លោក សម រង្ស៊ី ប្រធានគណបក្សសង្គ្រោះជាតិ (រូបថត តាំង វីដា)
ប្រធានគណបក្សសង្គ្រោះជាតិ លោក សម រង្ស៊ី ប្រកាសបន្តការទាមទាររកយុត្តិធម៌ជូនម្ចាស់ឆ្នោត ដោយលោកអះអាងថា គណបក្សទទួលបានការគាំទ្រច្រើនពីសហគមន៍អន្តរជាតិ អំទ្បុងបេសកកម្មការទូតក្រៅប្រទេសរបស់លោក ដើម្បីកុំឲ្យអន្តរជាតិទទួលស្គាល់លទ្ធផលបោះឆ្នោត។
ការប្រកាសនេះ ធ្វើឡើងបន្ទាប់ពីលោកត្រលប់មកដល់កម្ពុជាវិញ នៅព្រឹកថ្ងៃអង្គារនេះ ក្រោយពីបញ្ចប់បេសកម្មការទូតរយៈពេល ២ សប្តាហ៍ ស្វែងរកអន្តរាគមន៍ពីសហគមន៍អន្តរជាតិ និងអង្គការសហប្រជាជាតិ ដោយបានឆ្លងកាត់សហភាព អឺរ៉ុប និងអាមេរិក។ ក្នុងដំណើរទស្សនកិច្ចនៅក្រៅប្រទេសនេះ លោក សម រង្ស៊ី ក៏បានឆ្លងកាត់ប្រទេសអង់គ្លេស បារាំង និងប្រទេសបែលហ្សិកផងដែរ។
ឆ្លើយតបនឹងសំណួរអ្នកសារព័ត៌មាន លោក សម រង្ស៊ី ថ្លែងថា ជំនួបជាមួយសហគមន៍បរទេសលើកនេះ គឺបង្ហាញពីការគាំទ្រ និងការលើកទឹកចិត្តមួយ សម្រាប់គណបក្ស បន្តការទាមទាររបស់ខ្លួន ក្នុងការស៊ើបអង្កេតស្វែងរកការពិតជូនម្ចាស់ឆ្នោត។ ជាមួយគ្នានេះ លោកជំរុញឲ្យប្រជាពលរដ្ឋ បន្តការទាមទាររបស់ខ្លួន លុះណាការពិតត្រូវបានផ្តល់ជូនពួកគេ ៖ "ហើយខ្ញុំនឹងជម្រាបសហការី និងបងប្អូនជនរួមជាតិទាំងអស់ ឲ្យបន្តការទាមទាររបស់យើង អ្វីដែលយើងកំពុងធ្វើនេះ គឺត្រឹមត្រូវណាស់ ទាមទាររកការពិតដើម្បីផ្តល់យុត្តិធម៌ជូនម្ចាស់ឆ្នោត ហើយយើងច្បាស់ជាទទួលជ័យជំនះ ក្នុងការទាមទារផ្តល់យុត្តិធម៌ជូនម្ចាស់ឆ្នោត ដោយឈរលើការពិត ការពិតគឺឆន្ទៈប្រជារាស្ត្រខ្មែរ ដែលបានបោះឆ្នោតនេះ មិនមែនបោះឆ្នោតរក្សារដ្ឋអំណាចដដែលទេ គឺបោះឆ្នោតដើម្បីទាមទារឲ្យមានការផ្លាស់ប្តូរ"។
លោក សម រង្ស៊ី បញ្ជាក់ជាថ្មីថា គណបក្សសង្គ្រោះជាតិ នឹងមិនចូលរួមប្រជុំរដ្ឋសភាឡើយ ប្រសិនបើមិនមានការចរចា ស្វែងរកការពិត ដោះស្រាយភាពមិនប្រក្រតីនៃការបោះឆ្នោតឡើងវិញនោះ។
មន្ត្រីជាន់ខ្ពស់គណបក្សប្រជាជនកម្ពុជា លោក ជាម យៀប ចាត់ទុកបេសកម្មការទូតរបស់លោក សម រង្ស៊ី មិនមានឥទ្ធិពលសម្រាប់កម្ពុជាឡើយ។ លោកបន្តថា គណបក្សប្រជាជនកម្ពុជានៅតែបើកជំហរសម្រាប់ការចរចា ប្រសិនបើបេក្ខជនជាប់ឆ្នោតតំណាងរាស្ត្រគណបក្សសង្គ្រោះជាតិ ព្រមចូលប្រជុំសភា។
អ្នកវិភាគនយោបាយ លោក បណ្ឌិត សុខ ទូច ចាត់ទុកដំណើរការទូតរបស់លោក សម រង្ស៊ី ថា ជាផលវិជ្ជមានមួយសម្រាប់គណបក្ស។ ប៉ុន្តែ លោក ថា ករណីនេះ សហគមន៍អន្តរជាតិ គ្រាន់តែអាចជួយដឹងឮតែប៉ុណ្ណោះ ពោលគឺមិនអាចលូកលាន់កិច្ចការផ្ទៃក្នុងរបស់កម្ពុជាបានឡើយ ៖
គណបក្សសង្គ្រោះជាតិ គ្រោងធ្វើមហាបាតុកម្មលើកទី៣ រយៈពេលបីថ្ងៃ ចាប់ពីថ្ងៃទី២៣ ដល់ថ្ងៃទី២៥ ខែតុលា។ គណបក្សគ្រោងដង្ហែក្បួនដើម្បីយកញត្តិភ្ជាប់ស្នាមមេដៃប្រជាពលរដ្ឋ ដាក់ជូន អង្គការសហប្រជាជាតិ និងស្ថានទូតនៃប្រទេសភាគីហត្ថលេខីនៃកិច្ចព្រមទីក្រុងប៉ារីស ក្នុងបំណងស្នើឲ្យដោះស្រាយបញ្ហាបោះឆ្នោត កាលពីខែកក្កដា ឆ្នាំនេះ៕
No comments:
Post a Comment
yes