គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកកម្ពុជា COMFREL នៅថ្ងៃអង្គារនេះ បានលើកឡើងថា រដ្ឋាភិបាលត្រូវទទួលខុសត្រូវចំពោះសកម្មភាពរបស់ខ្លួន និងអាជ្ញាធរដែលបានប្រព្រឹត្តិល្មើសយ៉ាងធ្ងន់ធ្ងរចំពោះអនុសញ្ញា (ស៊ី ដ) នៃការលុបបំបាត់រាល់ទម្រង់នៃការរើសអើងលើស្ត្រីភេទ។
សេចក្តីប្រកាសព័ត៌មានរបស់ COMFREL ចេញផ្សាយនៅថ្ងៃទី២៩ ខែមេសានេះ បង្ហាញថា ក្រោយពេលបោះឆ្នោតជ្រើសរើសតំណាងរាស្ត្រឆ្នាំ២០១៣ សកម្មភាពរបស់រដ្ឋាភិបាល អាជ្ញាធរ កងកម្លាំងប្រដាប់អាវុធ និងកងសន្តិសុខមិនផ្លូវការ តែងរារាំងជាច្រើនសារដោយបង្ករបួសស្នាម ជេរប្រមាថមើលងាយបៀតបៀនកេរ្តិ៍ខ្មាស បំភិតបំភ័យ បំបាក់ស្មារតី និងរហូតដល់មានការស្លាប់បាត់បង់ជីវិត ក៏មានទៅលើស្ត្រីដែលជាអ្នកនយោបាយ បេក្ខជនតំណាងរាស្ត្រជាប់ឆ្នោត សកម្មជនអង្គការសង្គមស៊ីវិល សកម្មជនការពារដីធ្លី កម្មការិនីដែលប្រមូលផ្តុំបញ្ចេញមតិ និងធ្វើកូដកម្មដោយសន្តិវិធី។
សេចក្តីប្រកាសបន្ត សកម្មភាពរបស់រដ្ឋាភិបាល និងអាជ្ញាធរបានប្រព្រឹត្តិល្មើសយ៉ាងធ្ងន់ធ្ងរចំពោះអនុសញ្ញា(ស៊ី ដ) នៃការលុបបំបាត់រាល់ទម្រង់នៃការរើសអើងលើស្ត្រីភេទ ត្រង់មាត្រា ៣ ចែងថា «ក្នុងគ្រប់វិស័យ ជាពិសេស វិស័យនយោបាយ សង្គមកិច្ច សេដ្ឋកិច្ច និងវប្បធម៌ រដ្ឋត្រូវចាត់វិធានការសមស្របទាំងអស់រួមមាន ការធ្វើច្បាប់ផង ដើម្បីធានាការអភិវឌ្ឍន៍ និងការរីកចំរើនពេញលេញរបស់ស្ត្រី ដើម្បីធានាឲ្យស្ត្រីប្រើប្រាស់ និងអាស្រ័យផលសិទ្ធិមនុស្ស និងសរីភាពមូលដ្ឋានដោយសមភាពជាមួយបុរស»។
សេចក្តីប្រកាស បន្តថា ជាក់ស្តែងអំពើហិង្សាទាំងនេះបានប្រព្រឹត្តលើស្ត្រីរួមមាន លោកស្រី មូរ សុខហូរ ជាស្រីលេចធ្លោក្នុងវិស័យនយោបាយ និងជាបេក្ខជនជាប់ឆ្នោតតំណាងរាស្ត្រនៃគណបក្សសង្គ្រោះជាតិ ត្រូវបានកងកម្លាំងសន្តិភាពខណ្ឌដូនពេញរុញច្រាន ព្រមទាំងប្រើសំដីអសុរសប្រមាថមើលងាយ និងចាប់សែងទីណាត់ទីណែង ខណៈដែលលោកស្រី ព្យាយាមចូលទីលានប្រជាធិបតេយ្យ ដើម្បីអានច្បាប់ស្តីពីបាតុកម្មដោយសន្តិវិធី ឲ្យប្រជាពលរដ្ឋបានដឹង។ លើសពីនេះទៀត សូម្បីតែលោកស្រី ធីតា ឃិះ ជាថ្នាក់ដឹកនាំក្រុមស្ត្រីអង្គនៃការសង្គមស៊ីវិល ក៏ត្រូវបានកងកម្លាំងប្រដាប់ដោយដំបង និងពាក់មួកឃ្លុំមុបរាប់រយនាក់រារាំង និងរុញច្រានមិនញញើតដៃបណ្តាលឲ្យរងរបួសជើងក្នុងពេលដែលលោកស្រីដឹកនាំក្រុមស្ត្រី ចេញប្រារព្វទិវានារីអន្តរជាតិ។
សេចក្តីប្រកាស ក៏បានបង្ហាញថា អាកប្បកិរិយារបស់កម្លាំងសន្តិសុខមិនគោរពច្បាប់ និងឲ្យតម្លៃចំពោះស្ត្រីដោយសារពួកគេជាកម្លាំងសន្តិសុខ មិនស្របច្បាប់ ហើយគ្មានការបណ្តុះបណ្តាលពីសិទិ្ធមនុស្ស និងសិទិ្ធស្ត្រី ដូចនេះ រាជរដ្ឋាភិបាល ក៏ដូចជាអាជ្ញាធររាជធានីភ្នំពេញត្រូវតែទទួលខុសត្រូវ ចំពោះការរំលោភបំពានលើសិទ្ធិស្ត្រីទាំងអស់់ដែលបានប្រព្រឹត្តកន្លងមក៕
No comments:
Post a Comment
yes