យុវជន ពេលត្រូវបាននាំខ្លួនមកសាកសួរនៅសាលាដំបូងរាជធានី
បុរស ៤ នាក់ក្នុងចំណោម ៦ នាក់ដែលត្រូវសមត្ថកិច្ចចាប់កាលពីពាក់កណ្ដាល ខែ កញ្ញា ទាក់ទិននឹងករណីបង្កហិង្សានៅស្ពានអាកាសក្បាលថ្នល់ ត្រូវបានដោះលែងបណ្តោះអាសន្នពីពន្ធនាគារ ព្រៃស នៅថ្ងៃព្រហស្បតិ៍ម្សិលមិញនេះ ក្រោមការធានាពីក្រុមគ្រួសារ ប៉ុន្តែអង្គការសង្គមស៊ីវិលថា នេះជាការដោះលែងយ៉ាងតក់ក្រហល់ ដោយមិនបានផ្តល់ដំណឹងដល់មេធាវីការពារក្តី។
លោក អំ សំអាត មន្ត្រីទីប្រឹក្សាបច្ចេកទេសនៃអង្គការសិទ្ធិមនុស្ស លីកាដូ ដែលថាអង្គការលោកបានផ្តល់មេធាវីសម្រាប់ការពារជនទាំង ៦ នាក់ មិនបានដឹងជាមុនពីការដោះលែងនេះទេ។
បុរសចំនួនបួននាក់រួមមាន ឈ្មោះ សុង និស្ស័យ អាយុ ២១ ឆ្នាំ តាំង ជុងស៊ាង អាយុ ១៨ឆ្នាំ ឡាញ់ សាមឿម អាយុ ៣៣ ឆ្នាំ និងឈ្មោះ វ៉ា ណុន អាយុ ៤០ ឆ្នាំ ត្រូវបានសាលាដំបូងរាជធានី ភ្នំពេញ សម្រេចដោះលែងកាលពីម្សិលមិញនេះ ចំណែកឯឈ្មោះ ង្វៀង ធីឌឹក អាយុ ២០ ឆ្នាំ ជាជនជាតិ វៀតណាម និងឈ្មោះ ឯក ចាន់នូ អាយុ ១៧ ឆ្នាំ នឹងត្រូវដោះលែងនៅថ្ងៃសុក្រនេះ គឺយឺតជាងគេមួយថ្ងៃ ដោយសាររត់ឯកសារមិនទាន់។
លោកបានឲ្យ ដឹងទៀតថា៖ «យើងមានការភ្ញាក់ផ្អើលចំពោះការដោះលែង ព្រោះមេធាវីក៏មិនបានដឹង ទោះគាត់បានដាក់ពាក្យសុំឲ្យនៅក្រៅឃុំហើយក៏ដោយ តែយើងស្វាគមន៍ការដាក់ឲ្យនៅក្រៅឃុំបណ្តោះអាសន្ននេះ និងសុំឲ្យតុលាការពិចារណាទម្លាក់បទចោទប្រកាន់លើអ្នកទាំង ៦ តែម្តង»។
លោក បានឲ្យដឹងទៀតថា បុរសទាំង ៦ ត្រូវបានជាប់ចោទពីបទបង្កហិង្សាដោយចេតនាដោយមានស្ថានទម្ងន់ទោស តាមមាត្រា ២១៨ និងបទធ្វើឲ្យខូចខាតដោយចេតនា តាមមាត្រា ៤១០ និង ៤១១ នៃក្រមព្រហ្មទណ្ឌ។ ពួកគេត្រូវបានចាប់ខ្លួន កាលពីយប់ថ្ងៃ ទី១៥ ខែ កញ្ញា ក្រោយមានការប៉ះទង្គិចនិងផ្ទុះអាវុធពីសំណាក់សមត្ថកិច្ច ដើម្បីបង្ក្រាបបាតុករ ដែលព្យាយាមបំបែករនាំងបន្លាលួស បិទផ្លូវក្នុងថ្ងៃដែលមានមហាបាតុកម្មរបស់គណបក្សសង្គ្រោះជាតិ។
លោកបានបន្ថែមថា៖ «មេធាវីរបស់អ្នកទាំង ៦ នឹងធ្វើការបន្តទៀត ដើម្បីឲ្យគេរួចផុតពីការចោទប្រកាន់នានាតាមផ្លូវតុលាការ»។
លោក សួស សំអាត ចៅក្រមស៊ើបសួរក្នុងរឿងក្តីនេះ មិនអាចធ្វើការទាក់ទងបានទេពីម្សិលមិញ។
គណបក្ស សង្គ្រោះជាតិ កាលពីដើមសប្តាហ៍នេះ បានដាក់លិខិតមួយផ្ញើជូនចៅក្រម សួស សំអាត សុំចូលសួរសុខទុក្ខអ្នកជាប់ឃុំទាំង ៦ នាក់នេះ នៅថ្ងៃ ទី១១ តុលានេះ ដោយសារតាំងពីជាប់ឃុំ អាណាព្យាបាលរបស់ពួកគេមិនត្រូវបានឲ្យចូលជួបឡើយ។
លោក ហូរ វ៉ាន់ បេក្ខជនជាប់ឆ្នោតមណ្ឌល ភ្នំពេញ បានឲ្យដឹងថា ក្រុមការងារលោក បានសម្រេចលុបចោលកម្មវិធីសួរសុខទុក្ខនេះ។ លោកថ្លែងថា៖ «យើងត្រេកអរជំនួសម្តាយឱពុកគាត់ ព្រោះពួកគេជាពលរដ្ឋធ្វើដំណើរតាមផ្លូវ តែមានខ្លះជាបាតុករត្រឡប់ទៅផ្ទះវិញ បែរជាត្រូវគេចាប់ខ្លួន។ ការចោទពួកគេ ជាអំពើធ្ងន់ធ្ងរ អយុត្តិធម៌ និងមិនអាចទទួលយកបានឡើយ»។
អ្នកស្រី តាំង នី អាយុ ៤២ ឆ្នាំ ម្តាយរបស់យុវជន តាំង ជុងស៊ាង ដែលទើបដោះលែងម្សិលមិញ បានប្រាប់ ភ្នំពេញ ប៉ុស្តិ៍ ថា អ្នកស្រី ត្រេកអរ និងសំខាន់ឲ្យតែកូនបាននៅមានសេរីភាពសិន ព្រោះកូនមិនបានទាក់ទិននឹងរឿងធ្វើបាតុកម្មគាំទ្រគណបក្សសង្គ្រោះជាតិឡើយ។ អ្នកស្រីនិយាយថា៖ «កូនខ្ញុំនឹងបានចូលរៀនថ្នាក់ ទី៨ សាលាចិន និងថ្នាក់ ទី១១ សាលាខ្មែរវិញ។ ខ្ញុំរំភើបណាស់ ពេលវាចេញមកវិញ។ តាមពិតវាអត់ធ្វើបាតុកម្មអីទេ តែយប់នោះខ្ញុំជាប់នៅគល់ស្ពាន ហើយកូនក៏ដើរពីផ្ទះមករកខ្ញុំ ក៏មានរឿងចាប់ខ្លួនតែម្តង»។
អ្នកស្រីបន្តថា អ្នកស្រីនឹងពិភាក្សាជាមួយមេធាវី ដើម្បីសុំឲ្យតុលាការលើកលែងការចោទប្រកាន់ចំពោះកូនអ្នកស្រី៕
No comments:
Post a Comment
yes