ទំនប់ទឹករបស់ចិននៅក្នុងខេត្តពោធិ៍សាត់(រូបថតដោយញឹម សុខន)
ពលរដ្ឋជាង១៨០គ្រួសារនៅស្រុកភ្នំក្រវាញ
ខេត្តពោធិ៍សាត់ ឲ្យដឹងថា
ពួកគេកំពុងប្រឈមនឹងការបណ្តេញចេញដោយពុំមានសំណង
ក្រោមគម្រោងអភិវឌ្ឍន៍ទំនប់ទឹក២របស់ចិននៅក្នុងខេត្តនេះ។
គម្រោងទំនប់ទឹកចំនួនពីរនេះ
មួយឈ្មោះទំនប់ទឹកទី៣ និងមួយទៀតឈ្មោះទំនប់ទឹកទី៥
ដែលកំពុងត្រូវបានសាងសង់ជាប់ជ្រលងភ្នំក្រវាញ
ស្ថិតក្នុងខេត្តពោធិ៍សាត់។
ស្ត្រី អាយុ៦៥ឆ្នាំ ឈ្មោះ ហ៊ុន យួន
រស់នៅភូមិខ្សាំង ឃុំរកាត ស្រុកភ្នំក្រវាញ
អះអាងប្រាប់មន្ត្រីរបស់អង្គការលីកាដូ និងអាដហុក
ប្រចាំខេត្តពោធិ៍សាត់នៅថ្ងៃពុធនេះថា គាត់បានមករស់នៅតំបន់នោះ
តាំងពីដូនតាមក និងបានទាំងដាំដំណាំហូបផ្លែជាច្រើន ដូចជា ដូង
ចំការចេក ក្រូច និងខ្នុរជាដើម
ដែលអាចរកប្រាក់ចំណូលចិញ្ចឹមជីវិតបានដោយស្រួល ។
ស្ត្រីរូបនោះបន្តថា កាលពីខែមេសា
អាជ្ញាធរភូមិឃុំ បានប្រាប់ពលរដ្ឋឲ្យចាកចេញទៅនៅកន្លែងថ្មី
ដោយមិនប្រាប់ពីការផ្តល់សំណង ហើយគ្រាន់តែអះអាងថា
ភូមិនេះនឹងមានទឹកជន់លិចនៅពេលទំនប់ទឹកចិននេះដំណើរការ។
សមាជិកភូមិខ្សាំ លោក ឈឹម សុផាត
ឲ្យដឹងថា ទំនប់ទប់ទឹកចិនពីរនេះ
បានប៉ះពាល់ដល់ប្រជាពលរដ្ឋ១៨៥គ្រួសារ
ដែលរស់នៅតំបន់ភ្នំក្រវាញ។លោកថា អាជ្ញាធរ
ពិតជាបានជូនដំណឹងឲ្យពលរដ្ឋចាកចេញ ដោយមិនបានប្រាប់ពីសំណងមែន។
ប៉ុន្តែលោកថា លោកបានដាក់លិខិតនៅស្រុក
និងខេត្តដើម្បីពន្លឿនដំណោះស្រាយលើករណីនេះហើយ
ដោយសារពលរដ្ឋបារម្ភថាពួកគេអាចនឹងត្រូវបានបណ្តេញចេញដោយគ្មាន
សំណង។
អភិបាលស្រុកភ្នំក្រវាញ លោក សូ សាហុង
ប្រាប់VODនៅការិយាល័យស្រុកថា អាជ្ញាធរបានត្រៀមដី៦៧២ហិកតា
ចម្ងាយប្រហែល២គីឡូម៉ែត្រពីភូមិចាស់ សម្រាប់ពលរដ្ឋ១៨៥គ្រួសារនេះ
ដោយនឹងធ្វើជាដីភូមិ ផ្លូវ សាលារៀន និងមន្ទីរពេទ្យ។
ប៉ុន្តែលោកបញ្ជាក់ថា លោកមិនដឹងពីការផ្តល់សំណងឡើយ
ដោយអះអាងថាជាដែនសមត្ថកិច្ចរបស់ថ្នាក់ជាតិ
ដែលមានសមាសភាពមកពីក្រសួងធនធានទឹក និងក្រសួងហិរញ្ញវត្ថុ។
VOD មិនទាន់អាចទាក់ទងមន្ត្រីរដ្ឋាភិបាលថ្នាក់ជាតិ ដើម្បីបំភ្លឺករណីនេះបាននៅឡើយទេនៅរសៀលថ្ងៃព្រហស្បតិ៍នេះ។
មន្ត្រីឃ្លាំមើលការរំលោភសិទ្ធិមនុស្ស
នៃសមាគមអាដហុកប្រចាំខេត្តពោធិ៍សាត់ លោក ភូង សុធា
ដែលតាមដានករណីនេះ ពន្យល់ថា តាមការអង្កេតរកឃើញថា
អ្នកភូមិដែលកំពុងប្រឈមនឹងការបណ្តេញចេញនោះ
បានរស់នៅទីនោះតាំងពីមុនសង្គមរាស្ត្រនិយម។មន្ត្រីសង្គមស៊ីវិល
រូបនោះ ឲ្យដឹងទៀតថា ដូចនេះដីដែលពលរដ្ឋធ្លាប់អាស្រ័យផល
ជាកម្មសិទ្ធិស្របច្បាប់ ដែលរដ្ឋាភិបាលគួរតែផ្តល់សំណងឲ្យបានសមរម្យ
មុនឲ្យពួកគេទៅនៅកន្លែងថ្មី
ដើម្បីធានាថាការអភិវឌ្ឍទទួលបានប្រយោជន៍ទាំងអស់គ្នា៕
No comments:
Post a Comment
yes