រុស្ស៊ីទារ​បំណុល​ដែល​កម្ពុជា​ជំពាក់​កាល​ពី​សម័យ​លន់នល់

ឯកអគ្គរដ្ឋ​ទូតថ្មី​រុស្ស៊ី​ប្រចាំ​កម្ពុជា បាន​លើក​ឡើង​នូវ​បញ្ហា​បំណុល​ដែល​កម្ពុជា បាន​ជំពាក់​អតីត​សហភាព​សូវៀត កាល​ពី​សម័យ​លន់ នល់ ក្នុង​ជំនួប​សម្តែង​ការ​គួរ​សម​ជាមួយ​លោក ហោ ណាំហុង រដ្ឋ​មន្ត្រី​ក្រសួង​ការ​បរទេស​កម្ពុជា កាល​ពី​ព្រឹក​ថ្ងៃ​ចន្ទ​នេះ។ នេះ​បើ​តាម​មន្ត្រី​អ្នក​នាំ​ពាក្យ ក្រសួង​ការ​បរទេស​កម្ពុជា។

លោក កុយ គួង អ្នក​នាំ​ពាក្យ​ក្រសួង​ការ​បរទេស​បាន​បញ្ជាក់​ថា កម្ពុជា​និង​សហព័ន្ធ​រុស្ស៊ី​នឹង​ពិភាក្សា​គ្នា​ឡើង​វិញ នូវ​បំណុល​ដែល​កម្ពុជា ជំពាក់​អតីត​សហភាព​សូវៀត កាល​ពី​៣០ ឆ្នាំ​មុន ហើយ​ការ​ពិភាក្សា​នេះ គឺ​នឹង​ធ្វើ​យ៉ាង​ណា​ប្រកប​ដោយ​មិត្ត​ភាព​រវាង​ប្រទេស​ទាំងពីរ។

យ៉ាងណាក៏ដោយ អ្នក​នាំ​ពាក្យ​រូប​នេះ មិន​ទាន់​អាច​បញ្ជាក់​ពី​ចំនួន​ទឹក​ប្រាក់​បំណុល​ដែល​កម្ពុជា​ជំពាក់​នោះ​ទេ ដោយ​ឲ្យ​បង្វែរ​សំនួរ​នេះ​ទៅ​ក្រសួង​សេដ្ឋកិច្ច​កម្ពុជា និង​គ្រាន់​តែ​បាន​បញ្ជាក់​ថា បញ្ហា​បំណុល​នេះ ភាគី​ទាំង​ពីរ​សន្យា​ដោះ​ស្រាយ​គ្នា​ដោយ​មិត្តភាព ដោយ​មិន​ឲ្យ​ប៉ះ​ពាល់​ដល់​ទំនាក់​ទំនង​និង​សេដ្ឋកិច្ច​ប្រទេស​ទាំង​ពីរ​ទេ។

លោក​បាន​ប្រាប់​អ្នក​សារព័ត៌មាន​បន្ទាប់​ពី​ជំនួប​នោះទៀត​​ថា នៅក្នុង​ជំនួប​នោះ លោក Dmitry Tsvetkov ឯក​អគ្គរដ្ឋ​ទូត​រុស្ស៊ី​ថ្មី ប្រចាំ​នៅ​កម្ពុជា នៅក្នុង​បេសកកម្ម​ការទូត​នៅ​កម្ពុជា នឹង​ខិតខំ​ធ្វើ​ឲ្យ​មាន​កិច្ច​សហ​ប្រតិបត្តិ​ការ​លើ​គ្រប់​វិស័យ​នៃ​ប្រទេស​ទាំង​ពីរ។

ក្នុង​ជំនួប​ថ្ងៃ​នេះ​ផង​ដែរ លោក Dmitry Tsvetkov ឯកអគ្គរដ្ឋ​ទូត​រុស្ស៊ី​ថ្មី​ប្រចាំ​នៅ​កម្ពុជា ក៏​បាន​អញ្ជើញ​លោក​នាយក​រដ្ឋ​មន្ត្រី​ហ៊ុន សែន លោក​ហោ ណាំហុង រដ្ឋ​មន្ត្រី​ក្រសួង​ការ​បរទេស និង​លោក​អូន ព័ន្ធ​មុន្នីរ័ត្ន រដ្ឋ​មន្ត្រី​ក្រសួង​សេដ្ឋកិច្ច និង​ហិរញ្ញ​វត្ថុ​ទៅ​ធ្វើ​ទស្សន​កិច្ច​នៅ​រុស្ស៊ី នា​ពេល​ខាង​មុខ​ដើម្បី​ចុះ​ហត្ថលេខា​លើ​អនុស្សរណៈ ស្តីពី​ការ​ពិគ្រោះ​យោបល់​ទ្វេ​ភាគី​រវាង​ក្រសួង​ការបរទេស​នៃ​ប្រទេស​ទាំងពីរ​។

ជា​ការ​ឆ្លើយ​តប កម្ពុជា​មិន​ទាន់​កំណត់​ពេល​វេលា​ច្បាស់​លាស់​នៅ​ឡើយ​ទេ​សម្រាប់​ដំណើរ​ទស្សនកិច្ច​ផ្លូវ​រដ្ឋ និង​បាន​អំពាវនាវ​ឲ្យ​សហព័ន្ធ​រុស្ស៊ី​ធ្វើ​ការ​វិនិយោគ​បន្ថែម​នៅ​កម្ពុជា​ដើម្បី​ពង្រីក​ទំហំ​ជញ្ជីង​ពាណិជ្ជកម្ម​នៃ​ប្រទេស​ទាំងពីរ។​