មេដឹកនាំសហជីពកម្មករ កំពុងជួបប្រជុំគ្នាដើម្បីស្វែងរកកិច្ចអន្តរាគមន៍សុំឲ្យដោះលែងកម្មករប្រមាណ ៧នាក់ដែលសមត្ថកិច្ចបានចាប់ខ្លួនក្នុងអំឡុងពេលពួកគេចេញធ្វើបាតុកម្មនៅលើផ្លូវជាតិលេខ៤ តំបន់សេដ្ឋកិច្ចពិសេស ស្ថិតនៅក្នុងភូមិត្រពាំងគល់ សង្កាត់កន្ទួត ខណ្ឌពោធិ៍សែនជ័យ រាជធានីភ្នំពេញ កាលពីព្រឹកថ្ងៃសុក្រ ទី២៧ ធ្នូ នេះ។
តំណាងកម្មករមួយរូបនៃសម្ព័ន្ធសហជីពប្រជាធិបតេយ្យ កម្មករកាត់ដេរកម្ពុជា លោក លី ហ៊ូវ បានឲ្យដឹងថា កម្មករប្រមាណ ៧នាក់ ត្រូវបានសមត្ថកិច្ចចាប់ខ្លួននៅម៉ោងប្រមាណជាង ១១ថ្ងៃត្រង់ បន្ទាប់ពីមានការប៉ះទង្គិចគ្នាមួយប្រាវនៅត្រង់តំបន់សេដ្ឋកិច្ចពិសេស នៅម៉ោងប្រមាណ ៩ព្រឹកថ្ងៃទី២៧ ខែធ្នូ។ ក្រៅពីចាប់ខ្លួនកម្មករ ៧នាក់នោះ ក៏មានកម្មករប្រមាណ ១០នាក់ផ្សេងទៀតរងរបួស ក្នុងនោះមានម្នាក់របួសធ្ងន់ដោយបាក់ជើង។ ចំណែកខាងសមត្ថកិច្ចក៏មានរបួសខ្លះដែរ។
ស្ថានការណ៍ចុងក្រោយគិតមកត្រឹមម៉ោងប្រមាណ ១២ថ្ងៃត្រង់ ថ្ងៃដដែលនេះ នៅលើកំណាត់ផ្លូវជាតិលេខ៤ ចាប់ពីតំបន់សេដ្ឋកិច្ចពិសេសរហូតមកដល់មុខក្រសួងការងារ និងបណ្ដុះបណ្ដាលវិជ្ជាជីវៈកំពុងស្ថិតក្នុងសភាពតានតឹង និងស្ទះចរាចរណ៍ ដោយក្រុមកម្មករជាច្រើនពាន់នាក់នៅតែព្យាយាមបិទផ្លូវនោះជាច្រើនកន្លែង ដើម្បីទាមទារឲ្យមានដំណោះស្រាយចំពោះការទាមទារដំឡើងប្រាក់ខែ និងសុំឲ្យដោះលែងកម្មករមកវិញភ្លាមៗ។
មកដល់ពេលនេះ ពុំទាន់មានការឆ្លើយតបយ៉ាងណានៅឡើយពីមន្ត្រីរដ្ឋាភិបាល ចំពោះបាតុកម្មបិទផ្លូវជាតិលេខ៤ ដែលតភ្ជាប់មកផ្លូវសហព័ន្ធរុស្ស៊ីមុខក្រសួងការងារ នោះ។
No comments:
Post a Comment
yes