជាក់ថា គ្រោះថ្នាក់ចរាចរនេះបណ្ដាលឲ្យមនុស្សចំនួន២នាក់ស្លាប់ភ្លាមៗនៅនឹងកន្លែង និង២នាក់ទៀតបានស្លាប់ក្រោយពេលបញ្ជូនដល់មន្ទីរពេទ្យ និងមនុស្សជាង១០អ្នកទៀតរងរបួសធ្ងន់និងស្រាល បច្ចុប្បន្នកំពុងដេកសម្រាកព្យាបាល នៅមន្ទីរពេទ្យរដ្ឋនិងឯកជន។ ម៉ូតូរងការខូចខាតមានចំនួន៨គ្រឿង កង់ចំនួន៤គ្រឿង។
សមត្ថកិច្ចបញ្ជាក់ថាក្រោយពីមន្ត្រីជំនាញវាស់វែងរួច រថយន្តបង្កនិងម៉ូតូ កង់ រួមនឹងនារីអ្នកបើកបរ ត្រូវបានសមត្ថកិច្ចឃាត់ខ្លួនបញ្ជូនទៅកាន់ការិយាល័យចរាចរជើងគោកក្រុងដើម្បីមានវិធានការទៅតាមនីតិវិធីច្បាប់៕
No comments:
Post a Comment
yes