កម្មកររោងចក្រច្រើនម៉ឺននាក់ នៅថ្ងៃសៅរ៍នេះ បន្តផ្ទុះបាតុកម្មច្រើនកន្លែងផ្សេងគ្នា ទាមទារឲ្យដំឡើងប្រាក់ឈ្នួលដល់១៦០ដុល្លារក្នុងមួយខែ ខណៈក្រសួងការងារ និងបណ្តុះបណ្តាលវិជ្ជាជីវៈ គ្រោងបើកិច្ចពិភាក្សាករណីនេះ បន្តទៀត នៅថ្ងៃចន្ទសប្តាហ៍ក្រោយ។
តាមតំណាងកម្មករ លោក គាត វិបុល អះអាងថា មកដល់រសៀលថ្ងៃសៅរ៍នេះ កម្មករប្រមាណជា១០០០នាក់ នៅបន្តតវ៉ាបិទផ្លូវជាតិលេខ៤ ស្ថិតនៅតំបន់ឧស្សាហកម្មសេដ្ឋកិច្ចពិសេសភ្នំពេញ ដើម្បីដាក់សម្ពាធ ឲ្យមានការដំឡើងប្រាក់ឈ្នួលដល់កម្មករ១៦០ដុល្លារក្នុងមួយខែ។ សេចក្តីរាយការណ៍ពីស្រុកអង្គស្នួល ខេត្តកណ្តាលឲ្យដឹងថា មានកម្មករច្រើនពាន់នាក់កំពុងប្រមូលផ្តុំគ្នាតវ៉ាទាមទារប្រាក់ឈ្នួលដូចគ្នា។
សេចក្តីរាយការណ៍ឲ្យដឹងទៀតថា កម្មករជិត៣ម៉ឺននាក់ បានមកដល់ទីលានប្រជាធិបតេយ្យ ក្នុងរាជធានីភ្នំពេញ រួចស្រេចហើយ នៅរសៀលថ្ងៃសៅរ៍នេះ ដើម្បីត្រៀមហែក្បួនជាមួយគណបក្សសង្គ្រោះជាតិ ទាមទារឲ្យដំឡើងប្រាក់ឈ្នួល ដល់១៦០ដុល្លារនេះ។
កាលពីថ្ងៃទី២៧ ខែធ្នូ ក្រសួងការងារ និងបណ្តុះបណ្តាលវិជ្ជាជីវៈបានកោះប្រជុំបន្ទាន់មួយ បន្ទាប់ពីមានកម្មករច្រើនពាន់នាក់ បានផ្ទុះបាតុកម្មទាមទារប្រាក់ឈ្នួលគោលរហូត១៦០ដុល្លារនេះ ដែលមានភាគីរោងចក្រ តំណាងសហជីព គ្រប់និន្នាការ ប៉ុន្តែកិច្ចពិភាក្សានោះត្រូវបរាជ័យ ដោយសារភាគីរោងចក្រ អះអាងថា មិនអាចដំឡើងប្រាក់ឈ្នួលនេះ ទៅតាមការទាមទារ របស់កម្មករបាន ហើយក្រសួងសម្រេចលើកករណីនេះ ទៅពិភាក្សាបន្តទៀត នៅថ្ងៃទី៣០ ខែធ្នួ ឆ្នាំ២០១៣នេះ ដើម្បីរកដំណោះស្រាយ៕
No comments:
Post a Comment
yes