សោម ឯក ត្រូវបាននាំមកសាលាឧទ្ធរណ៍កាលពីម្សិលមិញ
ភ្នំពេញៈ សាលាឧទ្ធរណ៍កាលពីម្សិលមិញបានតម្កល់សេចក្តីសម្រេចឆ្នាំ ២០១០ របស់សាលាដំបូងរាជធានី ដែលបានដាក់ទោសសមាជិកនៃ«ចលនាក្បាលខ្លា»ឬ«រណសិរ្សរួបរួមជាតិ ខ្មែរ» ៤នាក់ ដាក់ពន្ធនាគារពី២០ទៅ២៨ឆ្នាំម្នាក់ៗ ក្រោមការចោទពីបទប្រព្រឹត្តអំពើភេរវកម្ម ក្នុងឆ្នាំ២០០៩ នៅរាជធានីភ្នំពេញ។
លោក ឃុន លាងម៉េង ប្រធានចៅក្រមប្រឹក្សានៃសាលាឧទ្ធរណ៍ បានថ្លែងថា សោម ឯក មេដឹកនាំ«ចលនាក្បាលខ្លា» ឬ «រណសិរ្សរួបរួមជាតិខ្មែរ» ត្រូវចោទប្រកាន់ដោយតុលាការពីបទដឹកជញ្ជូន មករក្សាទុក បញ្ជូនចេញ និងបំផ្ទុះគ្រឿងផ្ទុះនៅកន្លែងសាធារណៈនិងជ្រើសរើសកម្លាំងប្រដាប់អាវុធបង្កើតចលនាក្បាលខ្លា រីឯសមាជិកបីនាក់ទៀតមានឈ្មោះ ឡឹក ប៊ុនញ្ញាណ ពៅ វណ្ណារ៉ា និង ជា គឹមយ៉ាន ត្រូវចោទពីបទសមគំនិត ជាមួយសោម ឯក។
លោកបញ្ជាក់ថា ពួកគេត្រូវចាប់ខ្លួននៅខែមករា ឆ្នាំ២០០៩ ពាក់ព័ន្ធនឹងការដាក់គ្រឿងផ្ទុះនៅក្រៅក្រសួងការពារជាតិ និងស្ថានីយទូរទស្សន៍ប៉ុស្តិ៍លេខ ៣ ក្នុងរាជធានីភ្នំពេញ។
លោកបន្ថែមថា សោម ឯក ត្រូវសាលាដំបូងភ្នំពេញកាត់ទោសក្នុងឆ្នាំ២០១០ ដាក់ពន្ធនាគារ២៨ឆ្នាំ ហើយ ឡឹក ប៊ុនញ្ញាណ ពៅ វណ្ណារ៉ា និង ជា គឹមយ៉ាន ត្រូវបានកាត់ទោសដាក់ពន្ធនាគារម្នាក់ៗ ចំនួន ២០ឆ្នាំ ។
លោកប្រកាសសាលដីកាថា៖ «ផ្អែកតាមសវនាការ និងភស្តុតាងជាក់ស្តែង សាលាឧទ្ធរណ៍យល់ថា សេចក្តីសម្រេច ឆ្នាំ២០១០ របស់សាលាដំបូងរាជធានី ចំពោះចុងចោទទាំងបួននាក់ គឺត្រឹមត្រូវ និងធ្វើទៅតាមច្បាប់។ ហេតុនេះ សាលាឧទ្ធរណ៍សម្រេចតម្កល់សេចក្តីសម្រេចរបស់សាលាដំបូងនេះ និងឲ្យបន្តឃុំខ្លួនពួកគេ»។
លោកបន្ថែមថា៖ «ពួកគេអាចប្តឹងសារទុក្ខទៅតុលាការកំពូលបានទៅតាមច្បាប់ បើពួកគេមិនទទួលយកសាលដីកានេះ»។
ក្រោយ ការប្រកាសសាលដីកាកាលពីម្សិលមិញ ជនសង្ស័យទាំងបួនស្រែកឡើងថា៖ «អយុត្តិធម៌ណាស់»ហើយថា ពួកគេមិនបានប្រព្រឹត្តខុសឬបទល្មើសដូចការចោទប្រកាន់នោះទេ ។
ឡឹក ប៊ុនញ្ញាណ ថ្លែងថា គាត់គឺជាជនរងគ្រោះនៃការចាប់ខ្លួននេះ។ គាត់មិនមែនជាសមាជិក ចលនាក្បាលខ្លាឬរណសិរ្សរួបរួមជាតិខ្មែរ និងជាប់ពាក់ព័ន្ធជាមួយការបំផ្ទុះនៅភ្នំពេញក្នុងអំឡុង ឆ្នាំ២០០៩ នោះទេ។
គាត់លើកថា៖ «ខ្ញុំជាជនស្លូតត្រង់ ប៉ុន្តែត្រូវបានចោទប្រកាន់ និងកាត់ឲ្យជាប់ពន្ធនាគារ២០ឆ្នាំ តើយុត្តិធម៌នៅឯណា? ខ្ញុំនឹងសូមឲ្យសម្លាប់ខ្ញុំ ឬសម្លាប់សមាជិកគ្រួសារខ្ញុំ បើខ្ញុំពិតជាបានប្រព្រឹត្តដូចចោទប្រកាន់»។
សោម ឯក បានថ្លែងថា សេចក្តីសម្រេចរបស់តុលាការគឺអយុត្តិធម៌ណាស់ ហើយគាត់មិនអាចទទួលយកបានទេ។
គាត់ប្រាប់ភ្នំពេញប៉ុស្តិ៍ក្នុងកិច្ចសម្ភាសផ្ទាល់ថា៖ «ខ្ញុំបានប្រាប់តុលាការពីមុនថា ខ្ញុំមិនបានពាក់ព័ន្ធក្នុងការដាក់បង្កប់គ្រឿងផ្ទុះនៅក្រៅ ក្រសួងការពារជាតិនិងស្ថានីយទូរទស្សន៍ប៉ុស្តិ៍លេខ៣នោះទេ ហើយខ្ញុំក៏មិនបានបណ្តុះបណ្តាលភេរវករ ឬជ្រើសរើសកម្លាំងប្រដាប់អាវុធឲ្យប្រឆាំងរដ្ឋាភិបាលដូច ការចោទនោះដែរ»។
លោកថា៖«ខ្ញុំត្រូវនគរបាលបង្ខំឲ្យសារភាព អំពីសកម្មភាពនិងនិយាយតាមចម្លើយរបស់នគរបាលដែលគេប្រាប់ឲ្យ និយាយ។ ដោយសារពេលខ្ញុំត្រូវបានចាប់ខ្លួន នគរបាលបានចាប់ប្រពន្ធខ្ញុំដែលមានផ្ទៃពោះ៦ខែ ដើម្បីគំរាមខ្ញុំ។ ពួកគេបានគំរាមចាប់ខ្លួន និងដាក់ពន្ធនាគារទាំងប្រពន្ធខ្ញុំដែលមានផ្ទៃពោះប្រសិន បើខ្ញុំមិនឆ្លើយ ដូចចម្លើយដែលពួកគេចង់បាន»។ គាត់គិតថា ដើម្បីស្វែងរកការពិត និងយុត្តិធម៌ គាត់នឹងបន្តប្តឹងសារទុក្ខទៅតុលាការកំពូលទៀត។
តាមឯកសារ តុលាការ សោម ឯក ត្រូវចាប់ខ្លួននៅក្រុងប៉ោយប៉ែត ក្នុងខេត្តបន្ទាយមានជ័យកាលពីខែមករា ឆ្នាំ២០០៩ ពាក់ព័ន្ធនឹងការដាក់គ្រឿងផ្ទុះនៅក្រៅក្រសួងការពារជាតិ និងស្ថានីយទូរទស្សន៍ប៉ុស្តិ៍លេខ ៣ និងមេគំនិតនៅពីក្រោយផែនការដាក់គ្រាប់បែកនៅស្តូបមិត្ត ភាពកម្ពុជា‑វៀតណាម នៅភ្នំពេញកាលពីខែកក្កដាឆ្នាំ២០០៧៕
No comments:
Post a Comment
yes