លោក លីនសាយ ហាម៉ុន ដើរលីឈើឆ្កាងរបស់គ្រិស្តសាសនាបង្ហាញ
វត្តមាននៅសៀមរាប ប្រទេសកម្ពុជា។ រូបថតMiranda Glasser
អ្នកទស្សនានានាប្រាកដជាមានការងឿងឆ្ងល់ជាមិនខានឡើយពេលបានឃើញ សកម្មភាពបុរសជាប្រេសិតសាសនាគ្រិស្តម្នាក់បានលីឈើឆ្កាងប្រវែង ៣,៦៥ម៉ែត្រដើរតាមផ្លូវ។ បុរសនោះមានឈ្មោះថា លីនសាយហាម៉ុន ខណៈលោកគឺជាប្រេសិតរបស់ព្រះយេស៊ូដ៏ជោកជាំម្នាក់។
លោកលីនសាយ ហាម៉ុនមានវ័យ៦០ឆ្នាំមកពីក្រុងខនវ៉ល់ប្រទេសអង់គ្លេស។ លោកបានលីឈើឆ្កាងមួយនេះដើរតាមផ្លូវអស់រយៈពេល២៦ឆ្នាំមកហើយ ខណៈពេលនេះលោកមានវត្តមានមកដល់ប្រទេសកម្ពុជាហើយ។ គេឃើញលោកតែងលី ឬយកឈើឆ្កាងនេះដាក់លើស្មាអូសតាមខ្លួនគាត់ជានិច្ចជាមួយនឹង ទម្ងន់២៥គីឡូក្រាម។ តែគេក៏បានឃើញលោកប្រើកង់រទេះតូចភ្ជាប់ចុងឈើឆ្កាងម្ខាងដើម្បី ងាយស្រួលក្នុងការអូសទាញវាផងដែរ។
លោកបានទាញ ឬអូសឈើឆ្កាងព្រះយេស៊ូគ្រិស្តនេះចំនួន១០ម៉ោងក្នុងមួយថ្ងៃ។ តើគាត់ធ្វើបែបនេះដើម្បីអ្វីទៅ?
លោក លីនសាយ ហាម៉ុនថា មកពីរូបលោកគោរពស្រឡាញ់ព្រះយេស៊ូគ្រិស្តពេកហើយក៏ចង់ចែករំលែក ជាមួយអ្នកដទៃ ទើបបាននឹកគិតរកមធ្យោបាយលីទាញឈើឆ្កាងដ៏ធំនេះឡើងដើរទៅកាន់ បណ្តាប្រទេសនានានោះ។
លោកបន្តថា៖ «វាពិតជាទង្វើគួរឲ្យភ្ញាក់ផ្អើលមែន តែក៏ជាគន្លឹះមួយដើម្បីបង្ហាញឲ្យមនុស្សម្នាជឿយើងដែរ។ ច្បាស់ជាមានអ្នកខ្លះគិតថាខ្ញុំជាអ្នកងប់ងុលនឹងជំនឿ ឬអ្នកខ្លះថា ខ្ញុំជាមនុស្សឆ្កួត។ តែសង្ឃឹមថាពេលជួបខ្ញុំពួកគេមិនគិតដូច្នោះទៀតឡើយ។ ខ្ញុំតែងតែលីវាដើរក្នុងចម្ងាយប្រមាណជាង១៦០គីឡូម៉ែត្រសម្រាប់ ឆ្លងកាត់ប្រទេសនីមួយៗតាមដងផ្លូវ។ ដូចពេលនេះអ៊ីចឹងខ្ញុំលីវាតាមផ្លូវមួយនៅក្នុងខេត្តសៀមរាប កណ្តាលហ្វូងមនុស្សរាប់ពាន់នាក់»។
លោកបន្តថា៖ «បើនៅប្រទេសឥណ្ឌាវិញយើងគ្រាន់តែដើរឆ្លងពីផ្ទះមួយទៅផ្ទះមួយ ទៀតប៉ុណ្ណោះព្រោះស្ថានភាពផ្លូវពិបាក។ អ្នកដែលរង់ចាំបន់ស្រន់ដល់ព្រះយេស៊ូនោះគឺច្រើនតែជាមនុស្សស្រីចាស់ៗ និងក្មេងៗ»។
លោកថា ការធ្វើបែបនេះវាហាក់ដូចជាយើងបានកាន់ដៃអ្នកដែលខ្លួនស្រឡាញ់ ឬយួរទូរស័ព្ទដៃជាទីស្រឡាញ់តាមខ្លួនដែរ។ ទោះបីជាវាជាគំនិតបែបរាក់កំភែលក្តីក៏លោកហាម៉ុននិយាយថាយ៉ាង ហោចណាស់ក៏ឃើញមានអ្នកមើលយើងលីឈើឆ្កាងអូសតាមផ្លូវដែរ។ បើនៅតាមភូមិឋានអ្នកមូស្លីមវិញក៏ពួកគេបានស្វាគមន៍យើងដែរ។
លោក ថា៖ «ខ្ញុំពេញចិត្តនឹងទង្វើមួយនេះ។ ខ្ញុំពិតជាពេញចិត្តនឹងការពាំនាំនូវក្តីស្រឡាញ់របស់ព្រះជាម្ចាស់ និងផ្សព្វផ្សាយក្តីស្រឡាញ់នេះទៅឲ្យអ្នកដទៃ។ តែវាប្រហែលជាទង្វើមួយដែលគេគិតមកលើរូបខ្ញុំថាត្រូវបានគេបង្ខំ»។
គួរបញ្ជាក់ថា លោកលីនសាយ ហាម៉ុន បានលីឈើឆ្កាងអូសតាមដងវិថីនានាឆ្លងកាត់ប្រទេសមួយចំនួនមកហើយ ដូចជាប្រទេសរូម៉ានី នេប៉ាល់ នូវែលសេឡង់ និងស្រីលង្កា ជាដើមមុនមកដល់ប្រទេសកម្ពុជា។
លោកបានប្រាប់សារព័ត៌មានអង់គ្លេស Daily Mail ថា ដើមឆ្នាំនេះលោកបានទៅកាន់ប្រទេសបង់ក្លាដែស និងក្រុងរ៉ូមតាមវិថី St Peter's Squareនៅឯប្រទេសអ៊ីតាលី និងត្រូវបានប៉ូលិសឃាត់ខ្លួនខណៈបានធ្វើសកម្មភាពនៅ Red Square ។
ចំពោះ ថវិកាសម្រាប់ចាយវាយលើការធ្វើដំណើរជាប្រេសិតព្រះរបស់លោកនេះ បានពីក្រុមអ្នកគាំទ្រសាសនាគ្រិស្តផ្តល់ជូន និងថវិកាបានពីការងារនៃរបរចាស់របស់លោកជាអ្នកថែទាំនៅឯស្រុកកំណើតនោះ។
លោកបន្ថែមថា៖«ខ្ញុំជាមនុស្សដែលមានអារម្មណ៍ចូលចិត្ត ភាពឯករាជ្យ ឬអ្នកបួស។ ខ្ញុំគ្រាន់តែចង់មានសិទ្ធិសេរីភាពផ្សព្វផ្សាយសេចក្តីល្អរបស់ ព្រះដល់ក្រុមមនុស្សដែលគោរពស្រឡាញ់ព្រះយេស៊ូគ្រិស្តតែប៉ុណ្ណោះ»៕
No comments:
Post a Comment
yes