ក្រុមចោរបាញ់សម្លាប់ស្ត្រីអាជីវករប្តូរប្រាក់
ដែលមើលឃើញតាមវីដេអូឃ្លីប ត្រូវស្គាល់
អត្តសញ្ញាណហើយ
រាជធានីភ្នំពេញ ៖ ប្រធានការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលរាជធានីភ្នំពេញ លោកជួន ណារិន្ទ បានមានប្រសាសន៍ប្រាប់កោះសន្តិភាពតាមទូរស័ព្ទនៅរសៀលថ្ងៃទី១ កញ្ញា ២០១១នេះ ថា មុខសញ្ញាក្រុមចោរប្លន់ ដែលបានប្លន់បាញ់សម្លាប់ស្រ្តីជាអាជីវករប្តូរប្រាក់នៅ រង្វង់មូលចោមចៅយកប្រាក់ប្រមាណ៣ម៉ឺនដុល្លារអាមេរិកកាលពីថ្ងៃទី២៨ សីហា កន្លងមកនេះ គឺសមត្ថកិច្ចបានកំណត់មុខសញ្ញា និងស្គាល់អត្តសញ្ញាណអស់ហើយ។ ប៉ុន្តែលោកប្រធានការិយាល័យព្រហ្មទណ្ឌកម្រិតធ្ងន់រាជធានីភ្នំពេញ សុំមិនទាន់បញ្ចេញឈ្មោះនិងទីតាំងលាក់ខ្លួនរបស់បក្ខពួកចោរប្លន់ទាំងនោះ នៅឡើយទេ ពីព្រោះស្ថិតក្នុងនីតិវិធីតាមប្រមាញ់របស់សមត្ថកិច្ច ។
គួររំលឹកថា ស្ត្រីជាអាជីវករប្តូរប្រាក់ម្នាក់បានរងរបួសយ៉ាងធ្ងន់ធ្ងរ និងបន្ទាប់មកបានស្លាប់បាត់បង់ជីវិតពេលកំពុងបញ្ជូនទៅសង្គ្រោះ នៅមន្ទីរពេទ្យកាល់ម៉ែត ដល់ពាក់កណ្តាលផ្លូវដោយសារចោរប្លន់មានគ្នាជាច្រើននាក់ប្រដាប់ ដោយកាំភ្លើងខ្លីធ្វើសកម្មភាពបាញ់ប្រហារប្លន់យកកេសដាក់ប្រាក់អស់ចំនួន ជាង១០០លាន
រៀល ស្មើនឹងប្រមាណ៣ម៉ឺនដុល្លារ។ គ្រោះអកុសលនេះបានកើតឡើងក្នុងខណៈ ពេលដែលស្ត្រីរងគ្រោះកំពុងជិះម៉ូតូជាមួយកូនប្រុសធ្វើដំណើរចេញពីកន្លែងប្តូរប្រាក់មួយនៅម្តុំ ផ្សារអូឡាំពិក ខណ្ឌចំការមន ត្រឡប់ទៅផ្ទះនៅម្តុំរង្វង់មូលចោមចៅ ជាមួយកូនប្រុស។ ហេតុការណ៍នោះបានកើតឡើងកាលពីវេលាម៉ោង១០និង២០នាទីព្រឹកថ្ងៃទី២៨ ខែសីហា នៅលើកំណាត់មហាវិថីសហព័ន្ធរុស្ស៊ីត្រង់ចំណុចកន្លែង លក់ខោអាវជជុះមុខព្រលានយន្តហោះអន្តរជាតិ ភ្នំពេញ ភូមិព្រៃទា សង្កាត់ចោមចៅ ខណ្ឌដង្កោ។ ស្ត្រីរងគ្រោះឈ្មោះជួន ធារ៉ា អាយុ៤៨ឆ្នាំ មុខរបរប្តូរប្រាក់នៅរង្វង់មូលចោមចៅ ត្រូវចោរបាញ់៣គ្រាប់ត្រូវចំលើដើមទ្រូងខាងឆ្វេងធ្លាយទៅក្រោយ។ ចំណែកកូនប្រុសរបស់គាត់ឈ្មោះផុន ឡាទី អាយុ២១ឆ្នាំ មិនរងរបួសអ្វីទេ។ ពួកគេរស់នៅក្បែររង្វង់មូលថ្នល់បំបែកចោមចៅ។ ដោយឡែកក្រុមចោរមានគ្នាជាច្រើននាក់ ស្លៀកពាក់ស៊ីវិល ប្រដាប់ដោយកាំភ្លើងខ្លី២ដើម ជិះម៉ូតូធុនហុងដា សេ១២៥ ពីរគ្រឿង និងមានម៉ូតូបិទគូទមួយចំនួនទៀត។ ក្រោយពេលធ្វើសកម្មភាពបាញ់ប្លន់ដណ្តើមយកកេសលុយជាង១រយលានរៀលបានហើយ ពួកវាបានជិះម៉ូតូគេចខ្លួនបាត់ដោយសុវត្ថិភាព។ តាមប្រភពព័ត៌មានបានឱ្យដឹងថា នៅមុនពេលកើតហេតុស្ត្រីរងគ្រោះ និងកូនប្រុសបានជិះ ម៉ូតូ១គ្រឿងម៉ាកអ៊ែរប្លេត ពាក់ស្លាកលេខភ្នំពេញ 1AX-2125 ពណ៌ខ្មៅ នាំយកប្រាក់ដុល្លារចំនួន៣ម៉ឺនដុល្លារអាមេរិកទៅប្តូរយកប្រាក់រៀលបានជាង១រយលានរៀលនៅផ្ទះម្តុំផ្សារអូឡាំពិក ខណ្ឌចំការមន ដែលជាកន្លែងប្តូរប្រាក់ធំមួយ។ ក្រោយពេលដូររួចស្ត្រីរងគ្រោះនិងកូនប្រុសបានជិះម៉ូតូឌុបគ្នាត្រឡប់មកផ្ទះវិញ ដោយដាក់ប្រាក់នៅក្នុងសំបកកេសស្រាបៀរមួយរួចដាក់ចំកណ្តាលដែលម្តាយជិះអោប ពីក្រោយ។ ពេលជិះតាមផ្លូវស្រាប់តែមានជនសង្គមងងឹតមួយក្រុមបានដេញតាមប្លន់យ៉ាងប្រកៀកប្រកិតធ្វើឱ្យជនរងគ្រោះដឹងខ្លួនផងដែរ បានបើកម៉ូតូរត់សសៀរតាមផ្ទះប្រជាពលរដ្ឋ ប៉ុន្តែមិនចំកន្លែងសមត្ថកិច្ចឈរជើងទាល់តែសោះ ទើបចោរមានឱកាសតាមប្លន់រហូត។ លុះទៅដល់ត្រង់ចំណុចកើតហេតុខាងលើ ស្រាប់តែជនសង្ស័យ៣នាក់ ស្លៀកពាក់ស៊ីវិលជិះម៉ូតូ២គ្រឿងដេញតាមពីក្រោយ ធ្វើឱ្យជនរងគ្រោះភ័យខ្លាំងពេក ក៏ផ្តួលម៉ូតូ ហើយត្រូវចោរដណ្តើមកេសប្រាក់យ៉ាងស្វិតស្វាញបំផុតរហូតដល់បក្សពួកចោរដកកាំភ្លើងខ្លីបាញ់ឥតញញើតដៃតែម្តង។
ប្រភពដដែលបានបន្តទៀតថា ខណៈនោះស្ត្រីរងគ្រោះមិនព្រមប្រគល់កេសប្រាក់នោះឱ្យទេ ឯក្រុមចោរក៏បានព្យាយាមដណ្តើមយក តែជនរងគ្រោះនៅតែមិនព្រមឱ្យដដែល ទើបក្រុមចោរបាញ់ប្រហារសំដៅដងខ្លួនចំនួន៣គ្រាប់តែម្តង ត្រូវស្ត្រីរងគ្រោះដេកដួលក្នុងថ្លុកឈាម។ ចំណែកក្រុមចោរប្លន់ ពេលបាញ់រួចហើយបាននាំគ្នាយកកេសប្រាក់នោះជិះ ម៉ូតូគេចខ្លួនធ្វើព្រងើយ គ្មានអ្នកណាហ៊ានជួយឡើយ ៕
No comments:
Post a Comment
yes