រថយន្តម៉ាក CHEVROLET មួយគ្រឿងរបស់លោកព្រហ្ម ម៉ាញ អ្នកចម្រៀងអាយ៉ៃជើងចាស់ បានបើកបរបោះពួយក្នុងល្បឿនយ៉ាងលឿន ដែលតាមការអះអាងថា ត្រឡប់មកពីកម្សាន្តនៅខេត្តព្រះសីហនុ បានជ្រុលទៅបុកជាមួយម៉ូតូ១គ្រឿង ពេញទំហឹងលាន់សូរដូចរន្ទះ បណ្តាលឱ្យរបួសធ្ងន់ធ្ងរ២នាក់ ស្ទើរស្លាប់ស្ទើររស់ បន្ទាប់មករថយន្តនោះបានបើករត់គេចខ្លួនសំដៅចូលភ្នំពេញមិនបានឈប់ដើម្បីដោះស្រាយគ្នាតាមផ្លូវច្បាប់សិននោះឡើយ ។
សំណាញ់ច្បាប់នៅតែល្អិតស្វិតដដែល រថយន្តលោកព្រហ្ម ម៉ាញ បើករត់ដល់ត្រង់ចំណុចម្តុំភ្លើងស្តុបពេទ្យលោកសង្ឃ (ព្រះកុសុមៈ) ក៏ត្រូវបានកម្លាំងប៉ូលិសចរាចរណ៍រាជធានីភ្នំពេញ ដែលឈរជើងនៅគោលដៅនោះ ស្ទាក់ចាប់បាន ព្រោះពេលបុកម៉ូតូបណ្តាលឱ្យមនុស្សពីរនាក់របួសធ្ងន់ហើយនោះ ប៉ូលិសស្រុកអង្គស្នួលបានផ្តល់ព័ត៌មានដល់សមត្ថកិច្ចរាជធានីភ្នំពេញ ឱ្យជួយស្ទាក់ចាប់ ហើយពេលនោះក៏មានការប្រកាសតាមវិទ្យុទាក់ទង ផ្អើលមួយចំហៀងក្រុង ដោយសាររថយន្តតាម៉ាញ ទីបំផុតរត់មិនរួច។ ប៉ុន្តែអ្វីដែលគេនឹកស្មានមិនដល់នោះ ក្រោយពេលសមត្ថកិច្ចឃាត់រថយន្តបាន និងមានអ្នកកាសែតមួយចំនួនបានទៅថតរូបយកព័ត៌មាន ស្រាប់តែឃើញស្ត្រីស្រស់ស្អាតម្នាក់អាយុប្រហែលជាង២០ឆ្នាំប៉ុណ្ណោះ បានចុះពីលើរថយន្តនោះចង្អុលមុខជេរប្រមាថអ្នកកាសែតយ៉ាងចាស់ដៃ បញ្ចេញឫកពាទំនើង មិនស័ក្តិសមនឹងរូបស្រស់សោភានោះឡើយ ម្យ៉ាងទៀតគំរាមប្តឹងអ្នកកាសែតបើហ៊ានចុះផ្សាយ។ សូមនាងទៅរៀនច្បាប់ស្តីពីរបបសារព័ត៌មានឱ្យបានស៊ីជម្រៅសិនទៅ។
ឧប្បត្តិហេតុគ្រោះថ្នាក់ចរាចរណ៍នោះបានកើតឡើងកាលពីវេលាម៉ោង៦និង៤០នាទីល្ងាចថ្ងៃទី១៦ តុលា ២០១១ លើកំណាត់ផ្លូវជាតិលេខ៤ ត្រង់ចំណុចភូមិត្រពាំងច្រនាង ឃុំពើក ស្រុកអង្គស្នួល ខេត្តកណ្តាល ។ រថយន្តម៉ាក CHEVROLET មួយគ្រឿងនោះ ពណ៌ខ្មៅ ពាក់ស្លាកលេខបណ្តោះអាសន្ន ១៥៩១ ជិះគ្នា៤ទៅ៥នាក់ ជាក្រុមគ្រួសាររបស់លោកព្រហ្ម ម៉ាញ ហើយស្ត្រីម្នាក់ដែលជេរប្រមាថអ្នកកាសែតនោះគេពុំដឹងថា ជាសាច់ញាតិរបស់លោកព្រហ្ម មា៉ញមែន ឬមិនមែននោះឡើយ ។ ម្យ៉ាងទៀតក្រោយពេលឃាត់បានប៉ូលិសចរាចររាជធានីភ្នំពេញបានប្រគល់រថយន្តនោះទៅឱ្យប៉ូលិសស្រុកអង្គស្នួល នាំយកទៅរក្សាទុក ហើយមានបុរសម្នាក់ឈ្មោះសឹុម សាខន អាយុ៤៤ឆ្នាំ ជាកសិករមានស្រុកកំណើតនៅខេត្តបាត់ដំបង ចេញមុខអះអាងប្រាប់ប៉ូលិសថា ខ្លួនជាអ្នកបើកបររថយន្តនោះ ចំណែកលោកព្រហ្មម៉ាញអត់បានទៅជាមួយនោះទេ គឺលោកកំពុងជាប់រវល់នៅឯផ្ទះយាយយ៉យដែលជាតារាកំប្លែកដែរ ។ លុះក្រោយមកទៀតបុរសនោះបានប្រាប់ប៉ូលិសផ្សេងវិញថា រថយន្តនោះខ្លួនបានទិញពីលោកព្រហ្មមា៉ញកាលពីអំឡុងខែសីហា កន្លងទៅនេះ មិនមែនជារថយន្តរបស់លោកព្រហ្មមា៉ញនោះ
ទេ ។ ប៉ុន្តែប៉ូលិសចរាចរណ៍រាជធានីភ្នំពេញបានបញ្ជាក់ច្បាស់ណាស់ថា ពេលឃាត់រថយន្តបាន ឬរថយន្តអស់ផ្លូវរត់ គេឃើញលោកព្រហ្ម ម៉ាញបើកទ្វារចុះចេញពីរថយន្តច្បាស់ក្រឡែត រួចហើយជិះម៉ូតូឌុបទៅបាត់...ស្រុកខ្មែរ មនុស្សភាគតិចណាស់ដែលមិនស្គាល់តាម៉ាញ។
ដោយឡែកម៉ូតូជនរងគ្រោះដែលត្រូវរថយន្តនោះបុកម៉ាកវីវ៉ា ពណ៌ខ្មៅ ពាក់ស្លាកលេខភ្នំពេញ 1N-3800 ជិះគ្នាពីរនាក់បើកបរដោយយុវជនម្នាក់ឈ្មោះម៉ៅ មិន អាយុ២៣ឆ្នាំ ជានិស្សិតនាយទាហានសកម្មត្មាតពងមានស្រុកកំណើតស្រុកបរិបូណ៍ ខេត្តកំពង់ឆ្នាំង រងរបួសបាក់ជើងស្តាំ ឯម្នាក់ទៀតដែលជាអ្នករួមដំណើរមិនត្រូវបានគេស្គាល់ឈ្មោះនោះទេ រងរបួសធ្ងន់ធ្ងរដែរ ។
ពីគេហទំព័រ៖ កោះសន្តិភាព
No comments:
Post a Comment
yes