លោកឧត្តមសេនីយ៍ទោ ឆៃ ស៊ីណារិទ្ធ ប្រធាននាយកដ្ឋានសន្តិសុខផ្ទៃក្នុង
របស់ក្រសួងមហាផ្ទៃ
ភ្នំពេញ: ប៉ូលិសក្រសួងមហាផ្ទៃរបស់ប្រទេសកម្ពុជា កំពុងតែទាក់ទងទៅកាន់អាជ្ញាធរកោះតៃវ៉ាន់ ដើម្បីបញ្ជូនជនជាតិចិនតៃវ៉ាន់ចំនួន ១១ នាក់ ដែលប្រព្រឹត្តបទល្មើសនៅកម្ពុជា ឲ្យវិលត្រឡប់ទៅវិញ។ ជនជាតិចិនតៃវ៉ាន់ ១១ នាក់នោះ ស្ថិតក្នុងចំណោមជនជាតិចិន ១៥ នាក់ ដែលត្រូវបានប៉ូលិសក្រសួងមហាផ្ទៃចាប់ខ្លួនកាលពីថ្ងៃទី៨ ខែសីហា ឆ្នាំ២០១២ នៅទីរួមខេត្តកំពង់ស្ពឺ ពាក់ព័ន្ធនឹងបទឧក្រិដ្ឋឆ្លងដែន ជំរិតទារប្រាក់តាមប្រព័ន្ធអ៊ិនធើណេត។
លោកឧត្តមសេនីយ៍ទោ ឆៃ ស៊ីណារិទ្ធ ប្រធាននាយកដ្ឋានសន្តិសុខផ្ទៃក្នុង របស់ក្រសួងមហាផ្ទៃ បានថ្លែងទៅកាន់ក្រុមអ្នកកាសែត នៅក្រៅកិច្ចប្រជុំរវាងប៉ូលិស និងតំណាងក្រុមហ៊ុនកាស៊ីណូ នាព្រឹកថ្ងៃទី២៨សីហា ឆ្នាំ២០១២ ថា "កាលពីយប់ថ្ងៃសុក្រកន្លងទៅនេះ ខាងសមត្ថកិច្ចរបស់នគរបាលចិន បាននាំជនល្មើស ៤ នាក់ ដែលជាជនជាតិចិន មានប្រុសពីរនាក់ ស្រីពីរនាក់ ទៅប្រទេសចិនហើយ។ នៅសេសសល់ជនជាតិចិនតៃវ៉ាន់ ១១ នាក់ទៀតនេះ យើងកំពុងតែសហការជាមួយនឹងសមត្ថកិច្ចចិន ដែលខាងសមត្ថកិច្ចចិនបានទំនាក់ទំនងជាមួយសមត្ថកិច្ចតៃវ៉ាន់ ដើម្បីមកនាំជនទាំងអស់នេះទៅកាន់តៃវ៉ាន់វិញ"។
លោកឧត្តមសេនីយ៍ទោ ឆៃ ស៊ីណារិទ្ធ ប្រធាននាយកដ្ឋានសន្តិសុខផ្ទៃក្នុង របស់ក្រសួងមហាផ្ទៃ បានថ្លែងទៅកាន់ក្រុមអ្នកកាសែត នៅក្រៅកិច្ចប្រជុំរវាងប៉ូលិស និងតំណាងក្រុមហ៊ុនកាស៊ីណូ នាព្រឹកថ្ងៃទី២៨សីហា ឆ្នាំ២០១២ ថា "កាលពីយប់ថ្ងៃសុក្រកន្លងទៅនេះ ខាងសមត្ថកិច្ចរបស់នគរបាលចិន បាននាំជនល្មើស ៤ នាក់ ដែលជាជនជាតិចិន មានប្រុសពីរនាក់ ស្រីពីរនាក់ ទៅប្រទេសចិនហើយ។ នៅសេសសល់ជនជាតិចិនតៃវ៉ាន់ ១១ នាក់ទៀតនេះ យើងកំពុងតែសហការជាមួយនឹងសមត្ថកិច្ចចិន ដែលខាងសមត្ថកិច្ចចិនបានទំនាក់ទំនងជាមួយសមត្ថកិច្ចតៃវ៉ាន់ ដើម្បីមកនាំជនទាំងអស់នេះទៅកាន់តៃវ៉ាន់វិញ"។
លោកឧត្តមសេនីយ៍ទោ ឆៃ ស៊ីណារិទ្ធ បានបន្ថែមថា ការបញ្ជូនខ្លួនជនជាតិចិនតៃវ៉ាន់ទាំង ១១ នាក់ ចេញពីកម្ពុជានោះ នឹងធ្វើឡើងក្នុងពេលឆាប់ៗនេះ មិនឲ្យហួសពីសប្តាហ៍នេះទេ។ បញ្ហាបញ្ជូនចេញជនជាតិចិន ឲ្យត្រឡប់ទៅវិញនេះ គឺពាក់ព័ន្ធនឹងនីតិវិធី និងពាក់ព័ន្ធនឹងការរៀបចំមធ្យោបាយដឹកជញ្ជូន។ តែសម្រាប់កម្ពុជាបានបង្កលក្ខណៈរួចអស់ហើយ ដោយលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ បានចុះហត្ថលេខាលើលិខិតបណ្ដេញជនជាតិចិនទាំង ១៥ នាក់ ចេញពីកម្ពុជារួចហើយ។
សូមរម្លឹកថា ជនជាតិចិនចំនួន ១៥នាក់ ត្រូវបានសមត្ថកិច្ចនគរបាលកម្ពុជា បានឃាត់ខ្លួននៅផ្ទះសំណាក់ អប្សរា នៅក្រុងច្បារខេត្តមន ខេត្តកំពង់ស្ពឺ កាលពីថ្ងៃទី៨ ខែសីហា ឆ្នាំ២០១២។ ការចាប់ខ្លួនជនជាតិចិនទាំង ១៥នាក់នោះ គឺជាលើកទី៣ហើយ ដែលសមត្ថកិច្ចកម្ពុជាចាប់ខ្លួនជនជាតិចិនពាក់ព័ន្ធនឹងឧក្រិដ្ឋកម្មឆ្លងដែន តាមរយៈការគំរាមទារប្រាប់តាមប្រព័ន្ធអ៊ីនធើណិត។ គិតមកដល់ពេលនេះ មានចំនួនសរុប ២៣១ នាក់។
ករណីទី១ សមត្ថកិច្ចរបស់នគរបាលជាតិកម្ពុជា ចាប់បាន ១៦៧ នាក់ (ស្រី ៤៩ នាក់) កាលពីថ្ងៃ៩ ខែមិថុនា ឆ្នាំ២០១១ នៅខេត្តព្រះសីហនុ ខេត្តស្វាយរៀង និងនៅរាជធានីភ្នំពេញ។
រីឯលើកទី២ សមត្ថកិច្ចចាប់បានជនជាតិចិន ៤៩ នាក់ កាលពីថ្ងៃទី១៨ ខែឧសភា ឆ្នាំ២០១២ និងបានបញ្ជូនក្រុមឧក្រិដ្ឋជនឆ្លងដែនទាំងនោះទៅកាន់ប្រទេសចិនវិញ។
ចំណែកករណីទី៣ នៅថ្ងៃ៨ ខែសីហា ឆ្នាំ២០១២ សមត្ថកិច្ចចាប់បាន ១៥ នាក់ នៅក្រុងច្បារមន ខេត្តកំពង់ស្ពឺ៕
No comments:
Post a Comment
yes