លោកនាយករដ្ឋមន្ត្រី អះអាងនៅថ្ងៃនេះថា ប្រសិនបើសំឡេងគាំទ្រគណបក្សកាន់អំណាច បានក្រោម៥០ភាគរយនោះ លោកនឹងស្ម័គ្រចិត្តលាចេញពីតំណែង។
ការថ្លែងបែបនេះ ធ្វើឡើងក្នុងពិធីប្រារព្ធទិវាកុមារអន្តរជាតិ នៅមជ្ឈមណ្ឌលពាណិជ្ជកម្មកោះពេជ្រ រាជធានីភ្នំពេញ នាថ្ងៃសៅរ៍ ទី០១ ខែមិថុនានេះ ដោយលោកនាយករដ្ឋមន្ត្រី មានប្រសាសន៍ថា តាមការស្ទង់មតិរបស់វិទ្យាស្ថានសាធារណរដ្ឋអន្តរជាតិ IRI របស់អាមេរិក ថ្មីៗ បានបង្ហាញថា រដ្ឋាភិបាលកំពុងដើរលើផ្លូវត្រូវ ជាង ៧០ភាគរយ ចំណែក អ្នកដែលថា រដ្ឋាភិបាលដើរលើផ្លូវខុសនោះមានតែជាង ២០ភាគរយប៉ុណ្ណោះ។
លោកថា ការស្ទង់មតិនេះ បង្ហាញថា គណបក្សប្រជាជនកម្ពុជា នឹងឈ្នះការបោះឆ្នោត ជ្រើសតាំងតំណាងរាស្ត្រ នីតិកាលទី៥ ថ្ងៃទី២៨ ខែកក្កដា ឆ្នាំ២០១៣ ខាងមុខនេះ។
លោកនាយករដ្ឋមន្ត្រី បន្តថា បើលទ្ធផលជាក់ស្តែងនៅពេលបោះឆ្នោត សំឡេងគាំទ្របានក្រោម ៥០ភាគរយនោះ លោកនឹង ចុះចេញពីតំណែង។
ការលើកឡើងរបស់លោកនាយករដ្ឋមន្ត្រីនេះ ធ្វើឡើងខណៈដែលគណបក្សសង្គ្រោះជាតិ ជាគណបក្សប្រឆាំង ក៏បានអះអាងដូចគ្នាថា ខ្លួនអាចដណ្តើមជ័យជំនះពីគណបក្សប្រជាជនកម្ពុជា នៅពេលបោះឆ្នោតខាងមុខនេះដែរ៕
No comments:
Post a Comment
yes