សង្គមស៊ីវិល លើកឡើងថា ដល់ពេលដែលតុលាការត្រូវដោះលែងសកម្មជនដីធ្លីនៅតំបន់បឹងកក់ អ្នកស្រី យ៉ោម បុប្ផា ដែលជាប់ចោទពីបទផ្តួចផ្តើមឲ្យមានហិង្សា វាយអ្នករត់ម៉ូតូឌុបពីរនាក់ឲ្យរងរបួសនោះ ឲ្យមានសេរីភាពឡើងវិញហើយ។
ការលើកឡើងរបស់សង្គមស៊ីវិល ធ្វើឡើងមុន២ថ្ងៃដែលតុលាការកំពូល បើកសវនាការលើបណ្តឹងទាស់របស់ អ្នកស្រី យ៉ោម បុប្ផា នៅថ្ងៃទី២២ ខែវិច្ឆិកានេះ។
អ្នកគ្រប់គ្រងបច្ចេកទេសឃ្លាំមើលការរំលោភសិទ្ធិមនុស្សនៃអង្គការលីកាដូ លោក អំ សំអាត មានប្រសាសន៍ថា ដំណាក់កាលនេះ តុលាការកំពូលគួរតែដោះលែង អ្នកស្រី យ៉ោម បុប្ផា ដើម្បីបង្ហាញពីឯករាជ្យភាពរបស់ខ្លួន តាមការប្រកាសធ្វើកំណែទម្រង់ប្រព័ន្ធយុតិ្ដធម៌របស់រដ្ឋាភិបាលអាណត្តិថ្មីនេះ។ លោកថា ការកាត់ទោសរបស់សាលាដំបូង និងសាលាឧទ្ធរណ៍កន្លងមក មិនមានភស្តុតាងទេ ៖ "ចោទគេថាជាអ្នកបញ្ជាបាន វាទាល់តែចាប់ជនដៃដល់នៅក្នុងករណីហ្នឹង យកមកសួរ ហើយមានការឆ្លើយ មានការបង្ហាញភស្តុតាងត្រឹមត្រូវ ទើបអាចចោទប្រកាន់អ្នកស្រីយ៉ោម បុប្ផា និងប្តីពីបទផ្សំគំនិតបាន តែក្នុងករណីនេះ គឺជនដែលប្រព្រឹត្ត រកមិនទាន់ឃើញ មិនទាន់ចាប់បាន ទៅចោទអ្នកស្រីយ៉ោម បុប្ផា និងប្តីថាជាអ្នកផ្តើមគំនិត សួរថាតើភស្តុតាងត្រង់ណាដែលវាស៊ីសង្វាក់គ្នា"។
ប្រធានផ្នែកស៊ើបអង្កេតរបស់សមាគមការពារសិទ្ធិមនុស្សអាដហុក លោក នី ចរិយា យល់ថា ប្រសិនបើតុលាកាកំពូលពិតជាកាត់ក្តីដោយឈរលើគោលការណ៍ឯករាជ្យមែននោះ អ្នកស្រី យ៉ោម បុប្ផា នឹងបានរួចទោស។ ប៉ុន្តែលោកគួរតែបើកការស៊ើបអង្កេតពីការកាត់ក្តីរបស់សាលាដំបូង និងសាលាឧទ្ធរណ៍ឡើងវិញ។ លោកថា បើទោះជាកម្ពុជា មិនទាន់មានច្បាប់ដាក់ទោសលើចៅក្រម និងព្រះរាជអាជ្ញា ដែលសម្រេចក្តីខុស តែរដ្ឋាភិបាលគួរជាអ្នកទទួលខុសត្រូវលើការផ្តល់សំណងដល់ជនរងគ្រោះ ៖ "នេះបើសិនជាតុលាការកំពូលនឹងសម្រេចក្តីដោយឈរលើមូលដ្ឋានឯករាជ្យ ឈរលើមូលដ្ឋានច្បាប់ពិតប្រាកដ អ្នកស្រី យ៉ោម បុប្ផា ត្រូវតែរួចខ្លួន ហើយរដ្ឋត្រូវតែចេញសងទៅលើជំងឺចិត្ត ទៅលើការខូចខាតរបស់អ្នកស្រីយ៉ោម បុប្ផា ដែលត្រូវបានតុលាការរាជធានីភ្នំពេញ និងសាលាឧទ្ធរណ៍ សម្រេចឃុំខ្លួនកន្លងមកនេះ"។
លោកនាយករដ្ឋមន្ត្រី ហ៊ុន សែន ធ្លាប់អះអាងថា ករណីអ្នកស្រី យ៉ោម បុប្ផា ជារឿងព្រហ្មទណ្ឌ មិនមែនជារឿងបញ្ហាដីធ្លីនោះទេ ដូច្នេះមិនអាចសម្របសម្រួលបានទេ។ ប៉ុន្តែអភិបាលរាជធានីភ្នំពេញ បានហៅប្តីអ្នកស្រី យ៉ោម បុប្ផា ទៅសម្របសម្រួលដើម្បីឲ្យក្រុមអ្នករត់ម៉ូតូឌុបដកពាក្យបណ្តឹង និងឈានដល់ការដោះលែងសកម្មជនដីធ្លីរូបនេះដោយតុលាការកំពូល។
នាយកលេខាធិការរដ្ឋាននៃក្រុមការងារពិសេសសិទ្ធិលំនៅឋាន លោក សៀ ភារម្យ បានហៅ ការលើកឡើងរបស់លោកនាយករដ្ឋមន្ត្រី ហ៊ុន សែន នេះថា គឺមិនបានថ្លឹងថ្លែងឲ្យបានច្បាស់ពីករណី អ្នកស្រី យ៉ោម បុប្ផា និងលោក ឈូក បណ្ឌិត។ លោកថា ពេលនេះ ជាពេលដែលតុលាការកំពូលត្រូវបង្ហាញពីកំណែរទម្រង់ប្រព័ន្ធយុតិ្ដធម៌នៅកម្ពុជាហើយ។
ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ មានប្រសាសន៍ថា តុលាការកំពូលទំនងជាដោះលែង អ្នកស្រី យ៉ោម បុប្ផា ក្រោមរូបភាពជាការកាត់តម្រឹមទោស ឬបង្វែរសំណុំរឿងនេះឲ្យឧទ្ធរណ៍ស៊ើបអង្កេតឡើងវិញ ៖ "បើសិនជាដោះលែងក្នុងរូបភាពណាក៏ដោយ ក៏យើងស្វាគមន៍ ក៏ប៉ុន្តែមិនទាន់ឆ្លុះបញ្ចាំងពីដំណើរការកែទម្រង់ប្រព័ន្ធតុលាការមួយ ដែលអាចមានប្រសិទ្ធភាពនៅឡើយទេ ហើយចំពោះខ្ញុំជារឿងមួយដែលយើងត្រូវតែដោះស្រាយ រឿងករណីធំដែរ ព្រោះអីបើសិនជាមិនអញ្ចឹងទេ ករណីដូចជាលោកស្រីយ៉ោម បុប្ផា ករណីអយុត្តិធម៌ដូចជាលោកស្រីហ្នឹង គឺនឹងមានបន្តបន្ទាប់រហូត"។
អង្គការប្រឆាំងការធ្វើទារុណកម្មពិភពលោក (OMCT) និងអង្គការលើកលែងទោសអន្តរជាតិ(Amnesty International) អំពាវនាវឲ្យអាជ្ញាធរកម្ពុជា ដោះលែងសកម្មជនដីធ្លីនៅតំបន់បឹងកក់ អ្នកស្រី យ៉ោម បុប្ផា ជាបន្ទាន់ និងគ្មានលក្ខខណ្ឌ ដោយចាត់ទុកអ្នកស្រីជាអ្នកទោសមនសិការ។ អ្នកស្រី យ៉ោម បុប្ផា ត្រូវបានសមត្ថកិច្ចចាប់ខ្លួន កាលថ្ងៃទី៤ ខែកញ្ញា ឆ្នាំ២០១២ ហើយត្រូវបានសាលាដំបូងរាជធានីភ្នំពេញ ផ្តន្ទាទោសឲ្យជាប់ពន្ធនាគារ៣ឆ្នាំ និងពិន័យជាប្រាក់សរុប ៦០លានរៀល ចោទពីបទប្រើហិង្សាដោយចេតនាវាយអ្នករត់ម៉ូតូឌុបពីរនាក់ឲ្យរងរបួស។ តែក្រោយមកត្រូវបានសាលាឧទ្ទណ៍ប្តូរបទចោទទៅជាបទផ្តួចផ្តើមឲ្យមានហិង្សាវិញ ក្រោយពីរកមិនឃើញកំហុស និងសម្រេចឲ្យជនជាប់ចោទ ទទួលទោស២ឆ្នាំ ដោយព្យួរទោសមួយឆ្នាំ និងពិន័យជាប្រាក់២០លានរៀល៕
No comments:
Post a Comment
yes