សហគមន៍មានទំនាស់ដីធ្លីចំនួនបីនៅរាជធានីភ្នំពេញ នឹងដើរហែក្បួនជុំវិញតុលាការកំពូលនៅរសៀលថ្ងៃអង្គារនេះ ដើម្បីធ្វើពិធីរំដោះគ្រោះ និង បួងសួងឲ្យតុលាការដោះលែងសកម្មជនដីធ្លី អ្នកស្រីយ៉ោម បុប្ផា ។
តំណាងសហគមន៍បឹងកក់ អ្នកស្រី ទេព វន្នី បានឲ្យដឹងថា វេលាម៉ោង៣រសៀលនេះ សហគមន៍មានទំនាស់ដីធ្លី រួមមានទាំងព្រះសង្ឃផងនោះ នឹងដើរជុំវិញតុលាការកំពូល៣ជុំ គឺអ្នកទំនាស់ដីធ្លីស្លៀកពាក់ស ដើរដោះទ្រនាប់ជើង មានកាន់បាយសី សូត្រធម៌ ទូងស្គរផង។ អ្នកស្រីបន្តថា ពួកគាត់ធ្វើពិធីនេះ ក្នុងគោលបំណងបណ្តេញឧបទ្រុបចង្រៃចេញពីអ្នកស្រី យ៉ោម បុប្ផា ដើម្បីឲ្យគាត់បានរួចផុតពីអំពើអយុតិ្តធម៌នេះ នឹងបានមកជួបជុំក្រុមគ្រួសារវិញ។
សហគមន៍មានទំនាស់ដីធ្លីដែលចូលរួមនោះមាន សហគមន៍បឹងកក់ បុរីកីឡា និងថ្មគោល។
តុលាការកំពូល គ្រោងបើកសវនាការលើបណ្តឹងទាស់របស់អ្នកស្រី យ៉ោម បុប្ផា នៅថ្ងៃទី២២ ខែវិច្ចិកា។ អ្នកស្រីយ៉ោម បុប្ផា ត្រូវបានសមត្ថកិច្ចចាប់ខ្លួន កាលថ្ងៃទី៤ ខែកញ្ញា ឆ្នាំ២០១២ ហើយត្រូវបានសាលាដំបូងរាជធានីភ្នំពេញ ផ្តន្ទាទោសឲ្យជាប់ពន្ធនាគារ៣ឆ្នាំ និងពិន័យជាប្រាក់សរុប៦០លានរៀល ចោទពីបទ ប្រើហិង្សាដោយចេតនា វាយអ្នករត់ម៉ូតូឌុបពីរនាក់ឲ្យរងរបួស។ ក្រោយមកត្រូវបានសាលាឧទ្ទណ៍ប្តូរបទចោទ ទៅជាបទ ផ្តួចផ្តើមឲ្យមានហិង្សាវិញ ក្រោយពីរកមិនឃើញកំហុស និងសម្រេចឲ្យទទួលទោស២ឆ្នាំ ដោយព្យួរទោសមួយឆ្នាំ និងពិន័យជាប្រាក់២០លានរៀលុ៕
No comments:
Post a Comment
yes