កម្មករ​ស្នើ​ឲ្យ​សង្គម​ស៊ីវិល​បន្ត​ជួយ​ជំរុញ​ទៅ​រដ្ឋាភិបាលដំឡើង​ប្រាក់​ឈ្នួល​គោល​​

លោកស្រី ធីតា ឃឺះ ​នាយិកា​អង្គការ​សីល​ការ (រូបថត៖ ណាត សុភាព)

កម្មករ​-​កម្មការិនី ស្នើ​ឲ្យ​សង្គម​ស៊ីវិល​បន្ត​ជួយ​ជំរុញ​ទៅ​រដ្ឋាភិបាល ដំឡើងប្រាក់​ឈ្នួល​គោល​១៦០​ដុល្លារ​ក្នុង​១​ខែ ដើម្បី​ទ្រទ្រង់​ជីវភាព​រស់នៅ​សមរម្យ ខណៈ​ទំនិញ​ស្ទើរ​គ្រប់​មុខ ចេះ​តែ​បន្ត​ឡើងថ្លៃ​។​

ការទាមទារ​នេះ ធ្វើឡើង​ក្នុង​សកម្មភាព​សាមគ្គី​ជាមួយ​កម្មករ​-​កម្មការិនី​កម្ពុជា នៅ​មជ្ឈមណ្ឌល​លី​ឡា នា​ព្រឹក​ថ្ងៃ​អង្គារ​នេះ ដែល​មាន​អ្នកចូលរួម​ប្រមាណ​ជាង​៥០​នាក់​។​

តំណាង​កម្មក​ររ​រោងចក្រ SL អ្នកស្រី កង សុខ​មាន លើកឡើងថា ការចូលរួម​ក្នុង​កម្មវិធី​សម្មភាព​សាមគ្គី​ជាមួយ​កម្មករ​-​កម្មការិនី​ កម្ពុជា ក្នុង​គោលបំណង​ស្នើ​ឲ្យ​សង្គម​ស៊ីវិល​ជួយ​ជំរុញ​ទៅ​រដ្ឋាភិបាល​កម្ពុជា ដើម្បី​ផ្តល់​ប្រាក់​ឈ្នួល​ដល់​កម្មករ​ឲ្យបាន​១៦០​ដុល្លារ​ក្នុង​១​ខែ​។ អ្នកស្រី​បន្ត​ថា បច្ចុប្បនេះ ប្រាក់​ឈ្នួល​១០០​ដុល្លារ​ក្នុង​១​ខែ មិន​អាច​ផ្គត់ផ្គង់​ជីវភាព​រស់នៅ​សមរម្យ​បានទេ «គោលបំណងរបស់ខ្ញុំធំមកចូលរួមអង្គប្រជុំថ្ងៃហ្នឹង គឺចង់ទាមទារ ប្រាក់ខែឲ្យបានសមរម្យ ដើម្បីជីវភាពពួកខ្ញុំរស់នៅឲ្យបានសមរម្យ។ រាល់ថ្ងៃនេះប្រាក់ខែតិចណាស់ ហើយខ្ញុំត្រូវការចិញ្ចឹមឪពុកចាស់ ហើយប្អូនតូចមួយទៀត នៅក្នុងបន្ទុក»។

ដោយឡែក អ្នកស្រី កង សុខ​មាន ក៏​ស្នើ​ឲ្យ​រដ្ឋាភិបាល​ដោះលែង​អ្នក​ជាប់​ឃុំ​ទាំង​២៣​នាក់ នៅ​ត្រពាំង​ផ្លុង ខេត្ត​កំពង់ចាម ដោយ​គ្មាន​លក្ខខណ្ឌ ព្រោះ​អ្នក​ទាំងនោះគ្មាន​មាន​ទោសកំហុស​ដូច​ការចោទប្រកាន់​នោះ​ទេ គឺ​ពួកគេ​គ្រាន់តែ​ធ្វើ​បាតុកម្ម​ទាមទារ​ប្រាក់​ឈ្នួល​១៦០​ដុល្លារ សម្រាប់​កម្មករ​តែប៉ុណ្ណោះ​។​

​នាយិកា​អង្គការ​សីល​ការ លោកស្រី ធីតា ឃឹះ មានប្រសាសន៍ថា កន្លង​មក​សង្គម​ស៊ីវិល​ជាង​១០០​ស្ថាប័ន ធ្លាប់​ស្នើ​ឲ្យ​រដ្ឋាភិបាល​ដំឡើង​ប្រាក់​ឈ្នួល​១៦០​ដុល្លារ និង​ដោះលែង​អ្នក​ជាប់​ឃុំ​ទាំង​២៣​នាក់​ដោយ​គ្មាន​លក្ខ​ខណ្ឌដែរ​។ លោកស្រី​បញ្ជាក់​ថា សង្គម​ស៊ីវិល​ផ្សេងៗ​នឹង​បន្ត​ធ្វើ​ការងារ​របស់​ខ្លួន ដើម្បី​ជួយ​ជំរុញ​អ្នក​បញ្ជា​ទិញ​ផលិតផល​រោងចក្រ ឲ្យ​ដាក់​សម្ពាធ​ទៅ​រដ្ឋាភិបាល ដំឡើង​ប្រាក់​ឈ្នួល​កម្មករ ​ឲ្យបាន​សមរម្យ​នា​ពេល​ឆាប់ៗ​ខាងមុខនេះ «ក្នុងការទាមទារមិនមែនតែនៅក្នុងប្រទេសទេ គឺធ្វើការទាមទារជាមួយហ្នឹង អ្នកដែលមានអំណាចនៅក្រៅស្រុកផងដែរ មានអ្នកដែលជាអ្នកប្រទេសមានអំណាច ដែលផ្តល់នូវសក្តានុពល ដល់ការនាំចេញនូវវាយនភណ្ឌ នៅក្នុងប្រទេសកម្ពុជាយើង ដើម្បីគាត់ដាក់សម្ពាធមកលើប្រទេសកម្ពុជាយើង នៅក្នុងការចរចា និងរៀបចំធ្វើយ៉ាងណា ឲ្យបា្រក់ខែរបស់កម្មកររបស់យើងធ្វើការនៅក្នុងរោងចក្រ បានសមរម្យនិងរស់នៅឲ្យថ្លៃថ្នូរ និងសមរម្យ»។

VOD មិនអាច​សុំ​ការ​អត្ថាធិប្បាយ​ពី​អ្នកនាំពាក្យ​ទីស្តីការគណៈរដ្ឋមន្ត្រី លោក ផៃ ស៊ីផា​ន និង អ្នកនាំពាក្យ​ក្រសួង​ការងារ លោក ហេង សួរ បានទេ នៅ​ថ្ងៃ​អង្គារ​នេះ​។​

​ថ្មីៗ​នេះ គណបក្ស​ប្រជាជន​កម្ពុជា (CPP) បានកំណត់​គោលនយោបាយ ជំរុញ​បង្កើន​ប្រាក់​ឈ្នួល​កម្មករ​ឲ្យបាន​ដល់​១៦០​ដុល្លារ ក្នុង​១​ខែ និង​បៀវត្ស​មន្ត្រីរាជការ ១​លាន​រៀល ក្នុង​១​ខែ នៅ​ឆ្នាំ​២០១៨ ដើម្បីឲ្យ​ស្របតាម​កំណើន​សេដ្ឋកិច្ច​កម្ពុជា​។ ប៉ុន្តែ​ករណី​នេះ អ្នកវិភាគ​ឯករាជ្យ សង្គម​ស៊ីវិល រួម​ទាំង​សហជីព​មួយចំនួន​រិះគន់​ថា គោលនយោបាយ​នេះ​ហាក់ដូចជា​យឺត​ពេល និង​មិន​ស្រប​តាម​តម្រូវការ​សេដ្ឋកិច្ច​ទីផ្សារ​បច្ចុប្បន្ន​នោះទេ ហេតុ​ដូច្នេះ​ធ្វើ​ឲ្យ​កម្មករ​ភាគច្រើន សម្រេចចិត្ត​ធ្វើការ​ចំណាកស្រុក​ដោយ​បង្ខំ​៕