ការសម្រេចដូច្នេះ បានធ្វើឡើង ក្នុងកិច្ចប្រជុំជាង ១ ម៉ោង ចាប់ពីម៉ោង ៩ ព្រឹកថ្ងៃសៅរ៍ ទី១៥តុលា ឆ្នាំ២០១១។
លោក ទេព នីថា បានមានប្រសាសន៍ថា គ.ជ.ប. បានសម្រេចយល់ព្រម តាមការស្នើសុំរបស់គណបក្សសមរង្ស៊ី ក្នុងការប្តូរបេក្ខជនតំណាងរាស្ត្រជាប់ឆ្នោតរបស់គណបក្សសមរង្ស៊ី នៅខេត្តតាកែវ។ គ.ជ.ប. អនុវត្តតាមច្បាប់ ស្តីពី ការបោះឆ្នោតជ្រើសតាំងតំណាងរាស្ត្រ ដែលប្រគល់ភារៈកិច្ច និងសិទ្ធិអំណាចឲ្យ គ.ជ.ប. ក៏ដូចជា រដ្ឋធម្មនុញ្ញ ដែលទាក់ទងនឹងការផ្លាស់ប្តូរសមាជិកសភា និងច្បាប់ស្តីពីគណបក្សនយោបាយ។ រីឯដីការបស់តុលាការ គឺតុលាការជាស្ថាប័នឯករាជ្យមួយ ហើយ គ.ជ.ប.ក៏ជាស្ថាប័នឯករាជ្យ និងមានសិទ្ធិអំណាចនៅក្នុងការធ្វើសេចក្តីសម្រេចរបស់ខ្លួន។
លោក ទេព នីថា បានបញ្ជាក់ថា ការសម្រេចរបស់ គ.ជ.ប. ចំពោះការផ្លាស់ប្តូរសមាជិកសភាគណបក្សសមរង្ស៊ី នៅខេត្តតាកែវ គឺស្ថិតនៅក្នុងកម្រិតសមត្ថកិច្ចរបស់ គ.ជ.ប. ដែលច្បាប់បានកំណត់។
កាលពីថ្ងៃទី៧តុលា ឆ្នាំ២០១១ គណៈកម្មាធិការអចិន្ត្រៃយ៍គណបក្សសមរង្ស៊ី បានសម្រេចលុបឈ្មោះលោក តុ វ៉ាន់ចាន់ អ្នកតំណាងរាស្ត្រមណ្ឌលតាកែវ ចេញពីបញ្ជីគណបក្ស ជាមួយនឹងលោក វ៉ាន់ ស៊ីវឿន សមាជិកព្រឹទ្ធសភា គណបក្សសមរង្ស៊ី ដោយគណបក្សសំអាងថា អ្នកទាំងពីរមានជំហរមិនស្មោះត្រង់ និងអសកម្មការងារ។
នៅថ្ងៃទី១០តុលា ឆ្នាំ២០១១ លោក តុ វ៉ាន់ចាន់ បានដាក់ពាក្យបណ្តឹងទៅកាន់តុលាការសាលាដំបូងរាជធានីភ្នំពេញ ដើម្បីជំទាស់នឹងការសម្រេចរបស់គណបក្សសមរង្ស៊ី លើការលុបឈ្មោះរូបលោក។
នៅថ្ងៃទី១០តុលា ឆ្នាំ២០១១ លោក អឿង សៀង ចៅក្រមតុលាការសាលាដំបូងរាជធានីភ្នំពេញ បានចេញដីការក្សាការពារចំនួន ៣ ច្បាប់ ដាក់ទៅកាន់គណបក្សសមរង្ស៊ី គ.ជ.ប. និងរដ្ឋសភា ដើម្បីស្នើឲ្យគណបក្សសមរង្ស៊ី ផ្អាកអនុវត្តសេចក្តីសម្រេចរបស់ខ្លួន។ ចៅក្រមតម្រូវឲ្យ គ.ជ.ប. និងរដ្ឋសភា រក្សាតួនាទីរបស់លោក តុ វ៉ាន់ចាន់ ជាតំណាងរាស្ត្រមណ្ឌលខេត្តតាកែវ រង់ចាំការដោះស្រាយពាក្យបណ្តឹង ដែលជាជម្លោះរដ្ឋបាល និងឋានៈបុគ្គល ប្តឹងគណបក្សសមរង្ស៊ី ដោយលោក តុ វ៉ាន់ចាន់។
ក៏ប៉ុន្តែគណបក្សសមរង្ស៊ី បានច្រានចោលនូវការសម្រេចរបស់តុលាការ និងទទូចសុំឲ្យ គ.ជ.ប. និងរដ្ឋសភា ផ្លាស់ប្តូរ លោក សាន សាង ជាតំណាងរាស្ត្រមណ្ឌលតាកែវ ជំនួស លោក តុ វ៉ាន់ចាន់៕
BY:CEN
No comments:
Post a Comment
yes