គណបក្សសិទ្ធិមនុស្សអំពាវនាវឲ្យមានការ
រួបរួមគ្នាឡើងវិញ
លោក កឹម សុខា ប្រធានគណបក្សសិទ្ធិមនុស្សក្រោយពីមានការបែកធ្លាយខ្សែអាត់សន្ទនាតាមទូរស័ព្ទរវាងលោក ហ៊ុន សែន និងលោក កឹម សុខា ប្រធានគណបក្សសិទ្ធិមនុស្សរួចមក កាលពីថ្ងៃអង្គារម្សិលមិញនេះ គណបក្សសិទ្ធិមនុស្សបានចេញសេចក្តីអំពាវនាវមួយដោយហៅការទម្លាយ កិច្ចសន្ទនានោះថា គឺជាឧបាយកលបំបែកបំបាក់ខ្មែរ ហើយស្នើឲ្យអ្នកនយោបាយខ្មែរធ្វើការបង្រួបបង្រួមគ្នាឡើងវិញ។
លោក កឹម សុខា ប្រធានគណបក្សសិទ្ធិមនុស្សបាននិយាយនៅក្នុងសេចក្តីអំពាវនាវនោះថា ឧបាយកលបំបែកបំបាក់ខ្មែរធ្វើមិនឲ្យទុកចិត្តខ្មែរគ្នាឯង បានមកលងខ្មែរទៀតហើយ ដូចជាព្រឹត្តិការណ៍ថ្មីៗនេះ ទោះបីគេដឹងថា អំពើលួចថតសម្លេងគេយកមកផ្សព្វផ្សាយដោយគ្មានការអនុញ្ញាតពីសាម៉ី ខ្លួន គឺជាអំពើរំលោភច្បាប់រដ្ឋធម្មនុញ្ញមាត្រា៤០ ដែលចែងថា អាថ៌កំបាំងនៃការឆ្លើយឆ្លងតាមលិខិត តាមសារទូរលេខ ទូរពុម្ព ទូរគមន៍ និងតាមទូរស័ព្ទត្រូវបានធានា ក៏ដោយ ក៏គេនៅតែប្រើអំណាចបំពានរដ្ឋធម្មនុញ្ញខ្មែរដែរ។ ម្យ៉ាងទៀតទោះបីគេដឹងដែរថា បរទេសកំពុងតែបន្តមហិច្ឆតាឈ្លានពានត្រួតត្រាខ្មែរតាមរូបភាព ផ្សេងៗគ្នាក៏ដោយ ក៏គេនៅតែជួយបំបែកសាមគ្គីខ្មែរដើម្បីផ្តល់ឱកាសឲ្យប្រទេសត្រួត ត្រាខ្មែរដែរ។
ជាមួយគ្នានេះលោក កឹម សុខា បានធ្វើការអំពាវនាវឲ្យអ្នកនយោបាយខ្មែរដែលចង់ជួយស្រោចស្រង់ ប្រទេសជាតិ និងប្រជាពលរដ្ឋ សូមបែរមកជួបជុំគ្នា ចរចាគ្នា បង្រួបបង្រួមគ្នាវិញដើម្បីទប់ស្កាត់មហិច្ឆតាឈ្លានពានត្រួតត្រា របស់បរទេស និងទប់ស្កាត់អំណាចផ្តាច់ការរបស់អ្នកនយោបាយក្រាញអំណាច។
គួរបញ្ជាក់ថា ក្រោយពីមានការបែកធ្លាយកិច្ចសន្ទនារវាងនាយករដ្ឋមន្រ្តី ហ៊ុន សែន និងលោក កឹម សុខា ស្តីពីការបង្កើតគណបក្សសិទ្ធិមនុស្សរួចមក កិច្ចចរចាសម្ព័ន្ធភាពរវាងគណបក្សសមរង្ស៊ី និងគណបក្សសិទ្ធិមនុស្ស ត្រូវបានគណបក្សសមរង្ស៊ីប្រកាសរំលាយចោល ដោយលើកហេតុផលថា ការបង្ហាញឯកសារនេះបានបញ្ជាក់យ៉ាងច្បាស់អំពីកលល្បិចរបស់គណបក្ស សិទ្ធិមនុស្ស៕
ពីគេហទំព័រ៖ សារព័ត៌មានសេរី
No comments:
Post a Comment
yes