នាយករដ្ឋមន្រ្តីកម្ពុជា-ថៃនឹងជួបគ្នាដោយមានការ
សម្របសម្រួលពីប្រធានាធិបតីឥណ្ឌូនេស៊ី
នាយករដ្ឋមន្រ្តីកម្ពុជា ហ៊ុន សែន និងប្រធានាធិបតីឥណ្ឌូនេស៊ី ស៊ូស៊ីឡូ បាំងបាង យូតហូយ៉ូណូ (រូប៖AFP)
ក្រុមមន្រ្តីដែលរៀបចំកិច្ចប្រជុំកំពូលអាស៊ានបានឲ្យដឹងថា នាយករដ្ឋមន្រ្តីកម្ពុជាលោក ហ៊ុន សែន និងនាយករដ្ឋមន្រ្តីថៃ អាប់ភីស៊ីត វាចាជីវ៉ា បានយល់ព្រមជួបគ្នានៅថ្ងៃអាទិត្យដើម្បីពិភាក្សាអំពីបញ្ហាជម្លោះ នៅតាមបណ្តោយព្រំដែនប្រទេសជិតខាងគ្នានេះដោយមានការសម្របសម្រួល ពីប្រធានាធិបតីឥណ្ឌូនេស៊ី ស៊ូស៊ីឡូ បាំងបាង យូតហូយ៉ូណូ។
កិច្ចប្រជុំត្រីភាគីដែលធ្វើនៅថ្ងៃអាទិត្យ ត្រូវគេកត់សម្គាល់ឃើញថា វាគឺជាការបោះជំហានទៅមុខមួយទៀតក្នុងការដោះស្រាយជម្លោះ ក្រោយពីភាគីថៃបានអះអាងកាលពីគ្រាមុនថា បញ្ហានេះអាចដោះស្រាយរវាងខ្លួន និងកម្ពុជាដោយគ្មានភាគីទីបីចូលរួមនោះ។
ជម្លោះព្រំដែនរវាងប្រទេសកម្ពុជានិងថៃបានកើតមានចាប់តាំងពីឆ្នាំ ២០០៨មក ក្នុងពេលដែលប្រទេសកម្ពុជាបានដាក់បញ្ចូលប្រាសាទហ៊ិនឌូដែលមានអាយុ ជិត១ពាន់ឆ្នាំនៅតាមបណ្តោយព្រំដែននោះចូលជាសម្បត្តិបេតិកភណ្ឌ ពិភពលោក។ ជម្លោះព្រំដែនរវាងប្រទេសភូមិផងទាំងពីរនេះ បានធ្វើឲ្យមានការប៉ះទង្គិចគ្នាដោយអាវុធជាច្រើនលើក ដែលបានបណ្តាលឲ្យកងទ័ពនៃប្រទេសទាំងពីរស្លាប់ និងរបួសរាប់សិបនាក់ និងធ្វើឲ្យមានជនភៀសសឹករាប់ពាន់គ្រួសារ។
ទាក់ទិននឹងបញ្ហានេះ ក្នុងកិច្ចប្រជុំកំពូលអាស៊ាននៅព្រឹកថ្ងៃសៅរ៍ នាយករដ្ឋមន្រ្តីខ្មែរ ហ៊ុន សែន បានធ្វើការព្រលះប្រទេសថៃដោយប្រើពាក្យសម្តីធ្ងន់ៗចំពោះជម្លោះ ព្រំដែន បើទោះបីជាបញ្ហានេះមិនស្ថិតក្នុងរបៀបវារៈផ្លូវការនៃកិច្ច ប្រជុំកំពូលអាស៊ាននោះក៏ដោយ។
នាយករដ្ឋមន្រ្តីខ្មែរបានហៅលក្ខខណ្ឌរបស់ប្រទេសថៃដែលទាមទារឲ្យ កម្ពុជាដកទ័ពចេញពីប្រាសាទព្រះវិហារថា ជាលក្ខខណ្ឌគ្មានហេតុផល និងមិនអាចទទួលយកបាន ហើយថា គឺថៃទៅវិញទេដែលត្រូវដកកងទ័ពចេញពីតំបន់ជុំវិញប្រាសាទ ព្រះវិហារ ទៅតាមសេចក្តីសម្រេចរបស់តុលាការក្រុងឡាអេ។
ជាមួយគ្នានេះនាយករដ្ឋមន្រ្តី ហ៊ុន សែន ក៏បានធ្វើការស្នើសុំឲ្យអាស៊ានចាត់វិធានការដើម្បីឲ្យអ្នក សង្កេតការណ៏ឥណ្ឌូនេស៊ីបានទៅដល់ព្រំដែនដែលមានជម្លោះឆាប់ៗ ដោយបានព្រមានថា ប្រសិនបើអាស៊ានមិនអាចជួយឲ្យមានការឈប់បាញ់អចិន្រ្តៃយ៏រវាង កម្ពុជា និងថៃទេ នោះអាស៊ានអាចនឹងត្រូវបាក់មុខមាត់៕
ពីគេទំព័រៈ សារព័ត៌មានសេរី
No comments:
Post a Comment
yes