ប៉ូលិសក្រុងញូវយ៉កឱ្យដឹងថា បាតុករប្រឆាំង WALL STREET ជាង៧០០នាក់បានត្រូវចាប់ខ្លួនកាលពីរសៀលថ្ងៃទី១ តុលា ខណៈពួកគេសាកល្បងរាំងខ្ទប់ចរាចរណ៍លើស្ពាន BROOKLYN ដែលបង្ខំឱ្យអាជ្ញាធរបិទស្ពាននោះរយៈពេលជាច្រើនម៉ោង។ អ្នកនាំពាក្យម្នាក់របស់ប៉ូលិសក្រុងញូវយ៉កគូសបញ្ជាក់ថា ប៉ូលិសបានចាប់ខ្លួនបាតុករទាំងនោះក្រោយពីធ្វើការព្រមានជាច្រើនលើកមកដោយស្នើឱ្យពួកបាតុករស្ថិតនៅតាមចិញ្ចើមថ្នល់។
បាតុករមួយចំនួនបានទៅឈរនៅផ្លូវសម្រាប់មនុស្សដើរដោយអ្នកទាំងនេះពុំត្រូវចាប់ខ្លួនឡើយ។ បាតុករដទៃៗទៀតបានធ្វើមិនដឹងមិនឮ ហើយបន្តដើរហែក្បួនលើទ្រូងផ្លូវសម្រាប់រថយន្តសំដៅស្ពាន BROOKLYN ហើយពួកនេះត្រូវចាប់ខ្លួន។ ស្ពាននោះត្រូវបានបើកឱ្យដំណើរការវិញនាវេលាម៉ោង២០ម៉ោងក្នុងស្រុក។ ក្បួនបាតុកម្មលើកចេញពីឧទ្យាន ZUCCOTTI ដែលស្ថិតនៅជិតទីតាំងអតីតមជ្ឈមណ្ឌលពាណិជ្ជកម្មពិភពលោកនៅម៉ាន់ហាតាន់។ បាតុកម្មនេះត្រូវបានរៀបចំធ្វើក្នុងក្របខណ្ឌនៃចលនា OCCUPY WALL STREET ដែលតវ៉ាប្រឆាំងនឹងការលោភលន់របស់មជ្ឈដ្ឋានហិរញ្ញវត្ថុ និងសហគ្រាសធំៗ ប្រឆាំងនឹងការកើនកំដៅបរិយាកាស ព្រមទាំងវិសមភាពសង្គម។
ក្រុម OCCUPY WALL STREET ដែលធ្វើការតវ៉ាបានបោះជំរំក្នុងឧទ្យាន ZUCCOTTI ចាប់តាំងពី២សប្តាហ៍មកហើយរួចធ្លាប់ប៉ះជាមួយប៉ូលិសរួចមកហើយដែរ។ បណ្តាសមាជិករបស់ចលនានេះសន្យាស្ថិតនៅក្នុងឧទ្យានពេញមួយរដូវរងា ៕
No comments:
Post a Comment
yes