ក្រុមពលរដ្ឋគាំទ្រគណបក្សសង្គ្រោះជាតិ លើកបដាឲ្យលោកនាយករដ្ឋមន្ត្រី
ហ៊ុន សែនចុះចេញពីតំណែងនៅទីលានប្រជាធិបតេយ្យកាលពីម្សិលមិញ
រូបថត ហេង ជីវ័ន
បាតុកររាប់ពាន់នាក់នៅតែចូលរួមក្នុងការដើរដង្ហែក្បួនរបស់គណបក្សប្រឆាំង នៅតែបន្តទាមទារឲ្យលោកនាយករដ្ឋមន្រ្តី ហ៊ុន សែន ចុះចេញឬរៀបចំការបោះឆ្នោតឡើងវិញ។
បាតុកម្មឈានចូលដល់ថ្ងៃ ទី៥ កាលពីម្សិលមិញ គណបក្សសង្គ្រោះជាតិ បានដង្ហែពីសួនសេរីភាពឆ្លងកាត់ផ្លូវមួយចំនួននៅភ្នំពេញហើយឆ្ពោះទៅផ្លូវជាតិលេខ ៥ ត្រឡប់មកផ្លូវ ៥៩៨ រួចឆ្ពោះទៅមហាវិថី ព្រះមុនីវង្ស រហូតដល់កែងផ្លូវ ១០៨ ទើបវិលត្រឡប់ទៅសួនសេរីភាពវិញ នៅវេលាម៉ោងប្រហែលជាង ៧ យប់។
ពេលមកដល់សួនសេរីភាព នៅវេលាម៉ោងជាង ៤ រសៀល លោក សម រង្ស៊ី មិនបានថ្លែងសុន្ទរកថាវែងទៅកាន់អ្នកគាំទ្រដែលរង់ចាំស្វាគមន៍លោកទេ ដោយលោកគ្រាន់តែបញ្ជាក់ថា នៅថ្ងៃនេះ លោក កឹម សុខា អនុប្រធានគណបក្សមិនបានមកដឹកនាំក្បួនដង្ហែទៀតទេ ព្រោះគាត់កំពុងបំពេញបេសកកម្មនៅតាមខេត្ត ដើម្បីរៀបចំមហាបាតុកម្មនៅខេត្តហើយភ្លាមៗនោះ លោក សម រង្ស៊ី បានចុះពីលើឆាកដើម្បីដឹកនាំការហែក្បួន។
លោកស្រី មូរ សុខហួរ តំណាងរាស្រ្តជាប់ឆ្នោតគណបក្សសង្គ្រោះជាតិ បានថ្លែងថា៖ «យើងបានអំពាវនាវឲ្យប្រជាជនមកចូលរួម ហើយយើងនឹងមិនបញ្ឈប់ការធ្វើបាតុកម្មទេ។ ដល់ពេលបិទផ្លូវ យើងនឹងបិទផ្លូវ។ យើងគ្មានអ្វីជាការសម្ងាត់ទេ។ យើងគ្មានជម្រើសទេ។ ប្រព័ន្ធផ្សព្វផ្សាយថា បាតុកម្មនឹងថយចុះ ប៉ុន្តែ គ្រាន់តែស្តាប់ប្រជាជនទៅ»។
លោក ពេជ្រ ប៊ុនឡេង អាយុ ២១ ឆ្នាំ លោក កាំង សាល អាយុ ២៣ ឆ្នាំ ជានិស្សិតមកពីខេត្ត កណ្តាល បានថ្លែងថា គេរីករាយក្នុងការចូលរួមបាតុកម្មដោយអះអាងថា ពួកគេត្រូវតែមករៀងរាល់ថ្ងៃ ដើម្បីចូលរួម ព្រោះពួកគេចង់ឲ្យមានការផ្លាស់ប្តូរ។
ប៉ុន្តែ លោក ទៀ បាញ់ ឧបនាយករដ្ឋមន្រ្តី និងជារដ្ឋមន្រ្តីការពារជាតិ បានហៅការទាមទាររបស់គណបក្សសង្គ្រោះជាតិថា ហួសពេលហើយអាចនាំឲ្យកម្ពុជាជួបបញ្ហាធ្ងន់ធ្ងរ ដោយលោកលើកឡើងថា ជាអ្នកនយោបាយ គេគួរប្រើសកម្មភាពនោះក្រោមក្របខ័ណ្ឌច្បាប់។
លោក ទៀ បាញ់ បានប្រាប់អ្នកយកព័ត៌មាននៅខាងក្រៅសិក្ខាសាលាមួយកាលពី ម្សិលមិញថា៖ «បញ្ហាការទាមទារឲ្យលាលែងឲ្យបោះឆ្នោតថ្មី...បញ្ហាទាំងនេះ ជាបញ្ហាដែលយើងចាត់ទុកថា ហួសសម័យ ព្រោះការទាមទារនោះ យើងមិនដឹងទេថា តើវានាំប្រទេសយើងទៅជាអ្វីនោះទេ»។
ចំពោះការលើកឡើងថា បាតុករគណបក្សសង្គ្រោះជាតិព្យាយាមបិទផ្លូវ ដើម្បីកាន់កាប់ស្ថាប័នរដ្ឋមួយចំនួននោះ លោក ទៀ បាញ់ បានឆ្លើយតបថា ទីនេះគឺកម្ពុជាមិនមែនថៃទេ ដូច្នេះ ច្បាប់ប្រទេសទាំងពីរក៏ខុសគ្នាដែរ។ លោកបន្ថែមថា ប្រសិនបើគណបក្សសង្គ្រោះជាតិ ចង់ធ្វើអ្វីតាមឆន្ទៈប្រជាជនតំណាងរាស្រ្តគណបក្សសង្គ្រោះជាតិ គួរទៅអង្គុយនៅរដ្ឋសភាពិភាក្សាជាមួយគណបក្សប្រជាជនព្រោះប្រជាជនបោះឆ្នោតឲ្យគណបក្សសង្គ្រោះជាតិធ្វើការជូនជាតិ៕
No comments:
Post a Comment
yes